Read Batak Dairi 2 Raja-raja 8 Bible Online

2 Raja-raja 8 - Batak Dairi bible

2 Raja-raja 8

¹Tikan sikali ipesempa JAHOWA mo kelèhèen i nagerri Israel sanga pitu tahun dekkahna. Sinderrang madèng masa i enggo ibagahken si Elisa i taba daberru Sunem, imo anakna ipegelluh nola mengolihi. Idokken si Elisa ma ngo asa lompat kalak i sisimpangaen mi nagerri sidèban.

²Iuèi daberru i ngo sinidokken si Elisa i, janah lompat mo kalak i mi nagerri Palistin, janah merian i si.

³Enggo kessa pitu tahun mulak mo ia mi Israel. Nai berkat mo ia dekket anakna mendahi raja asa iulakken bana, bages dekket jumana kin.

⁴Tikanna i ipidoken raja i ngo taba si Gehazi naposo si Elisa, asa isukutken tersèngèt kelengangen-kelengangen sinibaing si Elisa.

⁵Tupung roh daberru Sunem i menghadep raja lako magahken pengidoenna, tupung ma mo isukutken si Gehazi tersèngèt bakunè cara si Elisa pegelluhken sada kalak anak sienggo matè. Nai nina si Gehazi mo, “Alè Raja simermulia, èn mo ia daberru i, janah èn mo anakna sibalik nggelluh i ibaing si Elisa!”

⁶Nai ikusoi raja i mo, janah isukutken daberru i ma mo tersèngèt anak i. Enggo kessa i idiloi raja i mo sada kalak pugabèna janah iperèntahken mo asa karina milik daberru i ibalikken bana, bagi ma dekket harga hasil jumana karina sidekkah pitu tahun ia i ruar nagerri.

⁷Tikan sikali laus mo si Elisa mi Damaskus. Tupung ngo tikanna i cioen Raja Benhadad. Idengkoh raja i kessa mo beritana i Damaskus keppè si Elisa,

⁸idokken mo taba si Hazael sada kalak pugabèna, “Embah mo sibasa-basa bai nabi i, janah pidoken mo asa ikusoken taba JAHOWA, tah njuah dèng kuakap barang oda.”

⁹Nai ibaing si Hazael mo embahen empatpuluh unta mermatcam bagè hasil kuta Damaskus i, nai laus mo ia mendahi si Elisa. Soh kessa mi bekkas si Elisa, nai idokken si Hazael mo, “Ipasulak naposomu Raja Benhadad ngo aku lako mengkusoken taba kènè, tah njuah dèng ma ngo makap barang oda nèngè.”

¹⁰Ialoi si Elisa mo, “Idokken JAHOWA taba aku, matè ngo ia. Tapi dokken sambing mo tabasa njuah ngo iakap.”

¹¹Nai inelnelli si Elisa mo si Hazael, gabè bulisah mo si Hazael. Sintempu mèter tangis mo si Elisa.

¹²“Kasa nola tangis kènè?” nina si Hazael mengkusoi. “Kumarna kubettoh kejahaten sinaing baingenmu taba kalak Israel,” nina si Elisa. “Ilekkup ko mo kuta gotting kalak i, janah bunuhenmu anak peranana sisellohna, bak memokkik anak mbara dekket menaka beltek daberru si berrat-berrat rumah.”

¹³“Ah, jelma siso merguna ngo aku,” nina si Hazael mengaloi, “idikè nai nola mo kuasangku sanga bagi mahantuna!” “Enggo ipacidah JAHOWA taba aku, ukum kono mbangkit gabè raja Siria,” nina si Elisa mengaloi.

¹⁴Balik kessa si Hazael mi istana ikusoi si Benhadad mo, “Bakunè ngo pendokken si Elisa?” “Nina kennah njuah ngo iakap Rajai,” dok si Hazael mengaloi.

¹⁵Tapi sibarembenkenna, ibuat si Hazael mo sirambar salimut, isernepken mo mi laè, nai idohken mo mi abè raja i, gabè matè mo. Nai gabè raja Siria mo si Hazael menggancihi si Benhadad.

¹⁶Mbangkit raja mo si Jehoram anak si Josafat i Judea tikan enggo kessa lima tahun raja Joram anak si Ahab memerèntah Israel.

¹⁷Merumur mo si Jehoram tikanna i tellupuluh dua tahun, janah ualuh tahun ngo dekkahna ia memerèntah i Jerusalem.

¹⁸Ikabini mo berru si Ahab, janah bagè ulah-ulah sisimpangaen si Ahab, ia pè merdosa ngo taba JAHOWA bagè raja-raja Israel.

¹⁹Tapi oda ngo uè JAHOWA membinasaken Juda kumarna enggo ipadanken bai si Daud naposoNa i, kennah hot ngo gabè raja pemparenna.

²⁰Tikan pemerèntahen si Jehoram, memberontak mo kalak Edom taba Juda, janah ipecèndek kalak i mo kerajaenna sendiri.

²¹Kumarna i berkat mo si Jehoram bak karina kurèta perangna lako mi Zair. Tapi ikubu soridadu Edom mo ia i si, tapi bernginna i, rebbakken menessak mo ia dekket lubalang-lubalang merkurèta, menellas musuh simengkubu i, janah mperrus mo soridadu kalak i balik mi sapona gennep.

²²Mulai i sidi nai oda ne tunduk kalak Edom taba kalak Juda. Tikanna i ma memberontak mo kuta Libna.

²³Sukuten sidèbanna tersèngèt si Jehoram enggo isurat ibas bukku Tori-torien Raja-raja Juda.

²⁴Matè mo ia janah ikubur i perkuburen raja-raja i Kuta si Daud. Anakna si Ahazia mo mbangkit raja sumingkatsa.

²⁵Mbangkit raja Juda mo si Ahazia anak si Jehoram tmkan enggo dua bellas tahun Raja Joram anak si Ahab mengerajai Israel.

²⁶Merumur duapuluh dua tahun mo si Ahazia tikanna i, janah setahun ngo dekkahna ia memerèntah i Jerusalem. Inangna mergerar si Atalya berru Raja Ahab, kempu si Omri raja Israel.

²⁷Kemulihken perkabinenna ncelket ngo perkadè-kadèenken si Ahazia dekket simpangaen Raja Ahab. Merdosa ngo si Ahazia taba JAHOWA tosè bagè ulah-ulah simpangaen si Ahab.

²⁸Dekket ngo si Ahazia mergeraha rebbak dekket si Joram raja Israel mengalo si Hazael raja Siria. Juhap ngo kalak idi i Ramot i aur Gilead. Luka ngo si Joram i perjuhapen i,

²⁹nai balik mo ia mi kuta Jizreel lako mertambar, janah idahi si Ahazia ngo ia mi si.