Read Batak Dairi 2 Raja-raja 21 Bible Online

2 Raja-raja 21 - Batak Dairi bible

2 Raja-raja 21

¹Merumur 12 tahun ngo si Manasye tikan mbangkit raja ia i Juda janah 55 tahun mo dekkahna ia memerèntah i Jerusalem. Inangna mergerar si Hefzibah.

²Merdosa ngo si Manasye taba JAHOWA, kumarna ièkutken kecemmalen jahat bangsa-bangsa sienggo ipuari JAHOWA i Kanaan nai tikala ibengketti kalak Israel nagerri i.

³Ipekadè nola ngo mengolihi bekkas mersembah taba dèbata sidèban sienggo irumpakken bapana si Hizkia i kin. Ipekadè ma ngo langgaten-langgaten lako mersembah taba Baal, janah ibahan ngo gana-gana Asyera, bagè pemaing si Ahab raja Israel. Isembah si Manasye ma ngo bak bintang-bintang.

⁴Enggo kin ngo idokken JAHOWA, bekkasna ngo ukum Jerusalem dekket bekkas mersembah tabasa, tapi i bekkas Bages JAHOWA i enggo ipajek si Manasye nola langgaten bai dèbata sidèban.

⁵I si dua kasèan Bages JAHOWA i ipajek ngo langgaten-langgaten bekkas menembah bintang-bintang.

⁶Ipèlèken ngo anakna mahan pèlèen situtungen. Merdatui deng ma ngo si Manasye dekket menengen ari, helmu sihir dekket mengido peddah bai bègu nai. Merdosa ka- lohon ngo ia taba JAHOWA gabè mendungkul lagaNa.

⁷Gombaren Asyera pè ibaing ngo mi bagasen Bages JAHOWA, padahal enggo idokken JAHOWA tersèngèt bekkas i taba si Daud dekket taba anakna si Salomo, “BagesKu dekket kuta Jerusalem èn, sienggo Kupilih ipas sipuluh dua suak marga Israel, imo bekkas sienggo Kutentuken bekkas mersembah taba Aku.

⁸Janah mula iuèi kalak Israel karina perèntahKu janah iulaken pati-patiin siniberèken si Musa naposongku bai kalak i, oda Kupaduè ipuari dèba kalak i i nagerri sienggo kuberèken bai empung kalak idi nai.”

⁹Tapi oda patuh kalak Juda taba JAHOWA, janah si Manasye nola ngo maing kulih sebab kalak i mengulaken dosa, jahaten dèng daripada dosa siniulaken bangsa-bangsa siniusir JAHOWA i Kanaan nai tikan ibengketti kalak Israel nagerri i.

¹⁰Kumarna i, idokken JAHOWA ngo merkitè nabi-nabi naposo JAHOWA,

¹¹“Jahat kalohon ngo raja Manasye. Ndaoh jahaten ulah-ulahna daripada ulah-ulah kalak Kanaan. Merkitè gana-gana sinibahanna, gabè merdosa ngo kalak Juda ibaing.

¹²Kemulihken i, Aku JAHOWA Dèbata sinisembah bangsa Israel, memaing sempa olpek mbellen kalohon mi Jerusalem dekket Juda, nai gabè tersengget mo gennep jelma simendengkoh simasa i.

¹³Kuhukum mo Jerusalem bagè Samaria dekket si Ahab raja Israel bak pinemparna sienggo kuhukum i. Kuapus mo Jerusalem bagè pinggan sienggo iborih janah ipebalik.

¹⁴Jelma pengisina silotna dèng tading, Kubelli mo gabè taban-taban bai musuh-musuhna, asa ipupusi janah nagerrina pè isellat kalak i.

¹⁵Kupesempa mo i karina taba ummatKu kumarna merdosa kalak i taba Aku janah idungkul pungurKu kessa nai empung kalak i mbungkas i Mesir nai soh mi ari sidari èn.”

¹⁶Laènken memaing merdosa kalak Juda taba JAHOWA merkitè menembah gana-gana, ibunuh si Manasye ma ngo nterrem jelma siso mersalah, gabè marir mo daroh i dikè sambing i Jerusalem.

¹⁷Sukuten sidèbanna i tersèngèt Raja Manasye dekket tersèngèt dosa-dosa sinibahankenna, enggo isurat ibas lapihen Tori-torien Raja-raja Juda.

¹⁸Matè mo si Manasye janah ikubur i kasèan istana, imo kasèan si Uza. Anakna si Amon mo mbangkit gabè raja singkatna.

¹⁹Merumur 22 tahun si Amon tikan mbangkit raja Juda ia janah i Jerusalem ngo ia memerèntah, dua tahun dekkahna. Inangna mergerar si Mesulemet berru si Harus, kalak Jotba.

²⁰Bagè bapana, ia pè merdosa ngo taba JAHOWA.

²¹Icodi ngo ulah-ulah bapana dekket menembah gana-gana sinisembah bapana.

²²Oda ngo mengèkutken lemmo atè JAHOWA pernggelluhna, ai gabè itadingken ngo JAHOWA Dèbata sinisembah empungna.

²³Mertaki mo pugabè-pugabè Raja Amon mengalosa janah memunuhsa i istana.

²⁴Tapi ibunuh ginemgem Juda mo simemunuh Raja Amon i, nai ipebangkit mo si Josia anakna i gabè raja.

²⁵Sukuten sidèban tersèngèt Raja Amon enggo isurat ibas bukku Tori-torien Raja-raja Juda.

²⁶Ikubur mo si Amon i kasèan Uza. Anakna si Josia mo mbangkit raja singkatna.