Read Batak Dairi 1 Raja-raja 5 Bible Online

1 Raja-raja 5 - Batak Dairi bible

1 Raja-raja 5

¹Si Hiram raja Tirus dak meralè-alè ngo dekket Raja Daud. Terbertik kesa mo bai si Hiram, si Salomo ngo mbangkit raja sumingkat si Daud bapana i, ipasulak mo utusenna mendahi si Salomo.

²Nai itennahken si Salomo mo bagèen taba si Hiram,

³“Alè Raja Hiram Sinipersangapen! Tentu ibettoh Rajai ngo ukum bapangku si Daud pukpuk terpaksa mergeraha kumarna dak ikubu musuh silot i sikuliling nami. Janah kumarna madèng iberèken JAHOWA bana kemenangen meraloken karina musuhna, oda sempat ia majek bages bekkas mersembah taba JAHOWA Dèbatana.

⁴Tapi ukum bagèndari enggo iberèken JAHOWA Dèbatangku kemènaken i suberri aur kerajaenku. Oda lot musuhku janah oda lot mara sempa mi nagerringku.

⁵Enggo ijandiken JAHOWA taba bapangku si Daud bagèen, ‘Anakmu sinaing Kupebangkit gabè raja sumingkat kono memajek bages bekkas mersembah taba Aku.’ Kumarna i, alè Raja Hiram Simersangap, aku si Salomo enggo merharkat lako memajek bages i.

⁶Ibettoh Rajai ngo, ukum ginemgemku oda lot pandè menabah kayu tosè bagè ginemgem Rajai. Kumernaken i kupido, asa uè nemmu Rajai pasulakken tukkang menabah kayu arès Libanon lako bangku. Kupasulak ma pè ginemgemKu mengurupi kalak i janah barang sadikè upahna idokken Rajai, kugarar ngo i.”

⁷Lolo kalohon ngo si Hiram mendengkoh berita i. Idokken mo, “Poji mo JAHOWA ari èn kumerna iberèken taba si Daud sada anak bijak kalohon gabè raja mengerajai bangsa mbellen i.”

⁸Nai itengesken si Hiram mo pengaloina bagèen, “Enggo soh bangku pengidoen Rajai, janah kuuèi ngo pengidoen Rajai. Kupèmaken pè kayu ares Libanon dekket kayu sempènur tosè bagè nipergeddo Rajai.

⁹Kudokken pè orangku merembah kayu idi i Libanon nai soh mi laut. Nai iangit kalak i mo kayu i i sidi gabè rakit, nai iombang-ombang mo idi mengèkut-ngèkut biding laut mi bekkas sienggo itentuken Rajai. Nai ipesakat mo i bai orang Rajai enggo kessa irasras, asa kalak i nola mengurus. Kupido bai Rajai asa ipèmaken Rajai pangaen bai jelma silot i istanangku.”

¹⁰Nai iberèken si Hiram mo bai si Salomo kayu arès Libanon dekket kayu sempènur sadikè perlu.

¹¹Mahan pangaen jelma pengisi istana si Hiram, iberrèken si Salomo mo gennep tahun bai si Hiram tellu ratus duapuluh dua ribu lima ratus kilo berras dekket empat ribu empat ratus sellup minak zaitun asli.

¹²Ipahèi JAHOWA ngo padanNa merèken kepantasen bai si Salomo. Mendè ngo persaoren si Hiram dekket si Salomo, janah enggo irakut padan kalak i sidua.

¹³Nai ibaing si Salomo mo tellupuluh ribu kalak daholi i suberri Israel nai lako merrodi,

¹⁴janah ipebangkit mo si Adoniram mandur kalak i. Ibagi si Salomo mo kalak i gabè tellu nuhnuhen, gennep nuhnuhen sipuluh ribu kalak. Mergèlèren mo sitellu nuhnuhen i, sibulan i Libanon janah dua bulan i bages.

¹⁵Ibaing si Salomo ma ngo ualuhpuluh ribu kalak mendakdak batu i delleng nai, janah pitupuluh ribu kalak menaruhi batu i.

¹⁶Ipebangkit nola dèng ma ngo tellu ribu tellu ratus kalak mandur simemperdimata ulaen i.

¹⁷Iperèntahken dèng ma ngo asa idakdak kalak i batu-batu mbellen merandal mahan dangaen Bages JAHOWA.

¹⁸Bagi mo carana pengula si Salomo dekket pengula si Hiram bak kalak i kuta Gebal nai menghantari batu dekket kayu lako memahan Bages JAHOWA.