Read Batak Dairi 2 Raja-raja 9 Bible Online

2 Raja-raja 9 - Batak Dairi bible

2 Raja-raja 9

¹Tikanna i idiloi si Elisa mo sada kalak ipas nabi-nabi siniajarenna i, nina mo, “Merkebbas mo ko lako berkat mi Ramot i Gilead, janah embah mo botol sin minak zaitun èn.

²Soh kessa ko mi sidi, tulusi mo si Jehu anak si Josafat, kempu si Nimsi. Arahken mo sadasa mi sada bilik,

³nai arirken mo minak èn mi babontakalna ninganna dokken, ‘Idokken JAHOWA, ipebangkit ngo ko gabè raja Israel.’ Enggo kessa ibaing ko bagi, sudu mo menadingken bekkas i.”

⁴Berkat mo nabi poso i mi Ramot,

⁵nai idapet mo si Jehu dekket pakalima-pakalima sidèbanna i tupung merarih i si. Nai idokken nabi i mo, “Lot ngo kuembah berita bai Ndènè.” Ialoi si Jehu mo, “Lako bai isè?” “Bai Ndènè sendiri ngo,” nina nabi i.

⁶Nai masuk mo kalak i sidua mi bages nai iarirken nabi poso i mo minak zaitun i mi babontakal si Jehu ninganna idokken, “Idokken Dèbata kalak Israel, ‘Kuminaki mo ko gabè raja ummatKu Israel.

⁷Ibinasaken ko mo simpangaen indukmu si Ahab. Merkitè i Kuhukum mo si Izebel sienggo memunuh nabi-nabingKu dekket naposongKu sidèbanna i.

⁸Kennah matè ngo karina kadè-kadè bak usur si Ahab. Karina daholi, barang tua-tua bang poso dèng kennah Kubinasaken.

⁹Kubaing mo taba simpangansa bagè sienggo Kubaing taba sisimpangaen si Jerobeam dekket sisimpangaen si Baesa, raja-raja Israel.

¹⁰Oda ngo ikuburken kum si Izebel. Ipangani biang mo bangkèna i aur Jizreel.’ ” Enggo kessa idokken karinana i, karuar mo nabi poso i, nai laus mo ia lojang.

¹¹Balik mo si Jehu mendahi dengan-denganna, nai ikusoi kalak i mo ia, “Kadè ngo berita? Kadè pana idokken sigila i bamu?” “Ah, enggo ibettoh kènè i!” nina si Jehu mengaloi.

¹²“Malot, oda kubettoh kami i!” nina kalak i mengaloi. “Ia bagahken mo!” Ialoi si Jehu mo, “Pesohken tennah JAHOWA ngo ia, ai ipebangkit JAHOWA ngo aku gabè raja Israel.”

¹³Nai mèter ibukai dengan-dengan si Jehu i mo jubahna gennep janah ialasken i ardan i lebbè-lebbè si Jehu. Isempul kalak i mo sarunè janah menurakken, “Enggo mbangkit raja si Jehu!”

¹⁴Nai bagidi mo, mertaki si Jehu mengalo Raja Joram, si tupung tikanna i i Jezreel. Ai mi si kin ngo si Joram lako menambari ugahna tikala mergeraha i Ramot mengalo si Hazael raja Siria. Idokken si Jehu mo taba denganna pakalima-pakalima, “Mula tuju ngo atè ndènè aku gabè raja, jaga kènè mo asa ulang lot karuar i Ramot nai lako memagahken taba kalak Jizreel.”

¹⁶Enggo kessa i, ibengketti mo kurèta perangna nai berkat mo ia mi Jizreel. Tikanna i oda dèng ngo malum iakap si Joram, janah tupung ma ngo si Ahazia raja Juda menongkirsa i sidi.

¹⁷Idah pertaram palas kuta Jizreel kessa mo roh si Jehu dekket denganna idiloken mo. “Lot kalak sada nuhnuhen roh mi sèn!” Ialoi si Joram mo, “Pasulak sada kalak soridadu merkuda lako memerèso tah dengan ngo kalak i barang tah alo.”

¹⁸Laus mo pergunggung i merkuda mendapetken si Jehu, janah idokken mo, “Naing ibettoh Rajai nina, tah dengan ngo pekirohmèn.” “Oda urusenmu i!” nina si Jehu mengaloi, “Lotien mo ko rebbak dekket aku.” Idah pertaram i palas i ngo enggo soh pasulakken i mi nuhnuhen i, tapi oda balik. Nai ibagahken ma mo i,

¹⁹nai ipasulak nola mo sada kalak nai soridadu sidèban. Pasulakken èn pè bagi ma ngo tong pengkusona taba si Jehu, janah sikali èn pè ialoi si Jehu, “Oda urusenmu i! Lotien mo ko rebbak dekket aku.”

²⁰Nai ibagahken pertaram palas i ma mo enggo soh pasulakken i mi nuhnuhen i, tapi oda nè balik. Janah nina dèng ma, “Katèngku si Jehu ngo èkuten nuhnuhen i, kerna bagè sigila ngo ia mengkunduli kurèta perangna.”

²¹“Kebbasi kurètangku,” nina Raja Joram memerèntah. Ikebbasi mo kurètana, nai berkat mo Raja Joram ibas kurètana dekket Raja Ahazia menimbaki si Jehu. Pesimbak mo kalak i dekket si Jehu i pekken si Nabot arnia.

²²“Dengan ngo ko i pekirohmu èn?” nina si Joram mengkusoi si Jehu. Nai ialoi si Jehu mo, “Bakunè mo denganmu aku mula lot dèng i sèn datu dekket mula lot dèng mersembah taba bègu sinitebenaen inangmu si Izebel i?”

²³“Selbuh ngo èn Ahazia!” nina si Joram mendiloken ninganna mengèlukken kurètana lako mperrus.

²⁴Isintak si Jehu mo cèurna ipanah mo gurung si Joram tembus mi pusuhna. Geppah mo si Joram, janah matè ibas kurètana.

²⁵Nai idokken si Jehu mo taba naposona si Bidkar, “Ièngèt ko dèng ngo tikan merkuda kita mengèkutken si Ahab bapa si Joram? Tikanna i idokken JAHOWA ngo taba si Ahab, ‘Kubettoh ngo isè memunuh si Nabot dekket dukak-dukakna bari, merjandi mo Aku, kennah i pekken èn ma ngo ko kuhukum.’ ” “Kumarna i,” nina si Jehu dèng ma taba naposona i, “Ambongken bangkè si Joram i mi pekken si Nabot i, asa saut hukum Dèbata mengenna tabasa.”

²⁷Idah si Ahazia mo simasa i gabè mperrus mo ia merkurèta mi kuta Bet-Hagan. Ipellet si Jehu mo ia janah idiloken taba parangenna, “Bunuh ma mo ia!” Ipanah kalak i mo ia janah mengugahisa i dalan lako mi Gur i gembar kuta Jibleam. Tapi mperrus ngo ia soh mi Megido, janah matè i si mo ia.

²⁸Ialengi pertaramna mo bangkèna, janah iembah mo i babo kurèta balik mi Jerusalem, nai ikubur mo ia i pekuburen raja-raja i Kuta si Daud.

²⁹Mbangkit raja si Ahazia i Juda tikan enggo sebellas tahun si Joram anak si Ahab memerèntah Israel.

³⁰Soh mo si Jehu mi Jizreel. Idengkoh si Izebel kessa mo simasa i, merpangir mo ia, nai itengen mo mi terruh arap jendèla istana.

³¹Masuk kessa mo si Jehu arap pèntu pengkeruhen, idiloken si Izebel mo, “O Zimri pemunuh! Merkadè ko roh mi sèn?”

³²Itarè si Jehu mo mi jendèla ninganna mendokken, “Isè kan aku?” Mendengkoh i lot mo dua tellu kalak pugabè istana menengen mi terruh.

³³Idokken si Jehu mo taba kalak i, “Dabuh kènè mo ia mi terruh!” Nai idabuh kalak i mo si Izebel mi terruh nai igiling kurèta mo ia, mbirsak mo darohna mi dingding dekket mi kuda kurèta i.

³⁴Nai ibengketti si Jehu mo istana, janah mangan mo ia. Enggo kessa i nina mo, “Kenna sempatta ngo daberru i. Tapi tukasi pè bagidi, kubur kènè mo bangkèna kumarna berru raja ngo ia.”

³⁵Tapi tikan soh kalak sinaing me- ngaleng bangkèna i asa ikubur nemmu, keppè pellin takal-takal, tulan-tulan betekken bak nèhè nai ngo kessa idapet.

³⁶Ibagahken kessa mo i taba si Jehu, gabè nina mo, “Enggo kin ngo iramalken JAHOWA i tikan idokken merkitè si Elia naposoNa bagèen; ‘Ipangan biang mo bangkè si Izebel i Jizreel,

³⁷janah bangkèna sitadingna mersara-sara ngo bagè ceggah pinakan gabè sada kalak nè poda menandai tah bangkè isè i.’ ”