Read Batak Dairi 2 Raja-raja 16 Bible Online

2 Raja-raja 16 - Batak Dairi bible

2 Raja-raja 16

¹Pesipuluh pitu tahunken pemerèntahen Raja Pekah anak si Remalya i Israel, mbangkit raja mo si Ahas anak si Jotam i Juda.

²Merumur duapuluh tahun mo ia tikanna i janah sipuluh ennem tahun mo dekkahna ia memerèntah i Jerusalem. Oda ngo ièkutken codien simerandal bai si Daud nai empungna i, tapi gabè iulaken ngo siso pesampangken atè JAHOWA Dèbatana.

³Bagè raja-raja Israel ngo ia, sanga ngo ipèlèken anakna sendiri mahan pèlèen taba dèbata sidèban, mengèkuti kecemmalen jelma siso kasèa sienggo ipelaus JAHOWA i nagerri Kanaan i nai, sinderrang imasuki kalak Israel nagerri i.

⁴Ipèlèken si Ahas ngo pèlèen dekket merdahupa i bekkas mersembah sembahen i delleng dekket i terruh kayu ntemtem.

⁵Tikanna i ma mo mulak kuta Elat ikuasai raja Edom janah ipelaus kalak Juda simerian i si. Nai merrohen mo kalak Edom merian i kuta i soh sidari èn. Tikanna i ma mo si Rezin raja Siria dekket si Pekah raja Israel mengkubu bak menjuhap kuta Jerusalem, tapi oda tertaluken kalak i si Ahas.

⁷Ipasulak si Ahas mo suruhenna mendahi si Tiglat-Pileser raja Assur merembah tennah bagèen, “Naposomu ngo aku; kumarna i kupido, asa roh kènè lako paluahken aku bai raja Siria dekket bai raja Israel nai situpung mengkubu aku.”

⁸Ibuati si Ahas ma mo emmas bak pirak i Bages JAHOWA nai dekket harta silot i istana, janah itengesken taba raja Assur i.

⁹Iuèi Raja Tiglat-Pileser mo pengidoen si Ahas i, nai ikubu mo Damaskus janah itaban. Itaban mo pengisina janah iarak mi Kir, janah ibunuh mo rajana imo Raja Rezin.

¹⁰Tikan laus Raja Ahas mi Damaskus lako menimbaki Raja Tiglat-Pileser, idah mo langgaten i kuta i. Nai itengèsken mo taba Imam Uria mi Jerusalem contoh langgaten i dekket sibarenna pas kalohon.

¹¹Nai ibahan si Uria mo sada langgaten tosè bagè contoh bak sibaren sinijalona i, janah pul ngo ibaing sinderrang madèng balik si Ahas.

¹²Kessa roh si Ahas i Damaskus nai, idah mo enggo dung langgaten i.

¹³Nai ipèlèken mo i babo langgaten i pèlèen jukut dekket pèlèen pagè. Iarirken ma ngo i si pèlèen anggur dekket daroh pèlèen perdamèen mi babo langgaten i.

¹⁴Idah si Ahas ngo langgaten tembaga pemelèen merkemeddu bai JAHOWA i kellang-kellang Bages JAHOWA dekket langgatenna sirembaru i. Kumarna i ilompat mo langgaten tembaga i i lebbè Bages JAHOWA nai mi kan utara langgaten sirimbaru i.

¹⁵Enggo kessa bagi, idokken mo mbang si Uria, “Pakkè mo langgatenku mbelgah èn bekkas menutung pèlèen siceggen dekket pèlèen berngin sinipèlèken raja bak jelma nterrem, janah i sidi ma mo arirken pèlèen jelma nterrem. Tuang ma mo daroh karina pinakan sinipèlèken mi langgaten i. Ukum langgaten tembaga sienggo malè i, aku mo memakè lako mengido peddah bai sumangan nai.”

¹⁶Ibahanken si Uria mo bagè pendokken raja i.

¹⁷Enggo kessa i irontas si Ahas mo kurèta-kurèta tembaga sinipakkè i Bages JAHOWA janah ibuati ma mo bekkas perborihen ipas kurèta-kurèta i nai. Kancah tembaga sini gurung lembu tembaga sidua belas i pè ibuat ma ngo, janah ibaing mo danganna gampar ipas batu nai.

¹⁸Nai lako muat ukur raja Assur, irontas si Ahas mo èmpèr raja sinibages JAHOWA i, janah itutup mo pèntu dalan raja lako mbengket.

¹⁹Sukuten sidèbanna i tersèngèt Raja Ahas, isurat ngo ibas bukku Tori-torien Raja-raja Juda.

²⁰Matè mo si Ahas janah ikubur i perkuburen raja-raja i Kuta si Daud. Anakna si Hizkia mo mbangkit raja gancihna.