Read Batak Dairi 2 Raja-raja 14 Bible Online

2 Raja-raja 14 - Batak Dairi bible

2 Raja-raja 14

¹Pedua tahunken pemerèntahen si Joas anak si Joahas i Israel mbangkit raja mo si Amazia anak si Joas i Juda.

²Merumur duapuluh lima tahun mo ia tikanna i, janah duapuluh sibah tahun dekkahna ia memerèntah i Jerusalem. Inangna imo si Joadan i Jerusalem nai.

³Pesennangken atè JAHOWA ngo iulaken si Amazia, tapi oda bagè si Daud empungna i ia. Bagè bapana,

⁴oda ngo irum- pakken bekkas mersembah taba dèbata sidèban, gabè dak tong dèng ngo jelma nterrem i memèlèken dekket merdahupa i si.

⁵Enggo kessa ntegguh kuasana, mèter ihukum matè si Amazia mo pugabè-pugabè simemunuh bapana.

⁶Tapi ukum dukak-dukak pugabè-pugabè i oda ngo ibunuh, kumarna iuèi ngo perèntah JAHOWA silot ibas Bukku si Musa simendokken, “Ulang hukum matè partuana, kumarnaken kejahaten siniulaken dukak-dukakna, janah ulang hukum matè dukak-dukakna kemulihken kejahaten siniulaken partuana. Pellin kemulihken kejahaten jelma i sendiri ngo ndorok ia ihukum matè.”

⁷Tikan i sada geraha, ibunuh si Amazia ngo 10.000 kalak Edom i Lembeng Masin, janah itaban mo kuta Sela. Ibaing mo gerar kuta i Jokteel. Soh bagèndari mergerar Jokteel dèng ngo kuta i.

⁸Enggo kessa i ipasulak si Amazia mo suruhenna mendahi si Joas raja Israel lako mengasangisa mergeraha.

⁹Tapi itengesken Raja Joas mo pengaloina bagèen, “Tikan sikali itennahken tada-tada sinidelleng Libanon mo berita èn taba kayu sempènur, ‘Alè kayu sempènur, berrèken mo berrumi bai anakku gabè sinibagesna.’ Tapi enggo kessa i mentas mo i si sada binatang rambah idedohi mo tada-tada i.

¹⁰Enggo gabè sombong ko alè Amazia kumarna enggo italuken ko kalak Edom. Otang enggo mo nemmu cukup kemenangen i? Sellohen mo i bages sambing kono merian! Man kadè mo mencari-cari persoalen, pellin mengerogiken dirimu dekket ginemgemmu?”

¹¹Tapi oda isarihken si Amazia raja Juda rana si Joas raja Israel. Kumarna i berkat mo Raja Joas dekket parangenna mi Bet-Semes i Juda, janah mergeraha dekket si Amazia i si.

¹²Italuken mo soridadu Juda, janah karina balapergunggungna mperrus mi bagesna gennep.

¹³Itangkup si Joas mo si Amazia, nai laus mo ia mi Jerusalem, irumpakken mo dingding batu kuta i kira-kira dua ratus mèter geddangna, mulai i Pèntu Pengkeruhen Efraim nai soh mi Pèntu Pengkeruhen Soki.

¹⁴Karina emmas dekket pirak dekket karina perkekkas silot i Bages JAHOWA bak karina harta i istana dekket jelma tabanen, iembah si Joas mo mi Samaria.

¹⁵Sukuten sidèbanna tersèngèt si Joas bak kelubalangenna mengalo si Amazia raja Juda isurat ngo ibas bukku Tori-torien Raja-raja Israel.

¹⁶Matè mo si Joas janah ikubur i perkuburen raja-raja i Samaria. Anakna si Jerobeam II mo gabè raja gancihna.

¹⁷Enggo kessa matè si Joas raja Israel, nggelluh dèng ngo si Amazia raja Juda lima bellas tahun nai.

¹⁸Lot mo pulungen mertaki naing memunuh si Amazia i Jerusalem. Kumarna i mperrus mo ia mi Lakhis, tapi iletlet musuh-musuhna ngo ia mi si janah ibunuh mo ia. Ikudaken mo bangkèna mi Jerusalem, nai ikubur mo mi pekuburen raja-raja i Kuta si Daud. Nai iminaki kalak Juda mo anakna si Uzia gabè raja kalak i. Merumur ennem belas tahun dèng ngo si Uzia tikanna i. Sukuten sidèbanna tersèngèt Raja Amazia isurat ngo ibas Bukku Tori-torien Raja-raja Juda.

²²Enggo kessa matè bapana i, irampasi si Uzia mo balik kuta Elat janah ipekadè nola mengolihi.

²³I tahun pelima belasken pemerèntahen si Amazia anak si Joas i Juda mbangkit raja mo si Jerobeam II anak si Joas i Israel janah memerèntah i Samaria 41 tahun dekkahna.

²⁴Merdosa ngo ia taba JAHOWA kumarna ièkutken kejahaten Raja Jerobeam I simemaing merdosa kalak Israel.

²⁵Si Jerobeam II èn mo mengerampasi balik karina nagerri Israel, mulai i dalan mi Hamat nai i Utara soh mi Laut Matè i selatan. Karina i tosè mi sienggo idokken JAHOWA Dèbata Israel merkitè naposoNa Nabi Jona anak si Amitai kalak Gat-Hefer.

²⁶Idah JAHOWA ngo bakunè ndersana kalak Israel i, janah isè poda lot giam mengurupi kalak i.

²⁷Ai oda mo lot sura-sura JAHOWA petumpatken kalak Israel soh mi amman sumendah kumarna i iurupi ngo kalak i merkitè Raja Jerobeam II.

²⁸Sukuten sidèbanna tersèngèt si Jerobeam II dekket kelubalangenna mergeraha dekket bakunè carana menaban nola Damaskus dekket Hamat i Judea lako bai Israel enggo isuratken karina ibas bukku Tori-torien Raja-raja Israel.

²⁹Matè mo si Jerobeam II janah ikubur i pekuburen raja-raja. Anakna si Zakharia mo mbangkit raja menggancihisa.