Read Batak Dairi 2 Raja-raja 18 Bible Online

2 Raja-raja 18 - Batak Dairi bible

2 Raja-raja 18

¹Petellu tahunken pemerèntahen Raja Hosea anak si Ela i Israel, mbangkit raja mo si Hizkia anak si Ahas i Judea.

²Merumur duapuluh lima tahun mo ia tikanna i, janah i Jerusalem ngo ia memerèntah duapuluh sibah tahun dekkahna. Inangna mergerar si Abia berru si Zakharia.

³Pesampangken atè JAHOWA ngo iulaken si Hizkia tosè bagè Raja Daud empungna i.

⁴Irumpakken ngo bekkas mersembah taba dèbata sidèban, ibulakken ngo tugu-tuguna janah icèdai gana-gana Asyera. Ireppuk ma ngo nipè tembaga siniteppa si Musa sinigerarenna Nehustan. Kerna soh mi tikki i, tong dèng ngo merdahupai kalak Israel lako pesangapken nipè tembaga i.

⁵Karina raja-raja Juda oda lot bagè si Hizkia, bang sinilebbèna barang sinipodina pè. Percaya ngo ia bai JAHOWA Dèbata kalak Israel janah setia baNa.

⁶Oda nung ia mengalo JAHOWA. Karina pati-patiin siniberèken JAHOWA merkitè si Musa, mertuhu-tuhu ngo si Hizkia mengulakensa.

⁷Kemulihkenna i ngo asa dak iurupi JAHOWA ia, gabè merhasil karina siniulakenna. Memberontak ngo ia taba raja Assur, janah oda uè tunduk tabasa.

⁸Italuken ngo kalak Palistin janah ipupusi bekkas kalak i mulai i kuta kètèk nai soh mi kuta simbelgahna dekket Gaza bak sikulilingna pè.

⁹Peempat tahunken pemerèntahen si Hizkia, imo pepitu tahunken pemerèntahen si Hosea i Israel, ijuhap si Salmaneser raja Assur mo Israel janah mengkubu Samaria.

¹⁰Enggo kessa ikubu tellu tahun dekkahna, talu mo Samaria. Masa ngo i peennem tahunken pemerèntahen si Hizkia janah pesibah tahunken pemerèntahen si Hosea.

¹¹Nai itaban raja Assur mo kalak Israel mi Assur; ibaing mo kalak i dèba mi kuta Halah, dèba mi gembar Laè Habor i nagerri Gozan janah dèba nai mi kuta-kuta silot i nagerri Madai.

¹²Talu pè kalak Samaria kumarna oda iuèi Israel ngo JAHOWA Dèbatana. Ilupaken kalak i ngo padan sinibaing JAHOWA dekket kalak i, janah ilausi kalak i ngo karina perèntah si Musa, naposoNa i. Oda uè kalak i mendengkohken janah oda uè menguèi.

¹³Peempat belas tahunken pemerèntahen si Hizkia raja Juda, ijuhap janah italuken si Sanherib raja Assur mo kuta-kuta gotting i Juda.

¹⁴Nai itennahken raja Hizkia mo berita èn taba si Sanherib, si tupung i Lakhis tikala i, “Enggo salah aku. Kumarna i kupido bamu asa pettadi mo menjuhap kami. Kuuèi pè karina sinidokkenmu i.” Ialoi si Sanherib mo, asa itengesken tabasa 10.000 kilo pirak dekket 1.000 kilo emmas.

¹⁵Kemulihken i itengesken si Hizkia mo karina pirak silot i Bages JAHOWA dekket i kas istana taba si Sanherib.

¹⁶Emmas silot i pèntu Bages JAHOWA dekket sinibaing si Hizkia sendiri pè i tamparen-tamparen pèntu ibuat mo janah itengesken ma taba si Sanherib.

¹⁷Tapi tong ngo ipasulak raja Akhis soridaduna mbuè kalohon lako menjuhap Jerusalem. Nuhnuhen i iuluken tellu kalak lubalang imo sada kalak pakalima, sada kalak simengatur enumen janah sada kalak nai èkuten pertaram raja. Soh kessa kalak i mi Jerusalem, merpulung mo kalak i i gembar dalan laè bangkiten i bendar kan julu mergerar juma bekkas menaptapi.

¹⁸Nai dilo-dilo mo kalak i menenggoi Raja Hizkia, nai roh mo tellu kalak pugabè si Hizkia mendahi kalak i. Sitellu kalak i imo si Eliakim anak si Hilkia huntuen pengurus istana si Sebna juru tulis kerajaen si Joah anak si Asaf juru tulis istana.

¹⁹Sada kalak lubalang Assur i mendokken taba kalak i, “Bagahken taba si Hizkia rana raja Assur bagèen, ‘Kasa mergegoh ko dok atèmu?

²⁰Idokdok ko ngo ndorok pellin kata sambing gancih siasat dekket gegoh soridadu? Isè asang-asangmu asa pang ko mengalo Assur?

²¹Iharapken kono ngo pengurupi Mesir, tapi tosè ngo i bagè memaing rih mahan tongket, mbohok kessa tongket i gabè ijuluk mo tanganmu. Bagi ngo raja Mesir taba karina kalak simengharapken pengurupina.’ ”

²²Idokken lubalang kalak Assur i dèng ma, “Barang tah dok atè ndè mengharapken Dèbata JAHOWA ndènè kènè? Tikan iperèntahken si Hizkia taba kalak Juda dekket kalak Jerusalem pellin i langgaten sini Jerusalem kessa ndorok mersembah, otang sinirumpakkenna i pè langgaten dekket bekkas mersembah taba JAHOWA sendiri ngo?

²³Bagèndari merkitè gerar raja Assur pang ngo aku taruh-taruh, mula iberrè pè bai ndènè 2.000 kuda, pasti oda lot nèngè jelma nasa i bilangenna lako memasang!

²⁴Lako mengalo lubalang nami siperteruhna pè, oda ngo alo-alona kènè. Keppè dak iharapken kènè dèng mo Mesir menengesken kurèta perang dekket soridadu merkuda lako mengurupi!

²⁵Idokdok kènè roh kami juhap menaluken nagerri ndènè oda merkitè pe- ngurupi JAHOWA? JAHOWA ngo pasulakken kami lako juhap dekket mengereppuk!”

²⁶Nai idokken si Elyakim, si Sebna dekket si Joah mo taba lubalang i, “Alè Raja, merkata Aram mo kè mengerana taba kami, kuantusi kami ngo. Ulang merkata Heber kènè, asa ulang iantusi sinterrem sini babo dingding batu pagar kuta i.”

²⁷Ialoi lubalang i mo, “Ai pellin bai ndènè dekket bai raja ndènè sambing ngo kessa kami pana ipasulak raja Assur memagahken karinana i? Oda ngo! Dekket ngo taba sinterrem sikundul i dingding batu pagar i, si rebbak dekket kènè lako kipangan ceggahna sendiri dekket mengènum tisna sendiri.”

²⁸Nai cènder mo lubalang i janah idiloken mo ipas kata Heber, “Dengkohken kènè bakunè pendokken raja Assur:

²⁹‘Ulang uè kènè ikilang si Hizkia; oda terbakinsa paluahken kènè.

³⁰Ulang dengkohken kènè katana mengharapken JAHOWA. Ulang harapken ipaluah JAHOWA kènè, barang menggerra soridadu Assur menaban kuta ndènè.

³¹Ulang dengkohken kènè si Hizkia. Aku raja Assur pesèngètken kènè, lotien mo kènè karuar i kuta nai lako menerrah. Nai ndorok mo kènè i podi ari kipangan buah anggur i pekken ndènè nai, janah mengakapken buah kayu ara ndènè dekket mengènum laè i telaga ndènè nai.

³²Pèma kupindahken kènè mi sada nagerri bagè tosè mi nagerrimu sendiri. Lot ngo i si pekken anggur simerèken hasil anggur bai ndènè, dekket juma simenghasilken pagè mahan pangaen ndènè. Mbuè ngo i nagerri i kayu zaitun, minak zaitun dekket tenggoli. Mula iuèi kènè sikudokken èn, nggelluh mo kènè, oda pella matè. Ulang dengkohken kènè si Hizkia! Mengoto-ngotoi kènè ngo ia simendokken ipaluah JAHOWA mo kènè nina.

³³Nung ngo idah kènè sembahen bangsa sidèban i paluahken nagerrina i kuasangku nai?

³⁴Idikè ngo sembahen nagerri Hamat dekket Arpad? Idikè sembahen Sefarwaim, Hèna, bak Iwa? Isè lot roh paluahken Samaria?

³⁵Sembahen paina nung paluahken nagerrina i kuasangku nai? Bakunè mo perndorokna JAHOWA paluahken Jerusalem?’ ”

³⁶Mendengkoh i, sip ngo pengisi Jerusalem, kumarna enggo iperèntahken Raja Hizkia asa sip sambing kalak i.

³⁷Nai iribaki si Elyakim, si Sebna dekket si Joah mo pakènna kumarna bonek, nai idahi mo raja i lako magahken sinidokken lubalang Assur i.