Read Batak Dairi 2 Raja-raja 11 Bible Online

2 Raja-raja 11 - Batak Dairi bible

2 Raja-raja 11

¹Ibettoh si Atalya kessa mo enggo matè keppèken anakna Raja Ahazia, iperèntahken mo asa ibunuh karina sisimpangaen si Ahazia.

²Si Joas anak si Ahazia pè enggo iembis ibunuh rebbakken dekket dukak-dukak raja sidèbanna i dèng, tapi maluah ngo ia ibaing si Joseba namberruna. Iboniken mo si Joas dekket pendèdahna mi sada bilik pedemmen i Bages JAHOWA.

³Ennem tahun dekkahna ipehèdu-hèdu si Joseba ia ibagasen Bages JAHOWA i tikan si Atalya memerèntah gabè raja daberru.

⁴I tahun pepituken idiloi imam Joyada mo lubalang-lubalang dekket pertaram istana dekket pertaram raja daberru i asa merarih dekketsa i Bages JAHOWA. Ipesumpah ngo kalak i karina i si, lako mengulaken rencanana. Ipacidah mo si Joas anak Raja Ahazia taba kalak i,

⁵janah iperèntahken mo, “Mula mertaram kènè tupung ari Sabat, sipertellu bai ndènè nai kennah mertaram i istana,

⁶sipertellu nai i pèntu Pengkeruhen Sur, janah lebbihna i i pèntu pengkeruhen i podi pertaram-pertaram sidèban i.

⁷Sidua nuhnuhen siso mertaram tupung ari Sabat, kennah mertaram mo i Bages JAHOWA, merpeddang mberkat lako menjaga Raja Joas. Kennah dak jaga kè mo ia barang mikè pè laus, janah gennep kalak sinaing mendessingi kènè, kennah bunuh kènè.”

⁹Iuèi lubalang-lubalang i ngo pendokken si Joyada i janah iarahken mo mendahisa parangen kalak i sikennah mertaram dekket siso mertaram tupung ari Sabat i.

¹⁰Iberèken si Joyada mo taba lubalang-lubalang i kujur bak tambeng-tambeng Raja Daud sinipennep i Bages JAHOWA.

¹¹Nai karina pertaram, merpeddang mberkat, mersibuat bekkasna merkuliling kan lebbè Bages JAHOWA lako menjaga raja i.

¹²Enggo kessa bagi, iarahken si Joyada mo si Joas mi ruar, nai ibaing mo rudang mi babontakalna, janah iberèken bana bukku Pati-patien Dèbata. Nai iminaki mo si Joas gabè raja, janah itingtingken mo i taba ginemgem. Nai karinana mo mertopap tangan janah mengoangken bak menurakken, “Njuah-njuah mo raja i!”

¹³Idengkoh si Atalya ngo oang-oang pertaram dekket jelma nterrem i. Isudu mo laus mi Bages JAHOWA mendahi jelma nterrem simertumpu i.

¹⁴Idah ia ma mo raja rembaru ipebangkit i cènder i pèntu mbengket mi Bages JAHOWA bekkasna iminaki i, icingkoi lubalang-lubalang dekket simenempul sarunè. Karina jelma nterrem meroang-oang ninganna ipersora sarunè. Ibagasen nggettem ukurna iribak si Atalya mo olesna ninganna idiloken, “Selbuh! Selbuh!”

¹⁵Oda ngo ipadiat si Joyada ibunuh si Atalya i gembar Bages JAHOWA, gabè idokken mo taba lubalang-lubalang i, “Iring mo ia arap barisen pertaram, janah bunuh kènè mo barang isè sambing sinaing paluahkensa.”

¹⁶Itangkup kalak i mo ia janah iiring mi istana. Ibunuh mo ia isidi i lebbè pèntu Pengkeruhen Kuda.

¹⁷Idokken imam Joyada mo Raja Joas dekket ginemgem memaing padan dekket JAHOWA, magahken kennah gabè ummat JAHOWA kalak i. Idokken ma ngo asa merpadan raja i dekket ginemgem.

¹⁸Enggo kessa i mèter irumpakken jelma nterrem i mo rumah Baal. Ireppuk mo langgaten bak gana-gana, ibunuh mo si Matan imam Baal i lebbè langgaten-langgaten i. Idokken si Joyada ma mo pertaram asa ijaga Bages JAHOWA i,

¹⁹nai rebbakken mo ia dekket lubalang-lubalang, pertaram raja dekket pertaram istana dekket karina jelma nterrem mengarak Raja Joas i Bages JAHOWA nai mi istana.

²⁰Mbengket mo si Joas arap pèntu pertaramen, nai kundul mo ia i babo tahta. Lolo ngo atè karina ginemgem, mènak mo bang kuta i pè janah si Atalya enggo ibunuh.

²¹Merumur pitu tahun mo si Joas tikan mbangkit ia gabè raja Juda.