Read Batak Dairi 2 Raja-raja 19 Bible Online

2 Raja-raja 19 - Batak Dairi bible

2 Raja-raja 19

¹Idengkoh Raja Hizkia kessa mo sinibagahken sitellu kalak i, iribak mo pakènna janah ipakkè nola mo kaèn goni tanda bonek, nai laus mo ia mi Bages JAHOWA.

²Enggo kessa i ipasulak mo si Elyakim èkuten pengurus istana si Sebna penurat kerajaen dekket imam-imam sienggo tua-tua mendahi Nabi Jesaya anak si Amos. Kalak i pè kaèn goni ma ngo ipakkè.

³Bagèen mo tennah si Hizkia sipesakaten kalak i taba si Jesaya, “Ari bonek ngo ari èn; ihukum janah ihina ngo kita. Bagè daberru sirabisen ngo kita, tapi enggo kerri gegoh.

⁴Enggo mo iutus raja Assur sada kalak pakalimana lako mengelèai Dèbata singgelluh i. Tah bakunè enggo idengkoh JAHOWA Dèbatamu pengelèai kalak i, janah ihukum kalak i simengeruapken i. Kemulihkenna i sodipken mo denganta singgelluh i dèng taba Dèbata.”

⁵Enggo kessa soh bana tennah Raja Hizkia i,

⁶ipasulak si Jesaya mo utusen i pesakatken pengaloina bagèen, “Idokken JAHOWA ngo, ulang pella ringgodoren Rajai mendengkohken rana naposo raja Assur i simendokken oda terpaluah JAHOWA kita.

⁷Ibaing JAHOWA mo rembekbekken raja Assur i mendengkoh berita mernina-nina, nai gabè balik mo ia mi nagerrina janah terbunuh mo ia i si.”

⁸Terbertik mo bai lubalang Assur i enggo nina itadingken rajana Lakhis janah enggo juhap mengalo kuta Libna, oda pella ndaoh i sidi nai. Nai laus mo lubalang i mi si, lako mendahi rajana i.

⁹Enggo soh berita bai raja Assur, mendokken lako roh nina soridadu Mesir iuluken si Tirhaka raja Sudan lako menjuhap kalak i. Kumarna i itengèsken raja Assur mo surat taba si Hizkia raja Juda.

¹⁰Bagèen ngo katana, “Ulang tok kono mi padan Dèbatamu asang-asangmi mendokken oda nina ndabuh kono mi tanganku.

¹¹Idengkoh kono ngo beritana gennep nagerri sinijuhap raja-raja Assur, ipetumpat ngo. Ulang dok atèmu terbaing kono maluah.

¹²Tikan italuken empungku kuta Gozan, Haran dekket Rezef bak memunuh kalak Eden simerian i Telasar, sada poda sembahen kalak i ndorok paluahken kalak i.

¹³Enggo idikè raja-raja kuta Hamat, Arpad, Sefarwaim, Hena dekket Iwa?”

¹⁴Ijalo si Hizkia mo surat i bai pasulakken i nai ijaka mo. Enggo kessa i laus mo ia mi Bages JAHOWA, janah ipekimbang mo surat i i hadeppen JAHOWA,

¹⁵nai mersodip mo ia, nina mo, “Ialè JAHOWA Dèbata kalak Israel, simerbekkas i babo kerub, kono ngo kessa Dèbata simengkuasai karina kerajaen i babo tanoh èn. Kono ngo menghanaken langit dekket tanoh èn.

¹⁶Ialè JAHOWA, tengen mo kadè simasa bai nami bagèndari. Dengkohken mo pengelèai si Sanherib i bamu, alè Dèbata singgelluh i.

¹⁷Karina ngo kami memettoh alè JAHOWA enggo mèduk bangsa ibinasaken raja-raja Assur janah mengelala nagerri kalak i.

¹⁸Sembahen kalak i pè itutungi janah ilala, kumarna oda ngo lot kuasa sembahen sibagidi. Ai pellin gana-gana i batu bak i kayu nai sinibahan tangan jelma ngo kessa i.

¹⁹Ialè JAHOWA Dèbata nami, paluah mo kami bai kalak Assur i nai, asa ibettoh karina bangsa sinidunia èn, pellin kono ngo kessa Dèbata.”

²⁰Enggo kessa i itennahken si Jesaya mo taba Raja Hizkia bagè pengaloi i sodip raja i,

²¹Idokken JAHOWA, “Itabai janah iduhuli kuta Jerusalem ngo ko alè Sanherib.

²²Ibettoh kono ngo isè sinijukkaten dekket sinilèaenmu i? Aku JAHOWA Dèbata kalak Israel, Dèbata simbadia ngo. Sun mo sombongmu taba Aku.

²³Ipasulak kono ngo utusenmu lako merbual, merkitèken mbuèen kurèta perangmu, enggo italuken kono delleng-delleng sindatesna i Libanon. Ikesombongken kono ngo penabahimu kayu ares sindatesna dekket simerandalna ninganna ibartes kono rambah mbellen siuto-utoenna.

²⁴Ièndèlken kono ma ngo ikurak ko telaga janah mengènum laè i nagerri ngerri ndèba, janah idedohi soridadumu laè Nil sanga ngkerrah.

²⁵Oda dèng ngo nung idengkoh kono, ukum i karina sienggo Kurencanaken kin ngo i arnia nai? Nai bagèndari Kupesaut mo i. Aku ngo memerèken kuasa bamu lako menggeppui kuta-kuta gotting i.

²⁶Oda ne mergoldè Kalak simerian i sidi; tersengget mo kalak i janah buradan. Bagè dukut-dukut i jampalen ngo kalak i barang bagè dukut siturah i saong bages, gabè males mula isempul angin nggara i kebincaren nai.

²⁷Tapi Kubettoh ngo karinana tersèngèt dirimu. Kubettoh ngo kadè ibahanken kono janah pak dikè kono laus.

²⁸Kubettoh ngo melaga kalohon kono bangKu, janah enggo ma ngo Kudengkoh kesombongenmu i. Bagèndari Kuingkir-ingkir mo ègungmu janah kukontam babahmu, asa Kuiring ko balik arap dalan sinibellusmu lako roh i kin.”

²⁹Itennahken si Jesaya dèng ma ngo tennah èn taba si Hizkia, “En mo pertandaenna bamu. Tahun èn dekket tahun siroh kipangan gandum siso sinuan mo kalak. Tapi enggo kessa i ndorok mo kalak i menuan anggur janah kipangan hasilna.

³⁰Nduma mo kalak Juda singgelluhna dèng bagè suan-suanen mbages kalohon uratna janah dak merbuahi.

³¹Lot mo maluah pengisi Jerusalem dekket i babo Delleng Sion, kumarna enggo itentuken JAHOWA masa bagidi.

³²Bagèen ngo pendokken JAHOWA tersèngèt raja Assur, ‘Oda ndorok ibengketti kuta Jerusalem barang menèmbakken panahna mi kuta i. Soridadu simertambeng-tambeng pè oda lot mendessingi kuta i, janah oda ibahan parik pengkubuen i sikulilingna.

³³Kennah balik raja Assur arap dalan sinibellusna lako roh kin, oda sanga mbengket mi kuta i. Aku JAHOWA ngo mendokken i.

³⁴Kubela janah kujamotken ngo kuta Jerusalem kemulihken kesangapenku dekket kemulihken padanKu dekket si Daud naposongKu i.’ ”

³⁵Roh mo bernginkenna i malaèkat JAHOWA mi undung-undung kalak Assur janah memunuh 185.000 soridadu. Ceggen sibarembenkenna i, mergamparen mo mayat-mayat kalak i.

³⁶Nai sumondar mo si Sanherib raja Assur balik mi Niniwe.

³⁷Tikan sidari sinderrang mersembah ia i bages rumah sembahen Nisrokh, ibunuh si Adramelekh mo ia merkitè pedang, dekket si Sarezer dukak-dukakna i. Enggo kessa i mperrus mo kalak i mi nagerri Ararat. Nai anakna si Esarhadon mo mbangkit raja singkatna.