Read Batak Dairi 2 Raja-raja 25 Bible Online

2 Raja-raja 25 - Batak Dairi bible

2 Raja-raja 25

¹Nai memberontak mo si Zedekia taba si Nebukadnezar raja Babel. Kemulihken i roh mo si Nebukadnezar rasken dekket karina tenterrana lako menjuhap Jerusalem tupung ari sipuluh bulan sipuluh ibas pesibah tahunken pemerèntahen si Zedekia. Ibahan kalak i mo markasna i ruar kuta, ibahan ma mo parik mengkubu,

²janah terrus ngo ikubu kuta i soh mi tahun pesipuluh sadaken pemerèntahen si Zedekia.

³I ari sibah bulan empat tahunkenna i tikan enggo masa lèhè matè kocing, nai karina jelma malot nèngè giam panganna cituk pè mèter

⁴irumpakken musuh mo pagar batu kuta i. Mperrus mo bernginkenna i karina tenterra Juda mi Napa Jordan, tukasi pè ikubu kalak Babel kuta i. Arap dalan pekken istana ngo kalak i medalan nai karuar mo kalak i arap pengkeruhen perdemuen pagar batu sidua i i bekkas i.

⁵Tapi iletlet tenterra Babel ngo Raja Zedekia, itangkup mo ia i kendet Jeriko. Mperrus mo karina parangenna menadingkensa.

⁶Nai iembah kalak i mo Raja Zedekia taba Raja Nebukadnezar i kuta Ribla, nai ihukum matè mo ia.

⁷Dukak-dukakna pè ibunuh ngo ipetengen-tengen. Enggo kessa i icokil mo mata si Zedekia, nai irantè janah iembah mi Babel.

⁸I ari pitu bulan lima tahun pesipuluh sibahken pemerèntahen raja Nebukadnezar raja Babel roh mo mi Jerusalem sada kalak mergerar si Nebuzaradan. Sada kalak pemernoi janah pakalima tenterra si Nebukadnezar ngo ia.

⁹Itutung si Nebuzaradan mo Bages JAHOWA, istana raja dekket karina bages simpantasniasè i Jerusalem.

¹⁰Nai karina parangenna mengerumpakken pagar batu kuta i.

¹¹Nai jelma silotna dèng i kuta i, imo sipandè mengula, kalak sincor dekket kalak sienggo gabè merbalik kan kalak Babel, iembah si Nebuzaradan ngo karina mi Babel.

¹²Tapi itadingken ngo dèba kalak sincorna kalohon dekket siso lot kadèna itadingken i Juda, janah idokken me- ngula pekken anggur dekket juma.

¹³Tihang-tihang tembaga dekket kurèta-kurèta i Bages JAHOWA rebbak dekket kancah tembagana ipustakken kalak Babel ngo, janah iembah ngo karina tembaga i mi nagerrina.

¹⁴Iembah kalak i dèng ma ngo barang-barang èn: telam-telam, bekkas abu langgaten, perkekkas-perkekkas pelita, mangkuk-mangkuk bekkas daroh pinakan sinisembellih mahan pèlèen, sarim-sarim perdahupaen, dekket karina harta tembaga sidèbanna dèng sinipakè tikan pulungen mersembah.

¹⁵Harta emmas bak pirak, dekket mangkuk-mangkuk kètèk bak pahar bekkas rara api, ibuat si Nebuzaradan sendiri ngo.

¹⁶Mbotong kalohon ngo barang-barang tembaga sinibahan Raja Salomo i Bages JAHOWA imo dua tihang kurèta-kurèta dekket kancah, oda tertimbang kumarna botongna.

¹⁷Dos ngo duana tihang tembaga i; meradu 8 mèter datesna dekket tersada koncir tihang i 1,3 mèter datesna. I sikuliling koncir tihang i, iokir ngo perbuah ndalima ipas tembaga nai.

¹⁸Laènkenna i, itangkup si Nebuzaradan ngo Imam Huntuen Seraya si Sefanya pengu- rupi imam, tellu kalak simenjaga pèntu Bages JAHOWA, silima kalak penasèhat raja simerian i kuta i dèng, lubalang, alingen lubalang, simengurus surat-surat soridadu dekket 60 kalak nai simerpangkat.

²⁰Karina kalak i iembah ngo mendahi Raja Nebukadnezar mi kuta Ribla,

²¹ladang Hamat. Isiksa mo kalak i isidi, nai ibunuh mo. Bagi mo carana kalak Juda itaban i nagerri kalak i nai iembah mi buangen.

²²Enggo kessa i, ipebangkit si Nebukadnezar mo si Gedalya anak si Ahikam kempu si Safan gabè Gubèrnur i Juda lako memerèntah karina jelma sitadingna dèng i si.

²³Idengkoh lubalang bak soridadu siso menerrah taba Babel kessa mo tersèngèt ipebangkit raja i, roh mo karina kalak i mendahi si Gedalya mi Mizpa. Lubalang-lubalang i imo si Ismael anak si Netanya, si Johanan anak si Kareah, si Seraya anak si Tanhumet i kuta Netofa nai dekket si Jazanya i kuta Maakha nai.

²⁴Idokken si Gedalya mo taba kalak i karina, “Ulang pella mbiar kènè midah simerpangkat pemerèntah Babel. Merian i nagerrinta èn mo kènè janah gabè hamba raja Babel. Kutanggung, njuah-njuah ngo kènè.”

²⁵Tapi i bulan pitu tahunkenna i, berkat mo si Ismael anak si Netanya, kempu si Elisama pemparen raja rebbak dekket 10 kalak denganna, laus mi Mispa. Ijuhap janah ibunuh kalak i mo si Gedalya rebbak dekket kalak Juda bak kalak Babel sirebbak si Gedalya i si.

²⁶Nai mperrus mo karina kalak Juda mm Mesir, bèak barang ncor pè, rebbak dekket lubalang-lubalang kumarna buradan midah kalak Babel.

²⁷I ari duapuluh pitu bulan sipuluh dua, imo tahun petellupuluh pituken enggo kessa iembah si Joyakhin mi buangen, mbangkit raja Babel mo si Ewil-Merodakh. Tahunkenna i ma, ibaing mo masèh atèna taba si Joyakhin, ipaluah mo ia i kurungen nai,

²⁸janah maing mendè bana. Datessen ngo ibaing si Joyakhin i daripada raja-raja sidèban sirebbak ibuang mi Babel.

²⁹Oda nè mo pakèen kurungan ipakkè si Joyakhin, janah mangan i istana mo ia ninganna iberrè kèpèng bana lako menokor siperlu mi nggelluhna.