Read Batak Dairi 2 Raja-raja 13 Bible Online

2 Raja-raja 13 - Batak Dairi bible

2 Raja-raja 13

¹Peduapuluh tellu tahunken pemerèntahen si Joas anak si Ahazia i Juda, mbangkit raja mo si Joahas anak si Jehu i Israel, janah sipuluh pitu tahun mo dekkahna ia memerèntah i Samaria.

²Tosè bagè Raja Jerobeam simemerèntah i lebbèenkenna, merdosa ngo si Joahas taba JAHOWA, memaing kalak Israel pè gabè merdosa ma. Oda nung itadingken pengelakona jahat i.

³Kumara i melaga mo JAHOWA taba kalak Israel, gabè ibelli mo ngkatep si Hazael raja Siria dekket anakna si Benhadad mena- luken Israel.

⁴Nai mersodip mo si Joahas taba JAHOWA, janah idengkohken JAHOWA ngo sodipna i, kumarna idah JAHOWA enggo sondel kejamna raja Siria mendersa kalak Israel.

⁵Iberèken JAHOWA mo sada kalak simenguluken kalak Israel lako paluahken kalak i ipas kuasa kalak Siria nai, gabè mènak mo mengolihi pernggelluh kalak i bagè dekah ari.

⁶Tukasi pè bagidi oda mentadi kalak Israel mengulaken dosa sinitebenaen Raja Jerobeam. Dakdak ngo iulaken kalak i dosa-dosa i, janah ibelli ngo tong lot gana-gana Asyera i Samaria.

⁷Enggo kerri soridadu Israel ibaing raja Siria, pellin limapuluh kalak nai ngo kessa tenterra merkuda Raja Joahas, sipuluh kurèta perang, janah sipuluh ribu soridadu.

⁸Sukuten sidèbanna tersèngèt raja Joahas dekket karina jasa kelubalangenna enggo isurat ibas bukku Tori-torien Raja-raja Israel.

⁹Matè mo ia janah ikubur i Samaria. Anakna si Joas mo mbangkit raja gabè singkatna.

¹⁰Petellupuluh pitu tahunken pemerèntahen si Joas i Juda, mbangkit mo si Joas anak si Joahas gabè raja Israel janah i Samaria ngo ia memerèntah sipuluh ennem tahun dekkahna.

¹¹Ia pè merdosa ngo bai JAHOWA kumarna ièkutken ngo kejahaten Raja Jerobeam sienggo memaing kalak Israel mengulaken dosa.

¹²Sukuten sidèbanna i tersèngèt si Joas dekket kelubalangenna tupung geraha mengalo si Amazia raja Juda, isurat ngo i ibas bukku Tori-torien Raja-raja Israel.

¹³Matè mo si Joas janah ikubur i perkuburen raja-raja i Samaria. Anakna si Jerobeam II mo mbangkit raja gencihna.

¹⁴Tikan sikali cioen mo si Elisa mpiah kalohon. Nai roh mo Raja Joas menongkirsa. Idah kessa mo enggo naing-naing matè si Elisa, tangis mo raja i, idokken mo katana, “Ialè Bapangku, Bapangku kono ngo simembèla kalak Israel.”

¹⁵“Buat mo baor dekket anak panahmu!” nina si Elisa tabasa. Nai ibuat si Joas mo,

¹⁶nai idokken si Elisa mo asa ikebbasi lako memanah. Ikebbasi raja i mo, nai iampèken si Elisa mo tanganna mi babo tangan raja i.

¹⁷Nai ibuka raja i mo pèntu jendèla simendempak Siria tosè bagè perèntah nabi i. “Tèmbakken mo panahmu!” nina si Elisa. Enggo kessa itèmbakken raja i panahna mèter idokken nabi i mo, “Kono ngo panah JAHOWA. Merkitè panah i italuken JAHOWA mo Siria. Ialo kono mo mergeraha kalak Siria i Afek, janah italuken kono ngo kalak i.”

¹⁸Nai idokken si Elisa mo ibuat si Joas panahna sidèban janah ipaluken mi tanoh. Ipalu raja i mo tellu kali mi tanoh i, nai mentadi.

¹⁹Melaga mo si Elisa, nina mo, “Ukum ipaluken kono kin nemmu lima barang ennem kali, nai ndorok kin mo ilala kono kalak Siria. Tapi bagèndari pellin tellu kali ngo kessa italuken kono kalak i.”

²⁰Oda pella ndekkah nèngè matè mo si Elisa janah ikubur. Tikala i dak roh ngo nuhnuhen kalak Moab sikali sitahun lako menjuhap kalak Israel.

²¹Tikan sikali tupung lot jelma mengkubur simatè sintempu idah kalak i mo roh nuhnuhen Moab. Nai mèter bagi mo iambongken kalak i mayat i mi kuburen si Elisa, nai mperrus mo. Dais kessa mo bangkè i mi tulan-tulan si Elisa, mèter balik nggelluh mo bangkè i janah cènder.

²²Sidekkah pemerèntahen si Joas, itendes si Hazael raja Siria ngo kalak Israel.

²³Tapi masèh mo atè JAHOWA midah bangsaNa i gabè iampuni mo kalak i. Oda ngo ibelli soh tumpat kalak i, tapi iurupi ngo kalak i, kumarna padanNa dekket si Abraham, si Isak dekket si Jakob. Ai soh bagèndari oda nung ilupaken bangsaNa i.

²⁴Nai matè mo si Hazael raja Siria, gabè anakna si Benhadad mo gabè raja.

²⁵Nai italuken si Joas raja Israel mo si Benhadad tellu kali, janah mulak mo karina kuta sinitaban si Benhadad tikan pemerèntahen Raja Joahas bapa si Joas.