Read Batak Dairi 2 Raja-raja 15 Bible Online

2 Raja-raja 15 - Batak Dairi bible

2 Raja-raja 15

¹Peduapuluh pitu tahunken pemerèn- tahen Raja Jerobeam II i Israel mbang- kit raja Juda mo si Uzia anak si Amazia.

²Merumur sipuluh ennem tahun mo ia tikala i janah limapuluh dua tahun mo dekkahna ia memerèntah i Jerusalem. Inangna mergerar si Jekholya berru Jerusalem.

³Tosè bagè bapana, si Uzia pè mengulaken sipesennangken atè JAHOWA ngo.

⁴Tapi kurangna imo, oda irumpakken bekkas-bekkas mersembah taba sembahen, gabè tong dèng ngo jelma nterrem i melèken pèlèen dekket merdahupa i si.

⁵Ibaing JAHOWA mo ia mersakit gadamen, janah soh matè ia laju ngo oda malum sakitna i. Ibaing mo bekkasna ibas sada sapo mpunjung janah ibèbasken ipas ulanna nai. Anakna si Jotam mo wakilna memerèntah.

⁶Sukuten sidèbanna i tersèngèt si Uzia isurat ngo ibas bukku Tori-torien Raja-raja Juda.

⁷Matè mo si Uzia janah ikubur i pekuburen raja-raja i Kuta si Daud. Anakna si Jotam mo mbangkit raja singkatna.

⁸Petellupuluh tahunken pemerèntahen si Uzia i Juda mbangkit raja mo si Zakharia anak si Jerobeam II i Israel janah ennem bulan mo dekkahna ia memerèntah i Samaria.

⁹Tosè bagè raja-raja simemerèntah lebbènkenna, ia pè merdosa ngo taba JAHOWA. Ièkutken ngo kejahaten Raja Jerobeam I simemaing Israel merdosa.

¹⁰Mertuptup mo si Salum anak si Jabes mengalo Raja Zakharia, ibunuh mo ia i Jibleam, nai gabè raja mo ia menggancihisa.

¹¹Merkitè bagidi saut mo sinidokken JAHOWA taba Raja Jehu, imo gabè raja Israel ngo pemparenna soh mi cundut peempatken. Sukuten sidèbanna i tersèngèt Raja Zakharia, isurat ngo ibas bukku Tori-torien Raja-raja Israel.

¹³Petellupuluh sibah tahunken Raja Uzia memerèntah i Juda, mbangkit raja mo si Salum anak si Jabes i Israel. Pellin sebulan ngo kessa ia memerèntah i Samaria

¹⁴kumarna si Menahem anak si Gadi berkat i Tirza nai mi Samaria, nai ibunuh mo si Salum, janah ia nola mo gabè raja gancihna.

¹⁵Ibas perdalanenna i Tirza nai, ireppuk si Menahem ngo kuta Tifsah dekket kuta sikulilingna janah irabbatken ngo karina jelma pengisina. Kumarna oda uè patu kuta i bana, gabè itaka mo beltek daberru-daberru siberrat-berrat rumah sinikuta i. Sukuten sidèbanna tersèngèt Raja Salum dekket pertuptupenna, isurat ngo i ibas bukku Tori-torien Raja-raja Israel.

¹⁷Petellupuluh sibah tahunken Raja Uzia memerèntah Juda, mbangkit raja mo si Menahem anak si Gadi i Israel janah i Samaria ngo ia memerèntah sipuluh tahun dekkahna.

¹⁸Sidekkah nggelluhna merdosa ngo ia taba JAHOWA, kumarna ièkutken ngo kejahaten Raja Jerobeam I, memaing kalak Israel mengulaken dosa.

¹⁹Sinderrang si Pul raja Assur menjuhap Israel, iberèken si Menahem mo bana 34.000 kilo pirak, asa iurupi si Menahem i lako petegguhken kuasana i Israel.

²⁰Cara si Menahem pepulungken riar i, imo merkitè ipaksa kalak sibèak i Israel asa karina kalak memerèken limapuluh kèpèng pirak. Kemulihkenna i itadingken si Pul mo nagerri i, janah balik mo ia mi nagerrina.

²¹Sukuten sidèbanna tersèngèt Raja Menahem isurat ngo ibas bukku Tori-torien Raja-raja Israel.

²²Matè mo ia janah ikubur, nai mbangkit raja mo anakna si Pekahya gancihna.

²³Pelimapuluh tahunken Raja Uzia memerèntah Juda, mbangkit raja mo si Pekahya anak si Menahem i Israel janah i Samaria ngo ia memerèntah dua tahun dekkahna.

²⁴Merdosa ngo ia taba JAHOWA kumarna ièkutken ngo kejahaten Raja Jerobeam I simemaing merdosa kalak Israel.

²⁵Sada kalak lubalangna mergerar si Pekah anak si Remalya mertuptup dekket limapuluh kalak Gilead. Nai ipas sada bèntèng i istana Samaria ibunuh kalak i mo si Pekahya rebbak dekket dua kalak nai sidèban mergerar si Argob dekket si Arye. Nai si Pekah mo gabè raja menggancihi si Pekahya.

²⁶Sukuten sidèbanna tersèngèt Raja Pekahya isurat ngo ibas bukku Tori-torien Raja-raja Israel.

²⁷Pelimapuluh dua tahunken Raja Uzia memerèntah Juda, mbangkit raja mo si Pekah anak si Remalya i Israel. Duapuluh tahun ngo dekkahna ia memerèntah i Samaria.

²⁸Merdosa ngo ia taba JAHOWA kumarna ièkutken ngo kejahaten Raja Jerobeam I si memaing merdosa kalak Israel.

²⁹Tikan pemerèntahen si Pekah itaban si Tiglat-Pileser raja Assur ngo kuta Iyon, Abel-Bet-Maakha, Janoah, Kedes, Hazor, nagerri Gilead, Galilea dekket Naftali. Jelma pengisina i pè itaban ngo janah iembah mi Assur.

³⁰Peduapuluh tahunken pemerèntahen Raja Jotam anak si Uzia i Juda mertuptup mo si Hosea anak si Ela mengalo Raja Pekah, nai ibunuh mo ia, janah gabè ia nola mo gabè raja menggancihisa.

³¹Sukuten sidèbanna i tersèngèt Raja Pekah isurat ngo ibas bukku Tori-torien Raja-raja Israel.

³²Pedua tahunken pemerèntahen Raja Pekah anak si Remalya i Israel, mbangkit raja mo si Jotam anak si Uzia i Juda.

³³Duapuluh lima tahun mo umurna tikala i janah sipuluh ennem tahun dekkahna ia memerèntah i Jerusalem. Inangna mergerar si Jerusa berru si Zadok.

³⁴Pesennangken ukur JAHOWA ngo iulaken si Jotam, tosè bagè bapana si Uzia.

³⁵Tapi kurangna oda irumpakken bekkas-bekkas mersembah taba sembahen gabè tong dèng ngo jelma nterrem i memèlèken pèlèen dekket merdahupa i si. Si Jotam mo memahan Pèntu Mbengket kan Utara i Bages JAHOWA.

³⁶Tikan pemerèntahen si Jotam, imulai JAHOWA mo pasulakken si Rezin raja Siria dekket si Pekah raja Israel lako mengkubu Juda. Sukuten sidèbanna i dèng tersèngèt Raja Jotam isurat ngo ibas bukku Tori-torien Raja-raja Juda.

³⁸Matè mo ia janah ikubur i perkuburen raja-raja i Kuta si Daud. Anakna si Ahas mo mbangkit raja sumingkatsa.