Read Batak Dairi 2 Raja-raja 5 Bible Online

2 Raja-raja 5 - Batak Dairi bible

2 Raja-raja 5

¹Si Naaman imo sada kalak pakalima Siria sinikekelengen janah ihormati raja Siria. Kumarna merkitè si Naaman ngo iberèken JAHOWA kemenangen bai kalak Siria. Pakalima Naaman kalak mahantu ngo, tapi koliten ngo ia.

²Tikan sikali ijuhap kalak Siria mo nagerri Israel. Tikan ijuhap i lot mo sada kalak daberru Israel itangkup janah iembah man tabanen, nai ibaing mo ia gabè naposo sinibages si Naaman.

³Tikan sidari idokken naposona i mo taba indukna, “O nangè, ukum laus ngo indukku mendahi nabi silot i Samaria, kennah ipemalum ngo sakitna i.”

⁴Idengkoh si Naaman kessa kata i, mèter laus mo ia mendahi raja nai isukutken mo karina sinidokken daberru i.

⁵Nai idokken raja i mo, “Selloh ngo i, berkat mo ko mendahi raja Israel. Kubaing pè surat bana.” Nai berkat mo si Naaman merembah 30.000 riar pirak, 6.000 kèpèng emmas dekket sipuluh mpasang pakèen merandal-merandal.

⁶Bagèen mo kata surat niembahna i, “Merkitè surat èn kupetandaken pakalimangku bai Rajai mergerar si Naaman asa ipemalum Rajai ia i sakitna nai.”

⁷Ijaka raja Israel kessa mo surat i mèter iribaki mo pakèenna kumarna rembekbekken, ninganna idokken, “Enggo susah, kadè ndia sebabna asa ipido raja Siria aku nina pemalumken sakit kalak èn? Ai so Dèbata aku merkuasa pegelluhken dekket pematèken jelma. Bakunè pè cari-cari dalan ngo raja Siria i bangku.”

⁸Idengkoh si Elisa mo berita tersèngèt mi si, nai itennahken mo taba raja Israel, “Kasa pella rembekbekken kono? Pasulak mo ia mendahi aku, asa ibettoh lot ngo i Israel èn sada kalak nabi.”

⁹Nai berkat mo si Naaman merkurèta mi sapo si Elisa, janah mengadi mo ia i lebbè pèntu.

¹⁰Ipasulak si Elisa mo sada kalak naposona mendokken taba si Naaman bagèen, “Laus mo kè meridi pitu kali mi Laè Jordan, asa malum iakap kènè.”

¹¹Mendengkoh i, melaga mo si Naaman, idokken mo, “Kudokdok ngo ia sendiri karuar menjumpai aku, nai mersodip taba JAHOWA Dèbatana dekket mengampèken tanganna mi dagingku sicioen èn asa mèter malum kuakap.

¹²Merandalen dèng ngo Laè Abana dekket laè Parpar i Damaskus daripada laè silot i Israel. Ndorok ngo aku meridi i si janah gabè malum kuakap.”

¹³Tapi ijolmiti pertaramna mo ia janah mendokken, “Tuan, mula idokken kin taba kènè mengulaken termahalen, kennah iulaken kènè ngo. Keppèken pellin meridi ngo kènè idokken asa mèter malum!”

¹⁴Kumarna i laus mo si Naaman mi Laè Jordan, nai iosep- osepken mo bana pitu kali mi laè i bagè sinidokken si Elisa. Nai mèter malum mo iakap si Naaman. Dagingna i pè mengolihi mo bagè daging anak perana.

¹⁵Nai balik mo ia reb- bak dekket karina denganna i mendahi si Elisa. “Bagèndari enggo kubettoh, pellin sada ngo kessa Dèbata i suberri dunia èn imo Dèbata sinisembah kalak Israel. Kumarna i, uè mo ko menjalo sikuberèken èn,” nina si Naaman.

¹⁶Ialoi si Elisa mo, “Merkitè gerar JAHOWA singgelluh i, janah sikuuèi i, oda uè aku menjalo pemerrèken barang kadè pè i.” Dak ikelkelken si Naaman mo mengèlèk asa ijalo si Elisa nemmu pemerrèkenna i, tapi dak itulak si Elisa ngo tong.

¹⁷Nai idokken si Naaman mo, “Mula lalap ngo oda uè kènè menjalo sikuberèken èn, paduè mo asa kuembah giam tanoh sadikè terembah simpasang boban. Kerna mulai bagèndari nai, pellin bai JAHOWA ngo kessa uè aku mèlèken pèlèen, oda bai dèbata sidèban.

¹⁸Tah bakunè podien èn kennah kudengani raja lako mersodip mi bages Rimon sembahen Siria, katerra pè iampuni JAHOWA mo nemmu aku.”

¹⁹Nina si Elisa mo, “Njuah-njuah mo kènè berkat.” Nai laus mo si Naaman. Oda ndekkah dèng laus si Naaman,

²⁰mersura-sura mo si Gehazi naposo si Elisa, “Nangalè, kasa ibelli ia laus oda pella menggarar? Kennah ijalo indukki ngo nemmu pemerèken kalak Siria i. Ibagasen gerar JAHOWA singgelluh i, kennah kuayaki mo ia asa kujalo giam barang kadè bana nai!”

²¹Nai iayaki si Gehazi mo si Naaman. Tikan idah si Naaman lot kalak roh, susur mo ia i kurètana nai janah ikusoi mo, “Kadè pana?”

²²Ialoi si Gehazi mo, “Sentabi dahkè. Ipasulak ngo aku magahken taba kènè. Idèng roh dua kalak nabi poso dèng i uruk Efraim nai. Nai idokken indukku asa berèken kènè 3.000 riar pirak dekket dua mpasang pakèen merandal bai nabi sidua kalak i.”

²³“Selloh, mula bagi!” nina si Naaman, janah igegohi mo asa iembah si Gehazi 6.000 riar pirak. Ibaluti si Naaman mo riar i ipas bagut-bagut, janah ibuat mo dua mpasang pakèen merandal. Karina i iberèken mo taba dua kalak naposona, ipasulak merdalan i lebbè si Gehazi.

²⁴Soh kessa kalak i mi uruk bekkas si Elisa, ijalo si Gehazi mo riar dekket pakèen i bai naposo si Naaman nai, iboniken mo mi bagesna. Ipasulak mo naposo i balik,

²⁵nai molih mo ia mi bages si Elisa. Ikusoi si Elisa mo ia, “Idikè nai ngo kono?” “Idikè nai nola mo,” nina mengaloi.

²⁶Tapi idokken si Elisa mo, “I si ngo ukurku tikan susur si Naaman i kurètana nai menimbaki ko. Oda tikkina bagèndari terolih riar dekket menokor pekken zaitun, biri-biri dekket lembu bak hamba-hamba pè.

²⁷Kumarna ijalo ko pemerèkenna i, jaloenmu ma mo dekket sakit si Naaman i. Soh mi amman sumendah dak mersakit bagidi ma mo bang pinemparmu pè.” Karuar kessa mo si Gehazi i sidi nai, gabè koliten mo ia — mbulan kalohon mo kolingna.