Read Batak Dairi 1 Kronika 12 Bible Online

1 Kronika 12 - Batak Dairi bible

1 Kronika 12

¹Tikan mperrus si Daud i lebbè Raja Saul nai, laus mo ia mi Ziklag. Mèduk ngo lubalang setia janah merpengalamen roh pesadaken dirina taba si Daud.

²Ibas marga Benjamin nai ngo kalak i bagè si Saul. Pandè ngo kalak i memanah dekket mengarimbalang — tangan kamuhunna barang pè menjaluki.

³Si Ahiezer dekket si Joas dukak si Semaa ngo èkuten kalak i, i Gibea nai. Gerar-gerar kalak i imo: Si Jeziel dekket si Pelet anak si Azmawet si Berakha dekket si Jehu kalak Anatot si Jismaya, kalak Gibeon, lubalang termurmur sada ibas èkuten nuhnuhen “sitellupuluh kalak”. si Jeremia, si Jehaziel, si Johanan dekket si Jozabad kalak Gedera si Eluzai, si Jerimot, si Bealya, si Semarya dekket si Sefaca kalak Harufi si Elkana, si Jisia, si Azareel, si Joezer dekket si Jasobam i horong si Korah nai si Joela dekket si Zebaja anak si Jeroham kalak Gedor.

⁸Tikala si Daud i bekkas pergerahaen i padang gurun, mèduk ngo lubalang termurmur janah merpengalamen i marga Gad nai roh pesadaken dirina mendahisa. Pandè kalohon ngo kalak i memakè tambeng-tambeng dekket kujur sinanè; berani ngo kalak i idahen bagè singa janah liskat bagè balkih.

⁹Enda mo gerar kalak i mengèkutken pangkatna: Si Ezer, si Obaja, si Eliab, si Mismana, si Jeremia, si Atai, si Eliel, si Johanan, si Elzabad, si Jeremia, si Makhbanai.

¹⁴Dèba bai kalak Gad i nai lubalang merpangkat ndates ngo simenguluken 1.000 kalak; dèba nai lubalang menguluken 100 kalak.

¹⁵Nung ngo masa tikan bulan sada, tikala mengeraja Laè Jordan, isuberrangi lubalang-lubalang i laè i janah ipuari ngo jelma pengisi napa i, kan kebincaren bak kan kesunduten laè i.

¹⁶Tikan sikali roh mo sada nuhnuhen kalak marga Benjamin dekket marga Juda mi bekkas percibonien si Daud.

¹⁷Isimbaki si Daud mo kalak i, janah idokken mo, “Mula naing gabè dengan ngo kènè roh mendahi aku, roh mo kè rebbak dekket kami. Kujalo kami ngo kènè ibagasen sampang atè. Tapi mula lot ngo sura-sura ndènè naing menelbuh aku taba musuh, tukasi pè oda lot kubaing siso puna-puna taba kènè, ibettoh Dèbata sinisembah empungta i ngo idi, janah ia mo menghukum kènè.”

¹⁸Sada kalak bai kalak i nai, imo si Amasai, daoh-daoh arien gabè huntuen nuhnuhen sini- gerarenna “Lubalang sitellupuluh,” idomi Ten- di Dèbata mo ia ninganna mendokken bagèen, “Alè Daud, anak si Isai, menumpak kono ngo kami! Katerra pè, merhasil mo ko dekket kalak simengurupi kono i. Idengani Dèbata mo kono.” Nai ijalo si Daud mo kalak i gabè ibaing mo kalak i lubalang balapergunggungna.

¹⁹Tikanna rebbak si Daud dekket kalak Palistin mengalo Raja Saul, gabè suberrang mo dèba soridadu i marga Manasye nai gabè kettan si Daud. Situhuna oda ngo iurupi si Daud kalak Palistin i. Ipasulak pengulu kalak Palistin ngo ia balik mi Ziklag kumarna mbiar kalak i tah bakunè suberrang nola ia kan Raja Saul janah menelbuhi kalak i.

²⁰En mo gerar-gerar lubalang marga Manasye sisuberrang taba si Daud tikanna merdalan ia lako balik mi Ziklag: Si Adnah, si Jozabad, si Jediael, si Mikhael, si Jozabad, si Elihu dekket si Ziletai. Gennep kalak i menguluken 1.000 kalak soridadu.

²¹Lubalang mahantu ngo kalak i mengurupi si Daud mengalo gerombolen. Daoh-daoh arien gabè lubalang ngo kalak i ibas soridadu Israel.

²²Terdokken gennep ari ngo lot roh kalak pesadaken dirina taba si Daud. Asa, oda sanga ndekkah gabè nterrem kalohon mo soridadu si Daud.

²³Tikan i Hebron si Daud, nterrem ngo lubalang mahantu pesadaken dirina taba si Daud. Itoat kalak i ngo ia asa ndorok ia mbangkit raja menggancihi si Saul, tosè bagè jandi JAHOWA. Buè kalak i imo: I marga Juda nai 6.800 kalak, mertambeng-tambeng merkujur sinanè. I marga Simeon nai 7.100 kalak, sienggo terlatih. I marga Lewi nai 4.600 kalak. Parangen si Joyada èkuten pemparen si Aron 3.700 kalak. Kaka anggi si Zadok sada kalak lubalang menguda dèng tapi berani: 22 kalak — karinana i èkuten horong ngo. I marga Benjamin nai (marga Raja Saul) 3.000 kalak, buèen dèng ma ngo i marga Benjamin nai tong setia taba si Saul. I marga Efraim nai 20.800 kalak sitergerar i horongna gennep. I marga Manasye nai sikan kesunduten Laè Jordan 18.000 kalak siniutus lako meminaki si Daud gabè raja. I marga Isasar nai, 200 kalak èkuten rebbak dekket parangenna, èkuten èn pandè ngo menentuken kadè si kennah ulaenken kalak Israel, tupung tikkina. I marga Zebulon(...)

³⁸Karina soridadu i laus mi Hebron, enggo kebbas lako geraha janah mertekkat pebangkitken si Daud gabè raja suberri Israel. Janah karina kalak Israel sidèbankenna i pè enggo sada atè lako pesautken i.

³⁹Tellu ari dekkahna kalak i merian i si rebbak dekket si Daud ninganna merkerja mangan mènum sienggo ipèmaken kalak Israel sidèbankenna i lako bai kalak i.

⁴⁰I marga-marga i utara nai tukasi pè ndaoh imo marga Isasar, Zebulon dekket Naptali merohen ngo kalak i merkalodè, unta, boban, dekket lembu, sarat kalohon merembah pangaen: topong, buah kayu, roti, anggur dekket minak Zaitun. Iembah kalak i ma ngo lembu dekket biri-biri lako sèaten mahan pangaen. Karinana i menuduhken sun mo lolona atè kalak Israel karina.