Read Batak Dairi 2 Raja-raja 17 Bible Online

2 Raja-raja 17 - Batak Dairi bible

2 Raja-raja 17

¹Pedua belas tahunken pemerèntahen si Ahas i Juda, mbangkit raja Israel mo si Hosea anak si Ela, janah sibah tahun dekkahna memerèntah i Samaria.

²Merdosa ngo ia taba JAHOWA, tapi dosana oda pella bagè buè dosa-dosa raja-raja Israel i lebbèenkenna.

³Ijuhap janah italuken si Salmaneser raja Assur ngo ia, gabè gennep tahun kennah menggarar belasting ngo ia tabasa.

⁴Tapi tikan sikali, ipasulak si Hosea mo utusenna mendahi si So raja Mesir lako mengido pengurupinna. Nai oda nè mo igarar si Hosea belasting tahunen taba Assur. Ibettoh si Salmaneser kessa mo tersèngèt pemaing si Hosea i, itangkup mo si Hosea janah ikurung mo.

⁵Nai ijuhap si Salmaneser raja Assur mo Israel janah ikubu mo Samaria. I tahun petelluken i pengkubuen i nai —

⁶imo pesibah tahunken pemerèntahen si Hosea, itaban si Salmaneser mo Samaria. Nai itaban janah iarak mo kalak Israel mi Assur. Ibaing mo dèba bai kalak i nai i kuta Halah, dèba nai i gembar Laè Habor i nagerri Gozan, janah dèba nai i kuta silot i nagerri Madai.

⁷Talu Samaria imo kumarna merdosa kalak Israel taba JAHOWA Dèbatana, sienggo paluahken kalak i bai raja Mesir nai janah mengarak kalak i karuar i nagerri i nai. Isembah kalak i ngo Dèbata sidèban,

⁸janah mengekuti kecemmalen bangsa-bangsa sienggo ipelaus JAHOWA tikala mergeraha kalak Israel mengalo bangsa-bangsa i. Ièkutken bangsa Israel ngo adat kecemmalen sinidokken raja-raja Israel,

⁹janah mengulaken siso toko iakap JAHOWA, Dèbata kalak i. Ipecènder kalak i ngo bekkas mersembah taba dèbata sidèban i karina kuta kalak i, i kuta kèdèk bang pè i kuta mbellen.

¹⁰I babo karina uruk bak i terruh gennep kayu ntemtem, ipecènder kalak i ngo tugu-tugu bak gana-gana Sembahen Asyera.

¹¹Menutung dahupa ngo kalak i ipas karina langgaten lako bai sembahen bagè kecemmalen bangsa-bangsa sienggo ipuari JAHOWA i nagerri Kanaan nai. Isembah kalak i ngo dèbata sidèban, tukasi pè enggo igerra JAHOWA. Karina ulah-ulah kalak i jahat ngo mendungkul pungur JAHOWA.

¹³Ipasulak JAHOWA ngo utusen dekket nabi-nabiNa mendahi kalak Israel dekket Juda, lako pesakatken sèngèt-sèngèt èn, “Petadi kènè mo mengulaken jahat janah uèi kènè mo karina hatoren bak pati-patien sienggo Kuberèken taba empungmu dekket bai ndènè, merkitè nabi-nabi naposongku.”

¹⁴Tapi oda ngo idengkohken kalak Israel dekket Juda. Jèngèng ngo kalak i bagè empungna siso uè percaya bai JAHOWA Dèbatana.

¹⁵Oda uè kalak Israel dekket Juda mengulaken perèntah-perèntah JAHOWA janah oda setia mi padan sienggo ibahanken dekket empung kalak i. Oda isarihken kalak i sèngèt-sè- ngètna, ai gabè mersembah ngo kalak i taba sembahen siso merguna, memaing kalak i nola pè oda merguna. Ièkutken kalak i ngo bagè pemaing bangsa-bangsa i sikuliling kalak i, tukasi pè enggo igerra JAHOWA.

¹⁶Ilausi kalak i ngo karina pati-patiin JAHOWA Dèbatana, janah iteppa ngo dua lembu ipas logam nai mahan sembahenna. Ibahan kalak i ma ngo gana-gana Asyera, menembah bintang-bintang dekket menguèi taba Sembahen Baal.

¹⁷Ipèlèken kalak i ngo dukak-dukakna mahan pèlèen situtungen bai dèbata sidèban. Memakè kinangguruen ngo kalak i dekket mengido peddah bai guru-guru nai sindorok mengerana dekket sumangan. Ngkasah ngo kalak i mengulaken singgogo atè JAHOWA,

¹⁸gabè punguren mo ia taba kalak i janah gabè oda iperdimata nèngè kalak i. Ibuang mo kalak i i tanoh sienggo iberèken i nai kin bai kalak i; pellin kerajaen Juda nai ngo kessa tading.

¹⁹Kalak Juda pè oda ngo menguèi pati-patiin JAHOWA Dèbatana. Ièkutken kalak i ngo kecemmalen kalak Israel,

²⁰gabè oda nè iakui JAHOWA karina ummat Israel. Ihukum janah ipesakat ngo kalak i taba musuh-musuhna sikejam i. Oda iperdimata nèngè kalak i, tapi gabè ibuang mo kalak i i tanoh sienggo iberèken i nai kin bai kalak i.

²¹Enggo kessa isirang JAHOWA Israel i Juda nai ipebangkit kalak Israel mo si Jerobeam anak si Nebat gabè raja kalak i. Nai ibaing si Jerobeam mo kalak i menadingken JAHOWA janah mengulaken dosa-dosa mbelgah.

²²Ièkutken kalak i ngo ulah-ulah si Jerobeam janah dak mengulaken karina dosa sienggo ibahanken.

²³Ujungna gabè oda nè iperdimata JAHOWA kalak i, tapi gabè ibuang mo kalak i i tanoh sienggo iberèken i nai kin bai kalak i. Masa ngo i tosè bagè sienggo ipesèngètken JAHOWA merkitè naposoNa nabi-nabi. Bagi mo terbuang kalak Israel mi Assur, janah i si ngo kalak i soh sidari èn.

²⁴Gancih kalak Israel sienggo ibuang i, ibaing raja Assur mo mi kuta sini Samaria jelma i Babel, Kuta, Awa, Hamat, dekket Sefarwaim nai. Kalak i nola mo pengisi kuta i janah merian i si.

²⁵Tikan mula-mula merian kalak i i sidi, oda ngo ipesangap kalak i JAHOWA, kumarna i mo asa ibaing JAHOWA roh singa menjerngem mèduk bai kalak i nai.

²⁶Nai lot mo kalak magahken taba raja Assur, oda itandai jelma sinilompatna mi kuta-kuta Samaria i pati-patien sembahen nagerri i. Kumarnana i ngo asa roh singa i menjerngemi kalak i ibaing sembahen i.

²⁷Kemulihkenna i, iperèntahken raja Assur mo, asa sada kalak imam ipas sibuangen i nai ipasulak balik mi Samaria. “Pasulak mo ia balik janah merian i si, asa iajari kalak i tersèngèt pati-patiin sembahen nagerri i,” nina raja i.

²⁸Nai balik mo sada kalak imam Israel sienggo ibuang i Samaria nai mi Assur janah merian i Betel mo ia. I si mo ia mengajari jelma nterrem bakunè patutna mersembah taba JAHOWA.

²⁹Tapi dak tong ngo ibahan kalak simerian i Samaria i gana-ganaen kalak i janah ibaing mo i mi bagasen rumah sinipajek kalak Israel bai sembahen tikan i kuta i dèng kin kalak i. Gennep horong mersibahan sem- bahenna i kuta siniianen kalak i.

³⁰Kalak Babel memahan gana-gana sembahen Sukot-Benot, kalak Kuta memahan gana-gana Nergal, kalak Hamat memahan gana-gana Asima,

³¹Kalak Awa memahan gana-gana Nibhas dekket Tartak, janah kalak Sefarwaim memèlèken dukak-dukakna mahan pèlèen situtungen taba sembahen Adramelekh dan Anamelekh.

³²Laènken menembah gana-gana i, isembah kalak i ma ngo JAHOWA. Ipilih kalak i ngo bai kalak i nai mermatcam bagè jelma lako mengulaken ulaen imam dekket lako mèlèken pèlèen i bages pemèlèen dèbata sidèban.

³³Isembah kalak i ngo JAHOWA, tapi isembah ma ngo sembahen kalak i sendiri, bagè sienggo ikecemalken kalak i kin i nagerrina.

³⁴Soh ari sidari èn dak iulaken kalak i dèng ngo kecemmalenna i. Oda ngo iuèi kalak i JAHOWA janah oda iulaken pati-patinNa dekket perèntah-perèntahNa sienggo iberèken taba pemparen si Jakob, sinigerarenNa ma si Israel.

³⁵Enggo kin ngo ibaing JAHOWA perpadanen èn dekket kalak Israel, “Ulang uèi kènè dèbata sidèban; ulang kè mersembah tabasa, barang pè mengkebasi kalak i, barang memèlèken pèlèen bana.

³⁶Pesangap mo Aku JAHOWA, sienggo me- ngarak kènè karuar i Mesir nai merkitè kuasa mbellen; Aku mo sembah janah bangKu mo pèlèken kènè pèlèen.

³⁷Dak uèi kènè mo pati-patinKu dekket perèntah-perèntahKu sienggo Kusurat bai ndènè; ulang sembah kènè dèbata sidèban,

³⁸janah ulang lupa kènè i padanKu dekket kènè i.

³⁹Uèi kènè mo Aku JAHOWA Dèbata ndènè, asa kupaluah kènè bai musuh-musuh ndènè nai.”

⁴⁰Tapi oda ngo idengkohken pengisi Samaria i, dak tong ngo kalak i hot i kecemmalenna kin.

⁴¹Jadi isembah kalak i ngo JAHOWA, tapi isembah kalak i ma ngo sembah-sembahen kalak i. Soh ari sidari èn pè bagi ngo tong iulaken pemparenna.