Read Batak Dairi 1 Raja-raja 7 Bible Online

1 Raja-raja 7 - Batak Dairi bible

1 Raja-raja 7

¹Ibahan si Salomo ma ngo istanana. Sipuluh tellu tahun ngo dekkahna memahan istana i.

²Ibas istana si Salomo i ibahan ngo tengahna mbellang janah igerari, “Tengah Tembak Libanon.” Sibarenna: 44 mèter henjurna, 22 mèter bekkangna, janah 13,5 mèter datesna. Balè i mertihang tellu mbaris ipas kayu arès Libanon nai; gennep mbaris lot ngo sipuluh lima tihang janah i babona ibakin gelli-gellina ibas kayu sempènur Libanon nai. Langit-langitna pè dos ngo kayuna janah menutupi gelli-gelli i.

⁴I dingding kan kambirang bak kamuhun èmpèr i ibaing ngo merjendèla; tellu mbaris ibas dingding sisada, pehadep dekket tellu mbaris dingding sisada nai. Bingkè pèntu pèntu dekket jendèlana i merbentuk merempat soki nggeddang.

⁶Ibahan si Salomo ma ngo, “Balè Mertihang.” Henjur balè i duapuluh dua mèter janah bekkangna sipuluh tellu sitengah mèter. I lebbè èmpèr i lot ngo turèna, mertihang bak merardan.

⁷Balè sidèban dèng ma imo, “Balè Tahta” igerari ma ngo Bak Kerungguen. Kerungguen èn ilampis ngo dekket kayu sempènur Libanon mulai i hatapna nai soh mi gelli-gellina. I èmpèr èn mo iputusken si Salomo perkara-perkara sinirungguken.

⁸Bekkas si Salomo merian ibahan ngo tosè bagè bages sidèbanna i, kan podi Èmpèr Kerungguen i. Bekkas sinibagesna berru Mesir i, ibahan si Salomo ma ngo dos rumangna dekket bagesna.

⁹Karina bages i soh mi kasèan mbellang mulai i dangaenna nai soh mi saongna, batu maharga ngo ibaing, idakdak i rambah nai janah enggo kin ngo ipenggelli mengèkutken sibarenna; kan bages dekket kan ruarna ipedos merkitè garagaji.

¹⁰Ukum dangaen bages i ipas batu-batu mbellen janah maharga nai ngo ibaing. Lot ngo dèba 3,5 mèter nggeddangna batu i, lot ma dèba 4 mèter.

¹¹I babona iampèken mo batu sidèban simaharga janah ipontong mengèkutken sibaren, nai itutup mo dekket sumban kayu arès Libanon.

¹²Dingding batu kasèan istana dekket dingding batu kasèan sinibagasen Bages JAHOWA, ibaing ngo silampis kayu arès Libanon i babo gennep tellu lampis batu.

¹³Lot mo sada kalak mergerar si Huram i kuta Tirus. Pandè kalohon ngo ia janah enggo mbuè pengalamenna meneppa mermatcam bagè perkekkas tembaga. Bapana arnia pè kalak Tirus ngo janah pandè ngo meneppa perkekkas tembaga. Inangna berru Naptali. Ipasulak Raja Salomo ngo kalak menga- lengi si Huram asa roh lako menguluken ka- rina peneppa perkekkas tembaga. Nai roh mo si Huram mengulaken karina sinidokken si Salomo.

¹⁵Iteppa si Huram mo dua binangun ipas suasah nai datesna 8 mèter ngo gennep binangun, lilitna 5.3 mèter janah ngkapalna 7,4 sèntimèter. Ruang ngo iabagasen binangun i.

¹⁶Iteppa ma ngo takal binangun sidua i ipas suasah nai 2,2 mèter datesna,

¹⁷bagè rumang bunga pancur 1,8 mèter datesna. I gennep takal binangun iteppa ma ngo terdua mbaris buah ndalima ipas suasah nai. Terdua ratus ngkabuah ndalima i gennep takal binangun i. Nai iteppa si Huram ma mo bayu rantè i suasah nai janah ibaing mo i mi babo binangun i. Pitu rantè mo i babo gennep binangun i, janah i babo rantè i ibahan dèng ma ngo sada alas cèngko. I babo alas cèngko i mo ibaing

²¹takal binangun merumang bunga pancur i. Ipajek mo binangun sidua i i lebbè pèntu mbengket mi Bages JAHOWA kacimbang lambung. Si kan selatan igerari Jaklin, si kan utara igerari Boas. Bagi mo si Huram merenggoi meneppa binangun i.

²³Enggo kessa i iteppa si Huram mo sada kancah cengko, sibarenna bagèen: Bagesna 2,2 mèter, garis tengahna 4,4 mèter janah lilitna 13,2 mèter.

²⁴Merkuliling bidingna kan ruar ihias ngo dekket dua mbaris buah tabu nggala, icor rebbak dekket kancah i.

²⁵Iampèken mo kancah i mi babo gurung sipuluh dua lembu suasah — tellu mendempak mi utara, tellu mi selatan, tellu mi kesunduten janah tellu mi kebincaren.

²⁶Ngkapal kancah i 75 millimèter. Bidingna dos mi biding mangkuk merlekkuk mi ruar bagè bunga pancur ngkèrbang. Siat-siat 40.000 sellup ngo kancah i.

²⁷Iteppa si Huram dèng ma ngo kurèta tembaga sipuluh, henjurna 1,8 mèter, bekkangna 1,8 mèter, datesna 1,3 mèter.

²⁸Ipas papan nai ngo ibahan kurèta i ibaing merbingkè.

²⁹Iokir ngo papan i nipersinga, niperlembu dekket niperkèrub. Ipas bingkèna — i babo dekket i terruh nipersinga bak niperlembu i — bagè igantung merokir bunga merbaris.

³⁰Gennep kurèta i empat ngo dalingna ipas tembaga nai, dekket poros daling i pè tembaga ngo. Ipas soki siempat karina kurèta i lot tiang ampèen sambung tembaga ibaing merbunga-bunga kan ruarna.

³¹Kan dates tihang penongkel i ibaing mersumban ngkibul mahan ampèen sambung i. Tihang-tihang penongkel i ibaing njojo 44 sèntimèter datesna i babo papan sagi i, janah 22 sèntimèter i terruhna. Tupung sabang sumban i lot ngo okir.

³²Dates daling-dalingna 66 sèntimèter, ibaing i terruh papan-papan i. Lekket ngo poros daling i mi kurèta i.

³³Ukum dalingna i tosè ngo bagè daling kurèta perang, daling, jari-jari, poros dekket takal jari-jari dalingna karina tembaga ngo.

³⁴Lot ngo empat tihang penongkel i gennep soki i terruh kurèta i. Lekket ngo penongkel i dekket kurèta i.

³⁵I sikuliling kan babo kurèta i lot ma ngo bidingna duapuluh dua sèntimèter belangna. Tihang penongkel dekket papan-papanna lekket ngo mi kurèta i.

³⁶Tihang penongkel dekket papan-papan i iokir ngo niperkèrub, nipersinga, dekket batang nèur, tupung kan dikè lot numar, bak bunga merkènter merkuliling.

³⁷Bagi mo rumang kurèta-kurèta i iteppa. Karinana dos ngo — rumang bak sibarenna.

³⁸Iteppa si Huram ma ngo sipuluh sambung mbelgah, tersada gennep kurèta. Karina sambung i mergaris tengah 1,8 mèter janah siatna 800 sellup laè.

³⁹Ibaing si Huram mo kurèta i lima kan selatan Bages JAHOWA i janah lima kan utara. Ukum kancah tembaga i ibaing ngo kan tènggara.

⁴⁰Iteppa si Huram dèng ma ngo saruam-saruam, tellam-tellam, dekket mangkuk-mangkuk. Enggo kessa i pul mo karina ulanna bai Raja Salomo lako mahan Bages JAHOWA. Enda mo perkekkas sienggo iteppa: Dua binangun Dua takal binangun bagè rumang mangkuk ibaing i babo binangun i Bayu rantè i gennep punca babo binangun i Empat ratus ndalima suasah isusun dua mbaris sikuliling kayu rantè i gennep punca babo binangun i Sipuluh kurèta Sipuluh sambung mbellang Kancah suasah Dua bellas lembu suasah menongkel kancah i Saruam-saruam, tellam-tellam dekket mangkuk-mangkuk. Karina perkekkas sini Bages JAHOWA i, siniteppa si Huram bai si Salomo ipas suasah nai ngo, nai igosok mo i asa merkillok.

⁴⁶Idokken raja i ngo iteppa perkekkas i i perpandèen i kellang-kellang Sukot dekket Sartan i Napa Jordan.

⁴⁷Oda ngo idokken si Salomo itimbang perkekkas i, ai enggo lahlah kalohon buèna. Asa oda terbettoh sadikè botong perkekkas i.

⁴⁸Idokken si Salomo ma ngo meneppa perkekkas sidèban i emmas nai lako mi Bages JAHOWA. En mo perkekkas sinibahanna idi: Langgaten Mèja bekkas roti ipèlèken bai Dèbata Sipuluh nèhè pelita ibaing i lebbè Bekkas Simbadia Kalohon, imo lima kan selatan, lima kan utara Bunga-bunga Pelita-pelita Gappit-gappit Mangkuk-mangkuk Pengènteppi pelita Mangkuk-mangkuk Pahar-pahar bekkas dahupa Pahar-pahar bekkas rara Encèl-èncèl pèntu Bekkas Simbadia Kalohon dekket pèntu kan ruar Bages JAHOWA.

⁵¹Enggo kessa pul ibahan si Salomo Bages JAHOWA i, ipennep mo mi gudang-gudang bages i karina pirak, emmas, dekket sidèbanna dèng sienggo ipèlèken bapana si Daud bai JAHOWA.