Read Batak Dairi 2 Raja-raja 23 Bible Online

2 Raja-raja 23 - Batak Dairi bible

2 Raja-raja 23

¹Idiloi raja Josia mo karina pengulu-pengulu Juda dekket Jerusalem.

²Nai rebbak laus mo ia dekket kalak i mi Bages JAHOWA, ièkutken imam-imam, nabi-nabi dekket karina jelma nterrem, sincor barang sibèak pè. Cènder mo raja i i gembar binangun bekkas raja i hadeppen kalak i karina, nai nggang mo ijakaken karina isi bukku perpadanen sienggo jupa ibas Bages JAHOWA. Enggo kessa i ibulabanken raja i mo taba JAHOWA magahken kennah tunduk tabasa, janah mengulaken karina perèntah bak pati-patien i ibas pusuh peratèenNa nai. Merjandi ma ngo raja i lako menguèi hatoren perpadanen JAHOWA dekket ummatNa bagè sitersurat ibas bukku i. Karina sinterrem i pè merpadan ngo lako menguèi perpadanen i.

⁴Enggo kessa i iperèntahken raja i mo taba Imam Huntuen Hilkia, imam-imam pengurupi dekket karina pertaram i pèntu Bages JAHOWA, asa ikaruarken i bages i nai karina perkekkas lako mersembah taba Baal, Asyera dekket taba bintang-bintang. Ilekkup Raja Josia mo i karina i ruar kuta mayak Lembeng Kidron, nai iembah mo abuna mi Betel.

⁵Ipettadi ma mo imam sinipebangkit raja-raja Juda lako mengula i bekkas persembahen taba sembahen i suberri kuta Judea dekket i sikuliling Jerusalem, bagi bang imam-imam simèlèken taba Baal, mataniari, bulan dekket silot i abang-abang bak bintang-bintang.

⁶Ipedarat mo gana-gana Asyera i Bages JAHOWA nai janah iembah mi ruar kuta mi Lembeng Kidron. Ilekkup mo gana-gana i isidi, nai harangna itutu melèmet, nai icircirken mo abuna i mi babo perkuburen sinterrem.

⁷Bilik-bilik ibas Bages JAHOWA sinipakè perlangkah julu meddem lako merlangkah julu meddem mahan pèlèen taba sembahen irumpakken mo. (I bilik i ngo daberru-daberru mertenun kaèn lako pakèen tikan mersembah taba Asyera.)

⁸Karina imam simerian i kuta silot i Judea idokken si Josia ngo roh mi Jerusalem, nai barang i dikè sambing lot i suberri Judea langgaten-langgaten sembahen bekkas-bekkas imam memèlèken pèlèen, ikotori mo asa melamun. Oda ipadiat imam-imam i mengulaken persembahen i Bages JAHOWA. Tapi ndorok ngo kalak i kipangan roti siso meragi, sinipèmaken taba dengan kalak i. Irumpakken ngo langgaten bekkas mer- sembah taba sembahen, sini pèntu Pengkeruhen Jusua wali kuta nagerri i. Pèntu i kan kambirang pèntu Pengkeruhen Mbellen i dalan lako mbengket mi kuta ngo.

⁹

¹⁰Ilamuni ngo Tofet imo bekkas mersembah sembahen i Lembeng Hinom. Merkitè bagidi oda lot nèngè jelma memèlèken dukakna mahan pèlèen situtungen bai sembahen Molokh.

¹¹Karina kuda sienggo ipepulik raja-raja Juda lako pèlèenken taba mataniari iambongken janah kurèta sinipakè lako memèlè i pè ilekkup. (I kasèan Bages JAHOWA kin ngo ibaing kurèta-kurèta i — i gembar pèntu pengkeruhen — oda ndaoh i bekkas merian si Natan Melekh, sada kalak perpangkat ndates.)

¹²Irumpakken ma ngo langgaten-langgaten sinibahan raja-raja Juda i babontarum bilik Raja Ahas. Bagi ma dekket langgaten sinipajek Raja Manasye, i dua kasèan Bages JAHOWA ireppuki si Josia ngo, nai iambongken mi Lembeng Kidron.

¹³Bagi bang langgaten-langgaten sikan kebincaren Jerusalem, sikan selatan uruk Kejahaten pè ilamuni ma ngo. Si Salomo ngo memajek langgaten-langgaten sinisidi bekkas mersembah taba sembahen sinikecegoken — imo Asytoret sembahen bangsa Sidon, Kamos sembahen bangsa Moab dekket Milkom sembahen bangsa Amon.

¹⁴Irumpakken ma ngo tugu sembahen dekket gana-gana Asyera, nai ibaing si Josia mo tulan-tulan jelma mi tanoh bekkas tugu bak gana-gana ipecènderi.

¹⁵Icèdai ma ngo bekkas persembahen i Betel sinipajek Raja Jerobeam anak si Nebat — raja simemaing merdosa kalak Israel. Nai isepperken si Josia mo langgaten bekkas mersembah i janah ilekkup rebbak dekket gana-gana mejan Sembahen Asyera sinisidi.

¹⁶Tumulih mo si Josia, nai idah mo tah piga-piga kuburen i babondelleng. Ipasulak mo kalak lako mengkurak kuburen i, janah ikaruarken tulan-tulan sinisidi i janah ilekkup i langgaten sienggo mergollah i. Bagi mo ibaing mengelamuni langgaten i. Nai saut mo sinialamatken nabi JAHOWA arnia, tikan cènder Raja Jerobeam i gembar langgaten i tikala lot pèsta i sidi. Enggo kessa i idah Raja Josia mo sada nai kuburen sidèban.

¹⁷Nai ikusoken mo, “Kuburen isè ngo èn?” Ialoi kalak Betel mo, “Kuburen sada kalak nabi JAHOWA ngo i, nung kin roh i Judea nai mi sèn, simengaramalken bagè sienggo ibahanken raja i ndai tersèngèt langgaten èn.”

¹⁸“Ulang kekadè kènè kuburen i,” nina raja i. “Belli kènè mo tulan-tulanna hot i si, ulang ilompat!” Jadi oda mo ikekadè tulan-tulan nabi siroh i Judea i nai; bagi ngo bak tulan-tulan nabi i Samaria i nai sinikubur i si.

¹⁹Irumpakken Raja Josia ngo karina bekkas mersembah taba dèbata sidèban sinipajek raja-raja Israel, janah mendungkul pungur JAHOWA i gennep kuta suberri Israel. Bagè sinibaing Raja Josia i Betel bagi ma ngo ibaing mi karina langgaten i suberri Israel.

²⁰Karina nangguru simerkebbas i bakkas menembah dèbata sidèban i ibunuh ngo i babo langgaten bekkas kalak i merkebbas. Janah i gennep langgaten-langgaten i, itutung si Josia ngo tulan-tulan jelma. Enggo kessa i balik mo ia mi Jerusalem.

²¹Nai iperèntahken Raja Josia mo ginemgemna memèstaken Paskah bagè sitersurat ibas bukku Padan dekket JAHOWA. Merkitè bagidi ipesangap kalak i mo JAHOWA Dèbatana.

²²Kessa nai iperèntah lubalang-lubalang bangsa Israel madèng pennah raja Israel barang raja Juda memèstaken Paskah bagidi.

²³Kessa pè i tahun pesipuluh ualuhken pemerèntahen si Josia i asa ipèstaken nola Pèsta Paskah i Jerusalem lako pesa- ngapken JAHOWA.

²⁴Lako mengulaken hatoren-hatoren sitersurat ibas bukku sidapet Imam Huntuen Hilkia i Bages JAHOWA, ipelaus Raja Josia mo karina nagguru simenenggoi sumangan dekket pertendung i Jerusalem nai dekket i suberri Judea nai, nai iambongken mo karina sembahen perjabu-jabu, gana-ganaen dekket karina haliu sinipakè lako menembah dèbata sidèban.

²⁵Oda dèng nung lot bagè Raja Josia simenguèi bai JAHOWA ipas karina pusuh peratènna nai, janah ipacidah ngo i ibas nggelluh dekket pengelakona tosè bagè hatoren silot ibas bukku si Musa. I podi Raja Josia pè oda nè lot bagèsa.

²⁶Tapi ukum ulah-ulah Raja Manasye enggo mendungkul laga JAHOWA taba Juda; janah oda dèng malap lagaNa i.

²⁷Idokken JAHOWA ngo, “Kadè sienggo Kubaing taba Israel, kennah Kubaing ma ngo bagi taba Juda. Kubuang mo kalak Juda i nagerri siKuberèken bai kalak i nai. Kutulak mo Jerusalem kuta siKupilih i, dekket bagesKu èn pè, sienggo Kudokken kin gabè bekkas mersembah taba Aku.”

²⁸Matè i Megido ngo Raja Josia tikan mergaraha mengalo si Nekho raja Mesir sienggo roh rasken soridaduna mengurupi raja Assur i biding Laè Efrat. Ibuat pertaramna mo bangkè Raja Josia, nai iembah mo balik ipas kurèta mi Jerusalem. Ikuburken mo ia i sidi i perkuburen raja-raja. Nai ipilih janah ipebangkit kalak Juda mo si Joahas anakna i gabè raja sumingkatsa. Sukuten sidèbanna dèng tersèngèt Raja Josia, isurat ngo ibas bukku Tori-torien Raja-raja Juda.

²⁹

³⁰

³¹Merumur 23 tahun ngo si Joahas tikan mbangkit ia gabè raja Juda janah tellu bulan ngo dekkahna ia memerèntah i Jerusalem. Inangna mergerar si Hamutal berru si Jeremia i kuta Libna nai.

³²Merdosa ngo si Joahas taba JAHOWA bagè empungna.

³³Mentadi mo pemerèntahen si Joahas tikan itaban si Nekho raja Mesir ia i Ribla, i nagerri Hamat, janah memaksa kalak Juda menggarar belasting bana 3.400 kilo pirak dekket 34 kilo emmas.

³⁴Nai ipebangkit Raja Nekho mo anak si Josia mergerar si Elyakim gabè raja Juda, janah igancihi mo gerar si Elyakim gabè Joyakim. Iembah ngo si Joahas mi Mesir janah matè i si ngo ia.

³⁵Lako menggarar belasting sienggo itentuken raja Mesir, itunggu Raja Joyakim ngo bai ginemgemna nai sadikè sindorok terbakinsa.

³⁶Merumur 25 tahun ngo si Joyakim tikan mbangkit ia gabè raja Juda, janah 11 tahun dekkahna ia memerèntah i Jerusalem. Inangna mergerar si Zebuda berru si Pedaya i kuta Ruma nai.

³⁷Merdosa ngo si Joyakim taba JAHOWA bagè empungna.