Read Batak Dairi 1 Kronika 10 Bible Online

1 Kronika 10 - Batak Dairi bible

1 Kronika 10

¹Mergeraha ngo kalak Palistin mengalo kalak Israel. I delleng Gilboa ngo kalak i juhap. Nterrem ngo kalak Israel matè i si, nai mperrus mo sitadingna i termasuk Raja Saul dekket dukak-dukakna.

²Tapi iayaki kalak Palistin mo kalak i, gabè ibunuh mo tellu kalak anak si Saul, imo si Jonatan, si Abinadab dekket si Malkisua.

³Sepbu kalohon ngo geraha i i sikuliling si Saul, kumarna ia ngo iletlet, jadi kenna panah mo ia janah luka.

⁴Nai idokken si Saul mo taba naposo simerembah senjatana, “Berkat mo peddangmu janah juluk mo aku, asa ulang ipekia-kia kalak Palistin siso menandai JAHOWA i aku.” Tapi oda uè naposo i menjuluk si Saul, kumarna mbiar ngo ia. Kumarna bagidi ibuat si Saul mo peddangna nai itinggangken mo dirina mi peddang i.

⁵Idah naposona i kessa enggo matè si Saul, ia pè idelles ma mo bana bagè pemaing si Saul i, nai matè mo ia.

⁶Nai matè mo si Saul rebbak anakna tellu kalak, jadi kumarna i dung mo kerajaenna.

⁷Idengkoh karina kalak Israel simerian i napa Jizreel kessa mo enggo mperrus bala pergunggung Israel, janah matè ngo si Saul dekket anakna, mperrus ma mo kalak i menadingken kutana. Nai itaban janah iiani kalak Palistin mo kuta kalak idi.

⁸Sibarembenkenna tikan roh kalak Palistin lako mupusi bangkè-bangkè i, idah kalak i mo enggo matè si Saul dekket anakna sitellu kalak i i delleng Gilboa.

⁹Italkasi kalak i mo baju perang si Saul, igettap mo takalna, janah iembah mo. Nai ipasulak kalak i mo utusenna mi suberri nagerri Palistin lako memagahken berita selloh i mendahi bangsa bak sembahen kalak i.

¹⁰Baju perang si Saul i pè ipennep mo mi bagasen sada rumah sembahen kalak i janah takalna igantung i rumah Dagon sembahen kalak i.

¹¹Idengkoh kalak pengisi Jabes i Gilead kessa mo pemaing kalak Palistin i taba si Saul,

¹²berkat ma mo sipangna kalohon lako mengaleng bangkè si Saul bak anakna sitellu i, nai iembah kalak i mo mi Jabes. Ikubur kalak i mo bangkèna i i terruh sada kayu mbellen, nai puasa mo kalak i pitu ari dekkahna.

¹³Matè pè si Saul i kemulihken oda i ngo setia ia taba JAHOWA, janah oda iuèi perèntahNa. Oda ngo ipido peddah bai JAHOWA nai, tapi bai sumangan sienggo matè nai nola ngo. Kemulihken i ihukum JAHOWA mo ia janah iberèken kerajaenna i bai si Daud anak si Isai.