Read Batak Dairi 2 Raja-raja 2 Bible Online

2 Raja-raja 2 - Batak Dairi bible

2 Raja-raja 2

¹Dapet mo tikkina naing iembah JAHOWA si Elia mi sorga, merkitè angin ndor. Tikanna i enggo berkat si Elia dekket si Elisa i Gilgal nai,

²janah i tengah ndalan idokken si Elia mo mbang si Elisa, “I sèn mo ko tading, ai idokken JAHOWA aku laus mi Betel.” Tapi ialoi si Elisa mo, “Merkitè gerar JAHOWA singgelluh i dekkat merkitè kessahmu, oda uè aku menadingken kono.” Nai rebbak mo kalak i terrus merdalan mi Betel.

³Laus mo simpulungen nabi silot i sidi mendahi si Elisa janah mengkusoken, “Ibettoh kono ma ngo ibagasen sidarin mo indukmu naing menadingken kono kumarna naing iembah JAHOWA?” “Uè, kubettoh ngo,” nina si Elisa mengaloi. “Tapi bagi mo lebbè ulang pella sirana-ranaken i.”

⁴Nai idokken si Elia mo mbang si Elisa, “I sèn mo ko tading, ai idokken JAHOWA aku laus mi Jeriko.” Tapi ialoi si Elisa mo, “Merkitè gerar JAHOWA singgelluh i dekket merkitè kessahmu, oda uè aku menadingken kono.” Nai rebbak mo kalak i sidua merdalan terrus mi Jeriko.

⁵Laus mo sarombongen nabi silot i sidi mendahi si Elisa janah mengkusoken, “Ibettoh kono ngo sidari èn mo naing iembah JAHOWA indukmu janah menadingken kono?” “Uè, kubettoh ngo,” nina si Elisa mengaloi. “Tapi bagi mo lebbè, ulang pella sirana-ranaken i.”

⁶Nai idokken si Elia mo mbang si Elisa, “I sèn mo ko tading. Ipasulak JAHOWA ngo aku laus mi Laè Jordan.” Tapi ialoi si Elisa mo, “Merkitè gerar JAHOWA singgelluh i dekket merkitè kessahmu, oda uè aku menadingken kono.” Nai iterrusken kalak i mo merdalan,

⁷soh mi Laè Jordan, janah lot mo limapuluh kalak nabi mengèkutken kalak i. Nai mengadi mo si Elia dekket si Elisa i biding laè i, janah nabi silimapuluh kalak i cènder oda pella ndaoh i sidi nai.

⁸Italkasi si Elia mo jubahna, nai ilempit mo janah ipaluken mo mi babo laè i. Nai mèter belah dua mo laè i, gabè ndorok mo kalak i merdalan suberrang ipas singkerrah.

⁹Soh kessa kalak i mi kèpar, idokken si Elia mo mbang si Elisa, “Pido mo kadè ipergeddo ko bangku nai sinderrang madèng iembah JAHOWA aku menadingken kono!” Ialoi si Elisa mo, “Tadingken mo kuasamu i bangku, asa ndorok aku sumingkat kono.”

¹⁰“Ah, mberrat kalohon ngo i,” nina si Elia mengaloi. “Tapi mula idah kono aku tikan iembah JAHOWA, iuèi ngo pengidoenmi. Tapi ukum oda ngo idah kono, itulak ngo pengidoenmi.”

¹¹Ningan merdalan dak mengeranai ngo kalak i sidua. Sintempu roh mo sada kurèta merapi iruah kuda merapi menirang kalak i sidua nai ipekèkè angin kalisungsung mo si Elia mi sorga.

¹²Idah si Elisa ngo i, nai idiloken mo, “Elia, Bapangku! Bapangku! Perculèndungen Israel mahantu. Oda nè lot ko alè Pa.” Nai mersep mo si Elia ipenengennen si Elisa nai. Ibagasen melui, iribak si Elisa mo jubahna bellah dua,

¹³nai ipitik mo jubah si Elia sindabuh i. Enggo kessa bagi mulak mo ia janah cènder ibiding Laè Jordan,

¹⁴nai isampetken mo jubah si Elia i mi babo laè i, ninganna mendokken, “Idikè ngo JAHOWA Dèbata si Elia i?” Enggo kessa isampetken jubah mi laè i, mèter bagi dua mo laè i nai merdalan mo ia mi kèpar.

¹⁵Idah nabi silimapuluh kalak sini Jeriko i ngo ia, nai idokken kalak i mo, “Enggo lompat kuasa si Elia bai si Elisa!” Idapetken kalak i mo ia janah sujud ihadeppenna

¹⁶ninganna idokken, “Lot ngo limapuluh kalak kami karina janah mergegoh. Kumarna i berkat mo kita menulusi si Elia indukmi. Tah bakunè iembah Tendi JAHOWA ia mi delleng barang mi lembeng janah itadingken i si.” “Oda perlu i!” nina si Elisa mengaloi.

¹⁷Tapi dak igegohi kalak i ngo nai gabè iuèi mo. Nai laus mo nabi silimapuluh kalak i menulusi si Elia sanga tellu ari dekkahna, tapi oda ngo jupa kalak i.

¹⁸Nai balik mo kalak i mendahi si Elisa situpung memèma i Jeriko. “Otang enggo kudokken taba kènè asa ulang laus kènè?” nina si Elisa taba kalak i.

¹⁹Lot mo roh tah piga-piga kalak i Jeriko nai mendahi si Elisa mendokken, “Ialè Pa, bagè siniidah ndènè sendiri, merandal ngo kuta èn, tapi ukum laèna oda merandal memaing ketimbasen daberru mbadan.”

²⁰“Buat kènè mo mangkuk rembaru,” nina si Elisa, “janah baing kènè sira mi bagasen.” Nai iembahken kalak i mo sinidokkenna i tabasa.

²¹Nai laus mo si Elisa mi takal laè i, isampakken mo sira i mi bagasen laè i ninganna idokken, “Bagèen ngo pendokken JAHOWA: ‘Kubaing mo laè èn nciho, asa ulang nè merembahken kematèen barang ketimbasen!’ ”

²²Mulai i sidi nai nciho mo laè i tosè bagè pendokken si Elisa i.

²³Enggo kessa i, berkat mo si Elisa i Jeriko nai mi Betel. I tengah ndalan roh mo sinuhnuhen anak-anak i kuta nai mengerèhè-rèhèisa. “Alè botak, botak, laus mo ko isèn nai.” nina surak-surak kalak i.

²⁴Itulihken si Elisa janah itengen mo kalak i, nai isumpahi mo kalak i merkitè gerar JAHOWA. Gejapkenna i mèter roh mo dua geppul berru-berru i rambah i nai, isegga-segga mo empatpuluh dua kalak anak-anak i.

²⁵Iterrusken si Elisa mo merdalan mi Delleng Karmel, nai balik mo ia mi Samaria.