Read Batak Dairi 2 Raja-raja 10 Bible Online

2 Raja-raja 10 - Batak Dairi bible

2 Raja-raja 10

¹Lot ngo pitupuluh kalak dukak bak kempu raja Ahab i kuta Samaria. Kumarna i itengesken si Jehu mo surat mi Samaria, mendahi wali dukak bak kempuna dekket mendahi penguasa, pengetua-pengetuai silot i kuta i. Bagèen mo kata surat i,

²“I tengah-tengah ndènè ngo dukak dekket kempu si Ahab, janah lot ngo kurèta perang ndènè, bang kuda, sinjata dekket kuta gotting. Kumarna i, soh kessa taba kènè surat èn,

³mèter pilih kènè mo sisellohna i pemparen si Ahab i nai, janah pebangkit kènè mo ia gabè raja, nai juhap mo kè membèlasa.”

⁴Gabè mbiar mo penguasa-penguasa Samaria. Idokken kalak i mo, “Salang Raja Joram dekket Raja Ahazia oda teralosa si Jehu, makinsa nola mo kita!”

⁵Kumarna i itenges èkuten istana dekket wali kuta rebbak dekket pengetua-pengetuai bak wali pemparen si Ahab i mo berita èn taba si Jehu, “Patu ngo kami bai ndènè janah uè ngo kami mengulaken barang kadè sambing iperèntahken kènè bai nami. Oda lot barang isè kupebangkit kami gabè raja. Baing kènè mo kadè selloh dok atè ndènè.”

⁶Nai itengesken si Jehu nola mo surat taba kalak i, katana, “Mula kan aku ngo kènè janah uè mengèkuti perèntah-perèntahku, bunuh kènè mo pemparen si Ahab i, janah baremben tupung bagèen ari, taruhken kènè mo takal-takal kalak i taba aku mi Jizreel.” Sipitupuluh pemparen si Ahab i rebbak pengetua-pengetuai kuta Samaria ngo janah kalak i ngo pehèdu-hèduken.

⁷Enggo kessa ijalo kalak i surat si Jehu i, mèter ibunuh pengetua-pengetuai i mo pemparen si Ahab sipitupuluh kalak i, nai irurui kalak i mo takal kalak i mi bagasen kirang janah itengesken taba si Jehu i Jizreel.

⁸Ibagahken kessa i taba si Jehu, iperèntahken mo asa ipegukguk takal-takal i gabè dua nggukguken i pèntu pengkeruhen kuta i, janah ibelli i si soh mi ceggen siberembenkenna.

⁹Njengkas ceggenna i, roh mo si Jehu mi pèntu pengkeruhen i, idokken mo taba kalak sipulung nisidi, “Aku ngo mertaki mengalo Raja Joram dekket memunuhsa; ukum kènè oda lot mersalah tersèngèt i. Tapi karina kalak èn, oda ngo aku memunuh.

¹⁰En mo buktina kennah saut ngo karina sienggo idokken JAHOWA tersèngèt pemparen si Ahab. Enggo ipesaut JAHOWA sinidokkenna merkitè naposoNa si Elia.”

¹¹Enggo kessa i ibunuh si Jehu nola mo karina kadè-kadè si Ahab sidèbanna i dèng silot i Jizreel, dekket karina pugabè, alè-alè dekket imam-imamna; sada kalak poda ibelli nggelluh.

¹²Laus mo si Jehu i Jizreel nai mi Samaria. I tengah ndalan i bekkas simergerar “Kuta Permakan,”

¹³pesimbak mo ia dekket kaka-anggi si Ahazia raja Juda. Nai ikusoi mo, “Isè ngo kènè?” “Kaka-anggi si Ahazia ngo kami,” nina kalak i mengaloi. “Naing laus mi Jizreel ngo kami mendahi karina kadè-kadè dekket dukak bak kempu si Izebel.”

¹⁴“Tangkup mo kalak i gelluh-gelluhen,” nina si Jehu taba parangenna. Nai itangkupi mo kalak i, janah ibunuh i gembar sada telaga ngkerrah, empatpuluh dua kalak buèna. Sada poda ibelli nggeluh.

¹⁵Iterrusken si Jehu mo perdalanenna. I tengah ndalan isimbak-simbak si Jonadab anak si Rekhab mo ia. Nai isalam si Jehu mo ia ninganna idokken, “Otang sada ukur ngo kita? Uè ngo ko mengurupi aku?” “Uè ngo aku,” nina si Jonadab mengaloi. “Mula bagi ngo, mersijalapen tangan mo kita,” nina si Jehu. Nai pejalap tangan mo kalak i, janah iteggu si Jehu mo si Jonadab mi kurètana, ninganna idokken,

¹⁶“Ita mo dekket mo ko, asa idah kono, bakunè kubaing lako bai JAHOWA.” Nai rebbak merkurèta mo kalak i mi Samaria.

¹⁷Soh kessa mi si, mèter ibunuhi si Jehu mo karina kadè-kadè si Ahab, sada kalak poda lot tading. Masa karinana i tosè bagè sinidokken JAHOWA taba si Elia.

¹⁸Idokken si Jehu mo merpulung karina pengisi Samaria, nai nina mo, “Ukum Raja Ahab kurang ngkasah dèng ngo ia menguèi Baal, tapi ukum aku naing lebbih ngkasah ngo bana nai.

¹⁹Kumarna i pepulung kènè mo karina nabi Baal dekket simersembah tabasa bak imam-imamna pè; isè poda lot kalihna. Ai naing memèlèken pèlèen mertuhu-tuhu ngo aku bai Baal. Barang isè oda roh kennah ihukum matè.” Tapi pellin sada akkal si Jehu ngo i asa ibunuh karina kalak simersembah taba Baal.

²⁰Nai iperèntahken si Jehu mo, “Titi kènè mo sada ari merkemeddu lako menembah Baal!” Nai ititi kalak i mo arina,

²¹janah itingtingken si Jehu mo i mi suberri Israel. Tupung ari i merrohen mo karina kalak simenembah Baal, janah sada poda lot tading. Ibengketti kalak i mo rumah Baal, gabè pelpel mo rumah i i lebbè nai soh mi podi.

²²Iperèntahken si Jehu ngo taba nasa pengurus simemennep oles lako pakkèen memèlè i bekkas pemèlèen i asa iberèken pakèen-pakèen idi bai karina kalak siroh lako mersembah Baal. Kessa ibahanken perèntah i,

²³ibengketti si Jehu dekket si Jonadab anak si Rekhab mo rumah i, janah mendokken taba jelma silot i si. “Perèso kènè mo seppè tah pellin kalak simersembah Baal ma ngo kessa sipulung èn. Ulang lot i sèn kalak simenembah taba JAHOWA.”

²⁴Nai ipèlèken si Jehu dekket si Jonadab mo pèlèen taba Baal. I ruar rumah i enggo ipèmaken si Jehu ualuhpuluh kalak pertaram dekket lubalang. Enggo ma ngo iperèntahken kin taba kalak i bagèen, “Kennah bunuh kènè karina kalak i. Barang isè memelli sada kalak pè mperrus bai kalak i nai, kennah bunuhen.”

²⁵Enggo kessa ipèlèken si Jehu pèlèen, karuar mo ia janah idokken mo taba pertaram bak lubalang-lubalang i, “Masuk mo kènè, bunuhi kènè mo kalak i karina. Sada kalak pè ulang lot maluah.” Nai masuk mo kalak i mergolok mberkat, ibunuhi kalak i mo karina sini sidi, nai isaran mo karina bangkè i mi ruar. Nai ibengketti kalak i nola mo mi perbagasen rumah i,

²⁶ikaruarken kalak i mo gana-gana Baal i, nai itutung mo.

²⁷Icèdaken mo gana-gana i rebbak dekket rumahna, gabè bekkas mengambongken laè niènum mo bekkas i ibaing soh sidari èn.

²⁸Bagi mo ibaing si Jehu mengkeriken penembahen Baal i Israel.

²⁹Kemulihken i bagèen mo idokken JAHOWA taba si Jehu, “Karina sikuperèntahken enggo mo iulaken ko taba pemparen si Ahab. Kumarna i Kujandiken mo, gabè raja Israel mo pemparenmu soh mi cundut peempatken.” Tapi oda ngo karina pusuh peratèen si Jehu mengulaken perèntah JAHOWA, Dèbata kalak Israel. Ièkutken nola ngo ulah-ulah si Jerobeam memaing gabè merdosa kalak Israel merkitè menembah lembu emmas sinipecènderna i Betel dekket Dan.

³²Tikanna i makin ipersempit JAHOWA mo nagerri Israel. Itaban si Hazael raja Siria mo karina jahjahen Israel,

³³sikan kebincaren Laè Jordan soh mi selatan mi kuta Aroër ndessing mi Laè Arnon, termasuk nagerri Gilead dekket Basan, bekkas marga Gad, Ruben dekket Manasye kebincaren.

³⁴Sukuten sidèbanna tersèngèt si Jehu bak jasa kelubalangenna isurat ngo i ibas bukku Tori-torien Raja-raja Israel.

³⁵Duapuluh ualuh tahun mo si Jehu memerèntah Israel. Matè mo ia janah ikubur i Samaria. Nai si Joahas anakna i mo mbangkit raja gancihna.