Read Batak Dairi 1 Raja-raja 6 Bible Online

1 Raja-raja 6 - Batak Dairi bible

1 Raja-raja 6

¹Imulai si Salomo mo memajek Bages JAHOWA tupung bulan Ziw, imo bulan pe- duaken i tahun peempatken pemerèntahenna i, enggo kessa empat ratus ualuhpuluh tahun itadingken kalak Israel tanoh Mesir.

²Sibaren Bages JAHOWA i kan bagasen imo: Henjurna 27 mèter, bekkangna 9 mèter janah datesna 13,5 mèter.

³Kan lebbè Bages JAHOWA i lot ngo jorongna, henjurna 4,5 mèter janah bekkangna 9 mèter, dos mi bekkang bages i.

⁴Ipas dingding bages i lot ngo ibaing lubang-lubang jendèlana muat mbellangna mi bages.

⁵Merkeliling i podi bages i kan dingding ruar ibahan ma ngo bilik mertèngkat-tèngkat. Lot ngo tellu tengkatna datesna gennep 2,2 mèter.

⁶I tèngkat perlebbè bekkang gennep bilik 2,2 mèter. I tèngkat peduaken 2,7 mèter janah tèngkat petelluken 3,1 mèter. Ngkapalen ngo dingding kan terruh asa dingding kan dates, gabè ndorok mo ipedemmu balok bilik sitambah i dekket dingding Bages JAHOWA i, janah oda pella iruangi dingding i.

⁷Mahan balokna i kayu arès Libanon nai ngo ipakkè. Pèntu mbengket mi bilik tambahen sikettan terruh i kan selatan ngo. Janah lako mi tèngkat peduaken bak petelluken, lot ngo ardan merlekkuk-lekkuk. Nai ibaing si Salomo mo langit-langit bages i. Lako mahan i ibaing ngo mergulang-gulang dekket papanna kayu arès Libanon. Sidekkah mahan Bages i, laju ngo oda lot terdengkoh sora tokkok, kapak barang sora perkekkas bessi, kumarna enggo kin ngo idakdak batu i i bekkas pemuatenna nai. Bagi mo perpul pemahan si Salomo Bages JAHOWA i.

¹¹Nai idokken JAHOWA mo mbang si Salomo,

¹²“Mula iulaken kono karina pati-patin dekket perèntahKu, Kupesaut mo bamu karina sienggo Kupadanken taba bapamu si Daud.

¹³Merian i bages sinipajekmu èn mo aku, i tengah-tengah bangsangKu Israel. Oda kutadingken kalak i.”

¹⁴Bagèen mo pulna ibaing si Salomo majek Bages JAHOWA i;

¹⁵Karina dingding kan bagasen ilampis ngo dekket kayu arès Libanon, mulai i hatapna nai soh mi langit-langit. Hatapna sempènur ngo ibaing.

¹⁶Kan podi ibagasen bages i ibahan ngo bilik, isirang ngo i dekket dingding ipas sèmpènur nai, mulai i hatap nai soh mi langit-langit. Igerari ngo bilik i Bekkas simbadia kalohon; sibah mèter ngo geddangna.

¹⁷Bekkas kan lebbè Bilik Simbadia kalohon i igerari ngo Bekkas Mbellang, 18 mèter geddangna.

¹⁸Karina dingding kan bagasen bages i, ilampis ngo dekket kayu arès Libanon, gabè oda ngo lot teridah dingding batu i. Lampisna i iokir ngo perbuah tabu nggala dekket okir bunga kembang.

¹⁹Bekkas Simbadia kalohon sinibahan ibagasen Bages JAHOWA i ipèmaken mahan bekkas Pèti Perpadanen JAHOWA.

²⁰Ukum bekkas i dos ngo hunjurna, bekkangna dekket datesna imo sibah mèter. Langgaten sinilebbè bekkas simbadia kalohon i, kayu arès Libanon ngo perkayuna. I pèntu mbengket mi bekkas i ipekèsteng ngo rantè emmas. Karina kan bagasen Bages JAHOWA i dekket Bekkas Simbadia Kalohon bak langgaten i, ilampis ngo dekket emmas tulèn.

²³Ibagasen Bekkas Simbadia Kalohon i ibaing ma ngo gana-gana kerub ibahan ipas kayu zaitun nai. Duana gana-gana i 4,4 mèter ngo datesna gennep,

²⁴sibarenna dekket bentukna pè dos ngo. Terdua ngo kabengna, gennep kabeng 2,2 mèter ngo nggeddangna. Daoh pucuk kabeng kacimbang lambung gana-gana i 4,4 mèter.

²⁷Pegembar ngo duana gana-gana i ipecènder ibagasen Bekkas Simbadia Kalohon i, gabè tersada pucuk kabeng i dais mi dingding janah kabeng sisada nai mersidaisen i tengah-tengah bekkas i.

²⁸Duana gana-gana kerub i, ilampis ngo dekket emmas.

²⁹Karina dingding kan bagasen Bages JAHOWA i iokir ngo dekket okir kerub-kerub nèur dekket bunga-bunga ngkèrbang.

³⁰Hatap Bages JAHOWA i ilampis karina dekket emmas.

³¹Ipas pèntu mbengket mi bagasen bekkas simbadia kalohon i ibaing merpèntu dua ipas kayu zaitun nai. Tamparen pèntu i kan babo merlèkkuk ntajem kan tengahna.

³²Duana ngo pèntu i iokir dekket kerub nèur dekket bunga-bunga ngkèrbang. Pèntu, gana-gana kerub dekket okir nèur i, ilampis ngo karina dekket emmas.

³³I pèntu mbengket mi bagasen bekkas kan lebbè imo bekkas mbellang ibaing ngo sisi pèntuna ipas kayu zaitun nai merbentuk empat soki nggeddang.

³⁴Ibaing ma ngo merpèntu dua ipas kayu sempènur nai, duana ndorok ilempit.

³⁵Iokir ngo pèntu i dekket okir kerub, nèur dekket bunga ngkèrbang. Karina ngo okir i merlampis-lampis emmas.

³⁶I lebbè Bages JAHOWA i ibahan ngo èmpèr kan bages. Ikulilingi dingding batu merlampis ngo èmpèr i; i babo gennep tellu lampis batu, lot ngo selampis kayu arès Libanon.

³⁷Dangaen Bages JAHOWA i ibahan i bulan Ziw, imo bulan peduaken i tahun peempatken pemerèntahen si Salomo.

³⁸Janah i bulan Bul, imo bulan peualuhken i tahun pesebelasken pemerèntahena i, pul mo Bages JAHOWA i ibahan si Salomo, pas bagè sienggo irencanaken kin. Pitu tahun mo dekkahna memajek Bages JAHOWA i.