Read Batak Dairi 2 Raja-raja 6 Bible Online

2 Raja-raja 6 - Batak Dairi bible

2 Raja-raja 6

¹Tikan sidari kekelsohen mo nabi-nabi siniajaren si Elisa i tabasa. Idokken kalak i mo, “Pècetsu ngo bekkasta èn.

²Paduè mo kami laus menabah kayu i gembar Laè Jordan, asa kupajek kami bekkasta i sidi.” “Selloh ngo i,” nina si Elisa mengaloi.

³Sada kalak bai kalak i nai menggegohken asa dekket si Elisa rasken kalak i. Uè ngo si Elisa,

⁴nai rebbakken berkat mo kalak i. Soh kessa mi biding Laè Jordan, itabahi kalak i mo kayu i.

⁵Sintempu mèter mastak mo takkè sada kalak bai kalak i nai mi laè i, “Nong alè Pa. Kuinjam ngo janah takkè i,” nina mbang si Elisa.

⁶“Mikè ndai mastak?” nina si Elisa me- ngaloi. Ituduhken mo bekkasna mastak i, nai ikerret si Elisa mo kayu, ikebbekken mo mi bekkasna i. Mèter mombang mo mata takkè i.

⁷Idokken si Elisa mo, “Buat mo!” Idoroken kalak i mo tanganna mengamet mata takkè i.

⁸Tikan sikali mergeraha mo Siria dekket Israel. Enggo kessa merarih dekket lubalang-lubalangna, itentuken raja Siria mo i dikè kalak i kennah merundung-undung.

⁹Tapi itennahken si Elisa mo taba raja Israel lako pesèngètkensa asa ulang laus mi bekkas i, kumarna kecemmalen kalak Siria ngo merdalan arap i.

¹⁰Nai ipesèngèt raja Israel mo kalak simerian i gembar bekkas i asa tong merjaga-jaga. Bagi mo tah piga-piga kali ipesèngèt si Elisa raja i.

¹¹Kemulihkenna i seggat kalohon mo iakap raja Siria, gabè idiloi mo lubalang-lubalangna, ikusoi mo, “Kennah lot i tengah-tengahta nai menelbuh. Isè kalakna? Bagahken bangku.”

¹²Sada kalak lubalang mengaloi, “Sada kalak poda lot Raja nami. Nabi Elisa ngo sipandè ulah. Ia ngo memagahken taba raja Israel kadè siniruapken Rajai, tukasi pè i iruapken i bilik pedemmen.”

¹³“Perdimata kènè mo barang i dikè ia, asa kutangkup ia,” nina raja i. Lot mo magahken tabasa, i Dotan ngo si Elisa.

¹⁴Nai ipasulak raja Siria mo mi si sada nuhnuhen soridadu nterrem kalohon bak kuda dekket kurèta perang. Tupung berngin soh mo kalak i mi kuta i, nai ikubu mo kuta i.

¹⁵Njengkas kalohon sibarembenkenna i, ndungo mo naposo si Elisa janah laus mi ruar, nai idah mo soridadu Siria mengkubu kuta i, lengkap merkuda dekket kurèta perang. Jadi mèter balik mo ia mendahi si Elisa mendokken, “Celaka kita. Bakunè mo ndia sibaing?”

¹⁶“Ulang pella mbiar. Ai buèen dèng ngo kan kita daripada kan kalak i,” nina si Eli- sa mengaloi.

¹⁷Mersodip mo si Elisa, “Ialè JAHOWA, pejenger mo penengen naposongku èn, asa idah!” Iuèi JAHOWA mo sodip si Elisa i, asa tikan menengen naposona i, gabè idah mo delleng i sap dekket kuda bak kurèta merapi mencingkoi si Elisa.

¹⁸Nai tikan imulai kalak Siria i menjuhap, mersodip mo si Elisa, “Ialè JAHOWA, baing mo pètung nemmu kalak èn karina!” Iuèi JAHOWA ngo sodip si Elisa i, ai mèter pètung mo kalak i karina.

¹⁹Idahi si Elisa mo kalak i janah idokken mo, “Laling ngo kènè. Oda ngo èn kuta sinaing dahien ndènè i. Ekutken kènè mo aku asa kutaruhken kènè mendahi kalak sinitulusen ndènè i.” Nai itaruhken si Elisa mo kalak i mi Samaria.

²⁰Tikan ibengketti kalak i kuta idi, mersodip mo si Elisa, “Ialè JAHOWA, buka mo nemmu mata kalak i, asa merpendidah kalak i.” Iuèi JAHOWA mo sodip si Elisa i, ibuka mo mata kalak i karina, gabè lengang mo kalak i menengen, kumarna enggo i kuta Samaria kalak i.

²¹Idah raja Israel kessa kalak Siria i, mengkuso mo ia, “Bakunè Elisa, kubunuh mo kalak èn?”

²²“Ulang,” nina si Elisa mengaloi. “Salang soridadu sinitangkup Rajai tikan juhap pè oda ngo ibunuh Rajai, makinsa nola mo èn. Berrè mo kalak i mangan bak mènum, nai belli mo balik kalak i mendahi rajana.”

²³Nai merkerja mbellen mo raja Israel lako bai kalak i. Mulai i sidi nai mo ipetadi kalak Siria menjuhap nagerri Israel.

²⁴Daoh-daoh arien nola iuluken si Benhadad raja Siria mo karina soridaduna lako menjuhap kalak Israel. Ikubu kalak i mo kuta Samaria,

²⁵gabè masa mo lèhè mbellen ibagasen kuta i, sanga ngo harga sada takal kalodè ualuhpuluh riar pirak, janah dua hun kotoren ndarapati merharga lima riar pirak.

²⁶Tupung merdalan-dalan raja i i babo dingding batu kuta i, dilo-dilo mo sada kalak daberru, “Urupi aku alè raja nami!”

²⁷Ialoi raja i mo, “Mula oda JAHOWA mengu- rupi kènè, bakunè mo ndorok nola aku me- ngurupi? Ai oda lot pagèngku barang pè laè anggurku.

²⁸Kadè pana kekurangenmu?” Ialoi daberru i mo, “Enggo merarih kami dekket denganku èn, asa kupangan kami lebbèen anakku, nai sibarembenkenna nola anakna mo kupangan kami.

²⁹Kumarna bagi arih nami, kutasak kami mo anakku, janah kupangan kami. Sibarembenkenna, kudokken mo asa kumasak kami nola anakna i, keppè gabè iboniken nola mo anakna i.”

³⁰Mendengkoh i iribaki raja i mo pakèenna kumarna luina iakap. Idah kalak sicènder i gembar dingding batu i ngo, kaèn goni ngo keppè ipakkè raja i kan bagas.

³¹Idiloken raja i mo, “Sidari èn kennah matè si Elisa. Ihukum Dèbata mo aku mberrat kaloen mula oda kubunuh si Elisa!”

³²Nai ipasulak raja i mo sada kalak solo-solona mi bages si Elisa. Tikanna i tupung ngo i bagesna si Elisa dekket barang piga-piga kalak simpantas niasè roh i bages i. Sinderrang madèng soh solo-solo i, nina si Elisa mo taba simpantasniasè i, “Dengkohken kènè mo lebbè. Enggo ipasulak sipemunuh jelma lako memunuh aku. Mula soh kessa nahan ia gerruk kènè mo pèntu janah ulang padiat kènè ia masuk. I podina roh nè mo dekket raja i sendiri.”

³³Madèng dung si Elisa mengerana, enggo mo soh raja i mi si janah mendokken, “JAHOWA ngo memaing sempa kesusahen èn banta. Jadi kadè mo gunana dak kuharapken dèng pengurupiNa?”