Read Batak Dairi 2 Raja-raja 7 Bible Online

2 Raja-raja 7 - Batak Dairi bible

2 Raja-raja 7

¹Ialoi si Elisa mo, “Dengkohken pendokken JAHOWA. Baremben tupung bagèen katikana ndorok mo itokor sada riar pirak, tellu sellup berras simendèna, barang ennem sellup berras sidèbanna.”

²Ialoi naposo raja i mo, “Bakunè mo ndorok i! Oda tuhu i, agia nola gejapkenna èn roh udan gata-gutu ibaing JAHOWA i langit nai!” “Sanga ngo idah kono i masa, tapi oda makap ko pangaen i” nina si Elisa mengaloi.

³Arinkenna i lot mo empat kalak sigadamen i ruar pèntu pengkeruhen Samaria. Mengeranai mo kalak i samahsa. “Merkadè mo kita dak kundul i sèn mèma matè?

⁴Mula mi kuta kita matè rapar; i sèn pè kita ndong, matè ma ngo kita. Lotien mo kita laus mi perundung-undungen kalak Siria. Mbori mo ibunuh kalak i kita. Tapi nggèut ma ngo oda pella ikekadè kalak i kita.”

⁵Enggo kessa ramben ari, laus mo kalak i mi perundung-undungen kalak Siria, tapi sada kalak poda lot jelma idah kalak i i sidi.

⁶Kumarna enggo ibaing JAHOWA idengkoh kalak Siria bagè sora balapergunggung nterrem kalohon merkuda bak merkurèta mengeletlet kalak i. Idok kalak Siria i mo enggo iupahi raja Israel raja Het dekket raja Mesir bak balapergunggungna lako menjuhap kalak i.

⁷Kemulihkenna i barat-burut mo kalak i bernginkenna i paluahken dirina, itadingken sambing mo bagi sapo-sapona, kudana, dekket kalodèna i permalamenna.

⁸Soh mo siempat kalak sigadamen i mi gembar permalamen i, nai ibengketti kalak i mo sada sapo-sapo. Mangan mènum mo kalak idi i sidi, nai ibuat kalak i mo emmas, pirak dekket pakè-pakèen, nai laus mo kalak i memoniken i. Enggo kessa i iulaki kalak i nola mo mi si janah ibengketti nola mo sapo-sapo sidèban, bagi ma mo tong ibahanken kalak i.

⁹Mengerana mo kalak i samahsa, “Oda selloh sinibaingta èn. Selloh ngo simasa èn, janah kennah ngo sibagahken! Mula sanga sipèma soh baremben, kennah ihukum nai ngo kita. Lotien ngo sibagahken simasa èn mi istana.”

¹⁰Nai balik mo kalak i mi Samaria janah dilo-dilo taba penjaga pèntu pengkeruhen kuta i, “Enggo laus kami mi undung-undung kalak Siria, kudapet kami isè poda lot jelma i si. Kuda bak kalodè kalak i tambat ngo i bekkasna kuidah kami, janah undung-undungna bagi sambing ngo itadingken.”

¹¹Isurakken perjaga i mo berita i, gabè ibagahken kalak i ma mo mi istana.

¹²Tikanna i gellap dèng ngo ari, tapi karuar ma mo raja i i balik pedemmenna nai, janah idokken taba pugabèna, pertaramna, “Dengkohken kènè mo! Kubettoh ngo, akkal-akkal kalak Siria i. Ibettoh kalak i ngo kita èn enggo rapar, kumarna i itadingken kalak i mo undung-undungna janah laus ciboni, asa karuar kita katèna menulusi pangaen. Enggo kessa bagi mèter iserkep kalak i mo kita janah itaban mo kuta.”

¹³Mengerana mo sada kalak pugabè raja i, “Alè Raja nami, dos ngo nasipta simerian i kuta èn dekket kalak sienggo matè i. Kumerna i sipasulak mo barang piga-piga kalak memasang lima kuda ipas kudanta silotna dèng, janah laus mi si lako menengen kadè masa.”

¹⁴Nai ipilih kalak i mo barang piga-piga kalak, nai idokken raja i mo kalak i memasang dua kurèta perang, janah laus mo kalak i memerèso kadè masa bai tenterra Siria.

¹⁵Laus mo kalak i soh mi Laè Jordan. Idah kalak i mo tuk dalan i mersara-sara pakèen bak perkekkas-perkekkas. Bagi sambing ngo ipembentirken kalak Siria i karina sinderrang mperrus i kalak i. Nai balik mo pasulakken i, ibagahken mo taba raja i.

¹⁶Nai merkaruaren mo pengisi kuta Samaria i lako menaban perundung-undungen kalak Siria. Tosè bagè sinidokken JAHOWA saut mo masa tellu sellup berras simendèna barang ennem sellup berras sidèbanna pellin sada riar pirak mo kessa hargana.

¹⁷Tupung ngo tikanna i bagah-bagahen raja i memperdimata pèntu pengkeruhen kuta. Matè terdedohen jelma nterrem i mo ia i si. Masa ngo i tosè bagè sienggo idokken si Elisa kin taba raja i sinderrang roh raja i mendahisa.

¹⁸Enggo kin ngo idokken si Elisa tupung bagèen katikana i sibarembenkenna, tellu sellup berras simendèna barang ennem sellup berras sidèbanna idèa i Samaria hargana sada riar pirak.

¹⁹Janah tikanna i, idokken bagah-bagahen raja i, “Idikè ndorok i! Oda tuhu i, agia nola gejapkenna èn roh udan keppah-kepala ibaing JAHOWA i langit nai!” Nai ialoi si Elisa mo, “Sanga ngo idah kono i masa, tapi oda makap ko panganen i.”

²⁰Bagi mo masa tabasa — matè terdedohen jelma nterrem mo ia i pèntu pengkeruhen.