Read Batak Dairi 2 Raja-raja 22 Bible Online

2 Raja-raja 22 - Batak Dairi bible

2 Raja-raja 22

¹Merumur ualuh tahun ngo si Josia tikan mbangkit raja Juda, janah i Jerusalem ngo ia memerèntah 31 tahun dekkahna. Inangna mergerar si Jedida berru si Adaya i Bozkat nai.

²Iulaken si Josia ngo sipesennangken atè JAHOWA. Ièkutken ngo codi bagè Raja Daud empungna i, janah iuèi ngo karina pati-patien Dèbata ibas pusuh peratènna nai.

³Lot mo sada kalak sekrètaris Raja Josia mergerar si Safan anak si Azalya, kempu si Mesulam. I tahun pesipuluh ualuhken pemerèntahen Raja Josia, iperèntahken raja i mo taba sekrètarisna bagèen, “Dahi mo Imam Huntuen Hilkia mi Bages JAHOWA, janah dokken bana asa ibagahken buè kèpèng sienggo ipepulung imam-imam simengula i pèntu mbengket mi Bages JAHOWA.

⁵Dokken mo bana asa iberèken kèpèng i bai mandur sipeliasken Bages JAHOWA. Kennah ipergunaken ngo kèpèng i menggarar upah,

⁶tukkang kayu, tukkang okir, tukkang batu, dekket menokor kayu bak batu siniperluken.

⁷Bujur kalohon ngo mandur i jadi oda pella ikusoi enggo bakunè kèpèng i ibaing kalak i.”

⁸Ipesakat si Safan mo perèntah raja i taba si Hilkia, nai ibagahken si Hilkia mo taba si Safan enggo jumpasa bukku pati-patiin JAHOWA i Bages JAHOWA. Iberèken si Hilkia mo bukku i taba si Safan, nai ijaka si Safan mo.

⁹Enggo kessa i, balik mo si Safan mendahi raja i, ibagahken mo ukum kèpèng sinipennep i Bages JAHOWA enggo ibuat janah ipesakat naposo raja i taba mandur simengula peliasken Bages JAHOWA.

¹⁰Nai idokken si Safan nola mo, “Iberèken si Hilkia ngo bukku èn taba aku.” Nai ijakaken si Safan mo bukku i bai raja i.

¹¹Mendengkoh sin bukku i, iribaki raja i mo pakènna kumarna bonekna.

¹²Nai iperèntahken raja i mo taba Imam Hilkia, si Ahikam anak si Safan, si Akhbor anak si Mikha, si Safan sekrètaris kerajaen, dekket si Asaya pengabal raja:

¹³“Lakè mo mengkuso taba JAHOWA tersèngèt isi bukku i lako bangku dekket lako bai karina ginemgem Juda. Pu- nguren ngo JAHOWA taba kita, kumarna oda iulaken empungta perèntah-perèntah JAHOWA bagè sitersurat ibas bukku èn.”

¹⁴Nai laus mo si Hilkia, si Ahikam, si Akhbor, si Safan dekket si Asaya mengido peddah taba sada kalak daberru mergerar si Hulda. Sada kalak nabi ngo ia, merian i perkutaen rembaru i Jerusalem. Sinibalèna mergerar si Salum anak si Tikwa kempu si Harhas; simenjamoti pakèen mersembah ngo ia i Bages JAHOWA. Idengkoh si Hulda kessa mo rana kalak i,

¹⁵ipasulak mo kalak i molih mendahi raja i lako magahken kata JAHOWA bagèen:

¹⁶“Kuhukum mo Jerusalem dekket karina pengisina bagè sitersurat ibas bukku si rembaru ijaka raja i.

¹⁷Enggo itadingken kalak i Aku, janah ipèlèken ngo pèlèen taba dèbata sidèban. Karina ulah-ulah kalak i mendungkul pungurKu. Punguren ngo aku midah Jerusalem janah oda terènteppen nè pungurKu i.

¹⁸Tapi tersèngèt Raja Josia, bagèen ngo tennahKu, JAHOWA Dèbata Israel, ‘Enggo kessa idengkoh ko sitersurat ibas bukku i,

¹⁹peselsel ngo ko janah ipecerrep ko ukurmu i hadeppenKu. Enggo kuasup lako menghukum Jerusalem dekket jelma pengisina i. Kubaing mo kuta i gabè maing bejogiten kalak menengen, janah gerar Jerusalem Kubaing gabè gerar sempetta. Tapi tikan idengkoh ko tersèngèt asupKu i, tangis janah iribaki ko ngo pakènmu tanda melui. Enggo kudengkoh sodipmu,

²⁰kumarna i madèng kudabuh hukum taba Jerusalem sidekkah nggelluh dèng kono. Mènak ngo permatèmu.’ ” Nai balik mo pasulakken i mendahi raja janah memagahken tennah i.