Read Batak Dairi 1 Kronika 11 Bible Online

1 Kronika 11 - Batak Dairi bible

1 Kronika 11

¹Karina pengulu-pengulu bangsa Israel roh mi Hebron mendahi si Daud lako mendokken, “Sincelket raja i ngo kami karinana.

²Tikala i nai, tikan si Saul dèng kin pè memerèntah kami, raja i kin ngo enggo menguluken soridadu Israel gennep laus mergeraha kalak i. Janah dèng ma Dèbata Rajai pè enggo merbagah-bagah kennah Rajai ngo menguluken ummatNa dekket gabè rajana.”

³Nai merpadan mo si Daud dekket pengulu-pengulu Israel i. Nai ipebangkit kalak i mo ia gabè raja Israel bagè sienggo idokken JAHOWA merkitè si Samuel.

⁴Tikan sikali berkat mo Raja Daud dekket karina soridadu Israel lako menjuhap Jerusalem. Tikanna i Jebus ngo gerar kuta i, janah kalak Jebus ngo merian i si, ai i ngo pengisi asli kuta i.

⁵Enggo idokken kalak Jebus i taba si Daud, siso terbengketensa kuta kalak idi. Tapi mennang ngo si Daud, itaban mo bèntèng kalak i mergerar Sion. Enggo kin ma ngo idokken si Daud taba parangenna barang isè perlebbè memunuh sada kalak Jebus, gabè pakalima mo ia ibaing. Nai kumarna si Joab ngo perlebbè kalohon menjuhap kalak Jebus i, ipebangkit mo ia gabè pakalima. (Inang si Joab mergerar si Zeruya.) Enggo kessa itaban kuta Sion i, gabè merian i si mo si Daud. Kemulihkennai mo asa mulai i si nai mergerar “Kuta si Daud” bèntèng i.

⁸Ipekadè si Daud nola mo kuta i, mulai i bekkas sinipetèmbul dekket tanoh sikan kebincaren uruk i; nai iterrusken si Joab ma mo peliasken soh pul ulaen i.

⁹Makin ndekkah makin mergegoh mo si Daud, kumarna idengani JAHOWA Pergegoh siso tercodi ngo ia.

¹⁰En mo gerar-gerar lubalang si Daud sitermurmurna. Kalak i mo rebbak dekket kalak Israel mengkepkep asa gabè raja si Daud bagè sienggo iperbagah-bagah JAHOWA. Janah dak terrus ngo itoat kalak i pemerèntahenna.

¹¹Pakalima perlebbè imo si Jasobam kalak Hakhmoni, ia ngo èkuten Pakalima Sitellu. Pennah ngo tikan geraha, ialo kalak i 300 kalak janah ibunuh ngo kalak i karinana merkitè kujurna.

¹²Sipeduaken ibas Pakalima Sitellu i, imo si Eleazar anak si Dodo horong Ahohi.

¹³Tikan mergeraha i Pas-Damim, kan si Daud ngo ia mengalo kalak Palistin. Tikan naing mperrus tenterra Israel, mertahan mo ia dekket parangenna i tengah sinterpuk juma gandum, mengalo kalak Palistin i. Nai iberèken JAHOWA mo kemenangen mbellen bana.

¹⁵Tikan sidari lot mo tellu kalak ibas lubalang si Daud sitellupuluh kalak i nai roh mendahi si Daud mi bekkas mertaram i sada delleng batu i gembar Liang Adulam. Tikanna i mertaram ngo kalak i i Lembeng Refaim, janah sada nuhnuhen bai kalak i nai enggo mengkunduli Betlehem.

¹⁷Nteddoh mo si Daud mi kuta posongna i, nina mo, “Ialèh ukum lot nemmu merrèken aku mènum laè i telaga gembar pengkeruhen kuta Betlehem i nai.”

¹⁸Mendengkoh i, isessak lubalang sitellu kalak i mo kalak Palistin simertaram nisidi, nai itaku kalak i mo laè i telaga i nai, iembah mo taba si Daud. Tapi oda ngo uè si Daud mengènum, gabè iorèken nola ngo mahan pèlèen bai JAHOWA.

¹⁹Nina mo, “Merkitè gerar JAHOWA, oda terènum aku laè èn. Mula kuènum èn, dosken mengènum daroh kalak simenggiaken kessahna i ngo aku.” Nai laju ngo oda iènum si Daud laè i. Idi mo jasa lubalang mahantu sitellu kalak i.

²⁰Igerari ma ngo lubalang sitermurmur sitellupuluh kalak i, “Lubalang Sitellupuluh.” Si Abisai anggi si Joab ngo èkuten kalak i. Nung ngo ibunuh 300 kalak merkitè kujurna, janah kumernaken i mo ia termurmur. Tapi oda ngo bagè pakalima Sitellupuluh i mahantuna ia.

²²Sada kalak nai lubalang termurmur, imo si Benaya anak si Joyada kalak Kab- zeel. Kalak berrani kalohon ngo ia. Ibunuh ngo lubalang termurmur i Moab nai. Pennah tikan sidari mosin ès, ibengketti sada liang memunuh sada singa i si.

²³Nung ma ngo ibunuh sada kalak Mesir perdaging mbellen nggeddang; geddangna lebbih dua mèter. Sinjatana kujur mbellen kalohon, tapi ialo si Benaya ngo ia merkitèken palu-palu sambing. Irampasi ngo kujur sinitangan kalak Mesir i. Nai i ma mo ibaing memunuh kalakna i.

²⁴Bagi mo kelubalangen si Benaya, sada kalak ibas lubalang sitellupuluh kalak idi nai.

²⁵Ipas nuhnuhen kalak i si Benaya mo sitermurmurna, tapi oda ma mèter bagè sitellu perdalikan i. Ibaing si Daud mo ia gabè penjaga dirina.

²⁶Enda nola imo lubalang-lubalang sitermurmur sidèbanna: Si Asael anggi si Joab si Elhanan anak si Dodo kalak Betlehem si Samot kalak Harod si Heles kalak Peloni si Ira anak si Ikes kalak Tekoa si Abiezer kalak Anatot si Sibkhai kalak Husa si Ilai kalak Ahohi si Maharari kalak Netofa si Heled anak si Baana kalak Netofa si Itai anak si Ribai kalak Gibea i nagerri marga Benjamin si Benaya kalak Piraton si Hurai kalak Lembeng Gaas si Abiel kalak Araba si Asmawet kalak Bahurim si Elyahba kalak Saalbon si Hasyem kalak Gizon si Jonatan anak si Sage kalak Harari si Ahiam anak si Sakhar kalak Harari si Elifal anak si Ur si Hefer kalak Mekherati si Ahia kalak Peloni si Hezrai kalak Karmel si Naari anak si Ezbai si Joel anggi si Natan si Mibhar anak si Hagri si Zelek kalak Amon si Maharai kalak Beerot, simerembah sinjata s(...)