Read Batak Dairi 2 Raja-raja 3 Bible Online

2 Raja-raja 3 - Batak Dairi bible

2 Raja-raja 3

¹I tahun pesipuluh ualuhken pemerèn- tahen si Josafat raja Juda, mbangkit raja mo si Joram anak si Ahab i Israel janah i Samaria ngo ia memerèntah dua bellas tahun dekkahna.

²Mengulaken jahat ngo ia i penengenen JAHOWA, tapi oda mèter bagè jahat si Ahab dekket si Izebel pertuana i. Irumpakken ngo gana-gana sinibahan bapana lako menembah Baal.

³Tukasi pè bagi tosè bagè Raja Jerobeam anak si Nebat, simemerèntah sinderrang oda dèng ia. Ia pè memaingken merdosa ngo kalak Israel janah oda mengadi-ngadi mahanken bagi.

⁴Lot mo jampalen biri-biri Raja Mesa kan Moab nai. Sikira belastingna taba raja Israel, iberèken ngo gennep tahun 100.000 anak biri-biri dekket bukbuk biri-biri tonggal 100.000 ma.

⁵Tapi enggo kessa matè Raja Ahab, memberontak mo si Mesa taba Israel.

⁶Kumarnana i, mèter berkat mo Raja Joram i Samaria nai janah mendokken asa kebbas karina soridaduna.

⁷Itennahken ma mo taba Raja Josafat i Juda, “Enggo memberontak raja Moab taba aku; uè ma ngo kè mergeraha rebbak dekket aku mengalosa?” “Jadi,” nina Raja Josafat mo mengaloi. “Roh pè aku dekket parangenku bak soridadu merkuda mengèkutken kènè.

⁸Arap dalan paina ngo kita lako menjuhap?” “Arap dalan mengelausi padang gurun Edom mo kita,” nina si Joram mengaloi.

⁹Nai berkat mo Raja Joram rebbak dekket raja Juda bak raja Edom. Enggo kessa merdalan pitu ari dekkahna, kerri mo laè kalak i, gabè oda nèngè mènum nuhnuhen kalak i dekket pinakan simerembah perkekkas kalak i.

¹⁰“Enggo cilaka kita!” nina Raja Joram. “Enggo pana isura-suraken JAHOWA lako pesakatken kita sitellu bai raja Moab.”

¹¹Mengkuso mo Raja Josafat, “Oda ngo lot i sèn nabi sindorok perkitènta mengkuso JAHOWA?” Sada kalak ipas lubalang Raja Joram nai mengaloi, “Lot ngo, imo si Elisa anak si Safat. Naposo si Elia ngo ia tikala i.”

¹²“Tuhu! Mengerana ngo JAHOWA merkitèsa,” nina Raja Josafat. Nai laus mo raja sitellu i mendahi si Elisa.

¹³“Kasa mengido pengurupien kènè mendahi aku?” nina si Elisa taba raja Israel. “Mendahi nabi-nabi partuamu sambing mo ko laus.” “Oda,” nina si Joram. “Kumarna JAHOWA ngo enggo mersura-suraken pesakatken kami sitellu bai raja Moab.”

¹⁴Ialoi si Elisa mo, “Merkitè gerar JAHOWA singgelluh janah sikuuèi i tangkas mo kubagahken, ukum oda kin kumarna Raja Josafat sikuhormati i, oda uè aku mengeranai dekket kono.

¹⁵Bagèndari pè embah mo mi sèn sada kalak sipandè merkucapi.” Sinderrang igerrit perkucapi i kucapina, mèter ikuasai Tendi JAHOWA mo si Elisa,

¹⁶gabè mengerana mo ia, “Bagèen ngo pendokken JAHOWA; ‘Kurak kènè mo parik i lembeng-lembeng èn.

¹⁷Tukasi pè oda idah kènè roh udan barang angin menempul, tapi merginja-ginja mo laè i kubuk-kubukèn. Karina kènè bak pinakan simerembah barang perkekkas ndènè i terolih laè cukup ènumen soh pulak.’ ”

¹⁸Nai idokken si Elisa dèng ma, “Tapi cituk dèng ngo i bai JAHOWA. Iberèken dèng ma ngo kemenangen bai ndènè meraloken kalak Moab i.

¹⁹Karina kuta kalak i, gotting janah merandal kennah irumpakken kènè ngo; karina kayu simerbuah irabbatken kènè, karina telaga isompel kènè janah karina juma kalak i singgaburna ibentiri kènè mo dekket batu gabè ncèda mo karinana.”

²⁰Sibarembenkenna tupung mèlèken pèlèen siceggen, menjarir mo laè i Edom nai, gabè idomi mo lembeng bak parik i.

²¹Idengkoh kalak Moab kessa mo enggo roh raja sitellu i lako menjuhap, gabè karina jelma — tua-tua soh mi simengudana dèng — sindorok merembah senjata, ipedempu janah ipepulung mi perbalengen.

²²Sibarembenkenna siceggen ndungo kesa kalak i icuhayai mataniari mo babo laè i, gabè taridah mo mbara bagè daroh.

²³Mersurak mo kalak i, “Daroh! Enggo pana mersijuhapen soridadu musuh sitellu nuhnuhen i janah mersibunuh bana! Ita kènè mo asa sitaban perundung-undungen kalak idi!”

²⁴Keppè, soh kessa kalak Moab i mi perundung-undungen i, ilentem kalak Israel mo kalak i, nai barat-burut mo kalak i janah terrus iletlet ninganna ibunuhi mo kalak i,

²⁵janah mengerumpakken kuta kalak i. Nasa juma nggabur sinibellus kalak i, ibentiri kalak i dekket batu. Ujungna karina juma enggo isangkemmi batu. Isompel kalak Israel ma mo karina telaga janah irabbatken karina batang suan-suaen. Pellin kuta Kir-Hareset kuta èkuten Moab nai ngo kessa tading. Perpodi kuta i pè ikubu mo janah i arimbalangi dekket batu.

²⁶Satdar kessa mo raja Moab oda terbaingsa nè mertahan, ipepulung raja Moab mo pitu ratus kalak soridaduna sipandèna kalohon memakè peddang, nai icuba mo menessak pertahanen raja Edom, tapi sia-sia ngo.

²⁷Kemulihken i, ipèlèken mo anakna situaen i babo dingding batu kuta i mahan pèlèen bai sembahen Moab. Nai mbiar mo kalak Israel gabè mundur mo kalak i i kuta i nai, janah balik mo kalak i mi kutana.