Read Batak Dairi 2 Raja-raja 12 Bible Online

2 Raja-raja 12 - Batak Dairi bible

2 Raja-raja 12

¹I tahun pepituken pemerèntahen si Jehu i Israel, mbangkit raja mo si Joas i Juda. Empatpuluh tahun dekkahna ia memerèntah i Jerusalem. Inangna mergerar si Zibya i kuta Bersyeba nai.

²Kemulihken pengajarien Imam Joyada, sipesampangken atè JAHOWA ngo iulaken si Joas sidekkah nggelluhna.

³Kurangna imo, oda irumpakken bekkas mersembah taba sembahen, gabè tong dèng ngo jelma nterrem i mèlèken pèlèen dekket merdahupa i si.

⁴Tikan sidari idilo si Joas mo imam-imam janah idokken taba kalak i asa ipennep riar sidapet ipas pèlèen i Bages JAHOWA nai, tah pè i riar gugu mahanken pèlèen bang riar pemerèken ndèba.

⁵Gennep imam kennah mempertanggung jababken riar sinipèlèken jelma sinikebasenna. Naing ibaing ngo riar i lako pekadèken sincèdana i Bages JAHOWA.

⁶Soh mi peduapuluh tellu tahunken pemerèntahen si Joas, madèng ngo ipelias imam-imam sincèda i Bages JAHOWA i.

⁷Kumarna i idilo si Joas mo Imam Joyada dekket imam-imam sidèbanna i, nina mo, “Kasa oda ipelias kènè dèng Bages JAHOWA i? Mulai sidari èn oda nè ndorok kènè memennep riar sinijalo ndènè. Kennah sohken kènè karina lako peliasken Bages JAHOWA.”

⁸Setuju ngo imam-imam i asa ulang ipepulung riar bai ginemgem nai, janah oda ma mertanggung jabab lako peliasken Bages JAHOWA.

⁹Ibahan si Joyada mo sada pèti-pèti, janah ibaing merlubang kan babona, nai igamparken mo mi gembar langgaten kan kamuhun pèntu mbengket mi Bages JAHOWA. Karina kèpèng sinipèlèken i Bages JAHOWA imasukken imam-imam simengula i pèntu mbengket i mo mi bagasen pèti i.

¹⁰Enggo kessa mbuè kèpèng ibas pèti i roh mo penurat raja dekket Imam Huntuen lako memilang kèpèng i, nai mèter ibalut mo.

¹¹Enggo kessa isurat sadikè buèna ipesakat mo kèpèng i taba mandur sipeliasken Bages JAHOWA i. Nai igararken mandur i mo taba tukkang kayu, tukkang sapo,

¹²tukkang batu dekket pemahat batu. Mandur i ma ngo menokor kayu dekket batu dekket mengatur karina peremasen lako pelisaken i.

¹³Tapi cituk poda lot ipakkè kèpèng i lako memahan mangkuk-mangkuk pirak, mangkuk perènumen, sarunè, pelita barang pè pekekkas sidèbanna i emmas barang ipas pirak nai.

¹⁴Karina igararken taba tukkang-tukkang dekket itokorken mi perkayu siniperluken.

¹⁵Bujur kalohon ngo mandur-mandur i jadi oda pella ipido lapuren perkèpèngen bai kalak i nai.

¹⁶Ukum kèpèng gancih keperluen mi pèlèen dekket kesasaen dosa oda ipemasuk mi bagasen pèti i. Bai imam-imam ngo i iberèken.

¹⁷Tikanna i ijuhap janah itaban si Hazael raja Siria ngo kuta Gat, lot ma ngo sura-surana lako menjuhap Jerusalem.

¹⁸Nai itengesken si Joas mo kèpèng pertebbus tabasa. Ibuat si Joas ngo kèpèng i ipas karina pèlèen sienggo ipèlèken taba JAHOWA, bagi ma pè sienggo ipesakat si Josafat, si Joram dekket si Ahazia, imo raja-raja simemerèntah i lebbèenkenna. Bagi ma karina emmas ipas kas Bages JAHOWA bak i istana raja nai. Nai oda nè mo saut ikubu si Hazael kuta Jerusalem.

¹⁹Nai mertaki mo pugabè-pugabè kerajaen lako mengalo Raja Joas. Dua kalak bai kalak i nai, imo si Jozakar anak si Simeat dekket si Jozabad anak si Somer memunuh si Joas ibas sada bages sinipajek i dates tanoh tèmbun kan kebincaren Jerusalem i dalan pengencuahen mi Sila. Ikubur mo si Joas i perkuburen raja-raja i Kuta si Daud. Anakna si Amazia mo mbangkit raja gancihna. Sukuten sidèbanna i tersèngèt Raja Joas isurat ngo ibas bukku Tori-torien Raja-raja Juda.