Read Batak Dairi 2 Raja-raja 4 Bible Online

2 Raja-raja 4 - Batak Dairi bible

2 Raja-raja 4

¹Tikan sidari roh mo sada kalak daberru mbalu tading-tadingen sada kalak nabi mendahi si Elisa mendokken, “Ukum sinibalèngku enggo mo matè. Ibettoh kènè ngo, ia pè sada kalak merkebiaren taba Dèbata ngo, tapi lot ngo utangna bai dèba. Bagèndari roh ngo perutangen i naing meraleng dukakku sidua kalak i asa ibaing gabè hambana sikira garar utang sinibalèngku arnia.”

²“Bakunè ndia kubaing mengurupi kènè nangè?” nina si Elisa mengaloi. “Kadè ngo lot i sapo ndènè?” “Laènken minak zaitun sada botol kètèk, kadè poda lot nèngè,” nina daberru i mengaloi.

³Nai nina si Elisa mo, “Lakè mo menginjam mbuè kalohon botol numar bai gembar sapo ndènè nai.

⁴Enggo kessa i masuk mo kènè dekket dukak ndènè i mi sapo janah tutup kènè mo pèntu. Arirken kènè mo minak i botol kètèk i nai mi botol-botol siniinjam ndènè i, janah pejaè kènè botol sienggo dom.”

⁵Nai balik mo daberru i mi sapona. Enggo kessa masuk kalak i mi sapo janah igerruk pèntu, ibuat mo botol kètèk sin minak zaitun i, nai iarirken mo minak i mi botol-botol siniberèken dukakna i bana.

⁶Enggo kessa dom botol i karina, ipido nola mo sada nai botol. “Enggo kerri,” nina sada kalak dukakna i nai mo mengaloi. Nai oda nè mo marir minak i.

⁷Nai idahi daberru i nola mo si Elisa, gabè idokken si Elisa mo, “Dèa kènè mo minak i menggarar karina utang ndènè i, janah ibana i enggo cukup mahan kenggeluhen ndènè bak dukak-dukak ndènè i.”

⁸Lot mo sada kalak daberru kaya i Sunem. Tikan sidari sinderrang roh si Elisa mi Sunem, idilo daberru i mo si Elisa mangan mi bagesna. Mulai i sidi nai, gennep singgah si Elisa i Sunem dak mangan i bages daberru i mo ia.

⁹Nai idokken daberru i mo mbang sinibalèna, “Tok ngo aku, ukum kalak singgati singgah mi sèn i, tuhu-tuhu ngo ia sada kalak naposo Dèbata.

¹⁰Selloh ngo mula sibahan sada bilik kèdèk kan tèngkat babo bagèsta èn, janah sibaing ma mo i si pedemmen, mèja, karosi dekket lampu asa i si ia meddem gennep roh ia mendahi kita.”

¹¹Nai tikan sidari, roh ma mo si Elisa mi Sunem. Laus kessa ia mi bilikna lako pepalumken ledjana,

¹²ipasulak mo si Gehazi naposona i mendiloi daberru i. Roh kessa daberru i, idokken si Elisa mo taba si Gehazi,

¹³“Kusoi mo ia, bakunè kubaing memales kelejaenna i banta. Tah bakunè sèkel ia asa kudahi raja barang pakalima lako mengerana siperlu bana.” Ialoi daberru i mo, “Rebbak kadè-kadèngku ngo aku janah oda lot barang kadè kurang.”

¹⁴Nai ikusoi si Elisa mo si Gehazi, “Mula bagi, kadè mo ndia sindorok kubaing bana?” Ialoi si Gehazi mo, “Oda lot dukakna janah sinibalèna pè enggo tua-tua.”

¹⁵“Diloi mo daberru i,” nina si Elisa. Roh mo daberru i janah cènder i babah pèntu.

¹⁶Nai idokken si Elisa mo mbangsa, “Bagèen tahun siroh, enggo mengabing sada daholi anak mbara kènè.” “Ialè Pa, ulang luap kènè, otang naposo Dèbata ngo kènè!” nina daberru i.

¹⁷Tapi tuhu ngo bagè sinidokken si Elisa i. Tahun sirohna, dos mi tikki sienggo idokken, itubuhken daberru i mo sada anak.

¹⁸Enggo kessa mbelgah anak i, tupung sidari tikan mosin peranien laus mo anak i mendahi bapana mi juma tikan merani dekket pengurupina.

¹⁹Sintempu mèter mendeherreng mo anak i janah idiloken taba bapana, “O nangè. Ncio takalku!” “Taruhken mo anak èn mendahi inangna,” nina bapana taba sada kalak naposona.

²⁰Itaruhken mo anak i mendahi inangna, nai iabing inangna mo ia. Keppè cibonna i, matè mo anak i.

²¹Idokong inangna mo ia mi babo, mi bilik si Elisa, ipegalè mo ia mi pedemmen. Enggo kessa i karuar mo ia janah ikonci pèntuna,

²²nai berkat mo ia mendiloi sinibalèna. Idokken mo, “Dokken mo sada kalak naposonta roh mi sèn mengiring sada kalodè. Kennah ndor aku laus mendahi Nabi Elisa, janah ndor ma ngo aku balik.”

²³“Kasa kennah laus ko bagèndari? Ai so ari Sabat ari èn janah oda ma ngo ari raya peltak bulan,” nina sinibalèna i mengkusoi. “Oda pella kadè i,” nina mengaloi.

²⁴Enggo kessa ipelanoi kalodèna i, nina mo mbang naposona i, “Patcu mo kalodè èn asa nderras lojang; ulang kurangi ndersana mula oda kudokken.”

²⁵Nai berkat mo daberru i mendahi si Elisa mi Delleng Karmel. Ndaoh dèng pè, enggo mo idah si Elisa roh daberru i. Idokken si Elisa mo mbang si Gehazi, “Tengen mo, roh ngo partua ibages sini Sunem i nai.

²⁶Kettu mo simbaki ia, janah kusoken bakunè kalak i sisimpangaen.” “Selloh ngo karina,” nina daberru i mbang si Gehazi.

²⁷Tapi soh kessa ia mi lebbè si Elisa, sujud mo ia ninganna ikaol nèhè si Elisa. Naing mo ipelaus si Gehazi ia i sidi nai, tapi idokken si Elisa mo, “Belli bagi. Bagè bonek kalohon ngo ia. Tapi oda lot barang kadè ibagahken JAHOWA bangku!”

²⁸Mengerana mo daberru i, “Ialè Pa, oda nung kupido anak bai ndènè nai. Enggo kin ma ngo kudokken bai ndènè, asa ulang terdehèrep aku ibaing kènè.”

²⁹Itulihken si Elisa mo si Gehazi, nina mo, “Sudu mo! Embah tongketku janah terrus mo ko mi bagesna. Ulang tendo ko merrèken salam barang taba isè sambing pè simbak ko i dalan i. Mula lot kalak merrè salam bamu, ulang mago baing tikki lako memales salamna i. Enggo kessa soh ko, baing mo tongketku èn mi daging anak i.”

³⁰Idokken daberru i mo, “Bagè sèntengna nggelluh JAHOWA dekket kessah ndènè, oda uè aku menadingken Kènè.” Kumarnana i, rebbak berkat mo si Elisa bak daberru i mi bagesna.

³¹Ukum si Gehazi enggo perlebbè laus lako memaing tongket si Elisa mi daging anak i, tapi oda lot sora barang tanda-tanda magahken nggelluh anak i. Nai isimbaki si Gehazi mo si Elisa lako magahken, “Oda lot ndungo anak i.”

³²Enggo kessa soh si Elisa mi bages daberru i ibengketti mo bilik i sadasa, nai idah mo bangkè anak i gampar i babo pedemmen.

³³Igerruk si Elisa mo pèntu, nai mersodip mo ia taba JAHOWA.

³⁴Enggo kessa i, tangkep mo ia mi babo anak i, ibaing mo dais babah, mata, bak tanganna mi babah, mata bak tangan anak i. Kumarna bagi ibaing, gabè mpeddas mo daging anak i.

³⁵Kèkè mo si Elisa janah merdalan mo ia merkessing-kessing i bilik i, nai tangkep nola mo ia mi babo anak i. Nai mènter barcihen mo anak i pitu kali janah ibidakken mo matana.

³⁶Ipasulak si Elisa mo si Gehazi mendiloi inang anak i janah roh kessa daberru i, idokken si Elisa mo mbangsa, “En ngo anak ndènè i nangè.”

³⁷Sujud mo daberru i i lebbè si Elisa, nai iembah mo anak i mi ruar.

³⁸Tikan sikali masa mo lèhè mbellen i suberri aur. Nai balik mo si Elisa mi Gilgal. Sinderrang mengajari simpulungen nabi-nabi ia, ipasulak mo naposona mengamet kancah, asa itasak pangaen bai kalak i.

³⁹Laus mo mi juma sada kalak ipas nabi-nabi i nai lako kirorohen. Jupasa mo bagè rumang tabunggala rambah. Ibuati mo buahna mbuè kalohon, iembah mo balik. Oda ibettoh tah buah kadè i, iirisi mo janah iroroh mo mi kancah i.

⁴⁰Enggo kessa ntasak, ibagi-ibagiken mo taba nabi-nabi i. Tapi idèng iakapi kalak i pangaen i, mèter idokken kalak i mo taba si Elisa, “Racun ngo keppè èn alè Pa.” Nai oda uè kalak i kipangan.

⁴¹Idokken si Elisa mo asa ibuat cituk topong, nai icircirken mo mi kancah i. Enggo kessa i nina mo, “Pellaken mo pangaen i.” Gabè oda nè mo mengago pangaen i.

⁴²I sada tikki sidèban nola, roh mo sada kalak daholi i Baal-Salisa nai. Iembah ngo gandum rembaru iperani dekket duapuluh roti gandum perlebbè ipotik tahunna i bai si Elisa. Nai idokken si Elisa mo naposona asa ipellaken roti i bai nabi-nabi i.

⁴³Tapi idokken naposona i mo, “Oda bias i bai seratus kalak.” Ialoi si Elisa mo, “Bagi mo pellaken asa mangan kalak i, ai idokken JAHOWA ngo asa mangan kalak i janah lot dèng ngo ibana.”

⁴⁴Nai ipellaken naposo i mo pangaen i taba kalak i. Enggo kessa pul kalak i mangan, tuhu ngo lot dèng ibana bagè pendokken JAHOWA i.