Read Batak Dairi 1 Kronika 15 Bible Online

1 Kronika 15 - Batak Dairi bible

1 Kronika 15

¹Ipajek si Daud mo bagesna i Kuta si Daud janah ipèmaken ma mo bekkas Pèti Perpadanen Dèbata, nai ibahan mo undung-undung Pèti i.

²Idokken si Daud mo, “Pellin kalak Lewi ngo kessa ndorok mengosong Pèti Perpadanen JAHOWA, kerna kalak i ngo ipilih JAHOWA lako merembah Pèti i janah menguèisa soh mi amman sumendah.”

³Nai idilo si Daud mo karina kalak Israel roh mi Jerusalem lako mengelompat Pèti Perpadanen JAHOWA mi bekkas sienggo ipèmaken kin.

⁴Nai idokken si Daud mo pemparen si Aron dekket kalak Lewi asa pulung.

⁵Nai i horong si Kehat nai, marga Lewi, terpilih mo asa si Uriel simenguluken 120 kalak horongna.

⁶I horong si Merari nai, si Asaya menguluken 220 kalak.

⁷I horong si Gerson nai, si Joel mo menguluken 130 kalak.

⁸I horong si Elsafan nai, si Semaya mo menguluken 200 kalak.

⁹I horong si Hebron nai si Eliel mo mengu- luken 80 kalak.

¹⁰Janah i horong si Uziel nai si Aminadab mo menguluken 112 kalak.

¹¹Nai idilo si Daud mo Imam Zadok dekket Imam Abyatar dekket kalak Lewi siennem kalak i, imo si Uziel, si Asaya, si Joel, si Semaya, si Eliel dekket si Aminadab.

¹²Idokken si Daud mo taba kalak i, “Kènè ngo èkuten horong i marga Lewi. Kumarna i, menguras mo kènè dekket kalak Lewi sidèbanna i, asa ndorok mengelompat Pèti Perpadanen JAHOWA, Dèbata Israel, mi bekkas sienggo kupèmaken.

¹³Ai tikan naing lompat perlebbè Pèti i, oda i si kènè tikala i lako merembah. Kemulihkenna i, ihukum JAHOWA Dèbatanta ngo kita kumarna oda kenna iakap persembahta bagè lemmo atèNa.”

¹⁴Jadi menguras mo imam-imam dekket kalak Lewi asa ndorok mengelompat Pèti Perpadanen JAHOWA, Dèbata kalak Israel.

¹⁵Janah tikan ilompat Pèti i, iosong kalak i mo, mengèkutken hatoren siniberèken JAHOWA merkitè si Musa.

¹⁶Idokken si Daud ma ngo taba èkuten kalak Lewi i asa ipilih barang piga-piga kalak i marga kalak i nai lako merendè dekket memaing endè sampang atè ipas kucapi dekket sordam.

¹⁷Ibas horong perendè nai, ipilih kalak i mo kalakna sinigegolen i sènda lako memalu gung; imo si Heman anak si Joel rebbak dekket kaka-anggina mergerar si Asaf anak si Berekhya dekket si Etan anak si Kusaya i horong Merari nai. Lako mendengani kalak i menggerrit kucapi tinggil, ipilih mo kalak Lewi, imo: Si Zakharia, si Jaaziel, si Semiramot, si Jehiel, si Uni, si Eliab, si Maaseya dekket si Benaya. Perkucapi sora ncerrep ipilih ma mo kalak Lewi, imo si Matica, si Elifele, si Mikneya, si Azazya dekket dua kalak pertaram Bages JAHOWA, imo si Obed-Edom dekket si Jeiel.

²²Si Kenanya mo ipilih menguluken pero- ning-oning marga Lewi i, ai kalak pandè mergotci ngo ia.

²³Si Berekhya dekket si Elkana rebbak dekket si Obed-Edom bak si Jehia, ipilih gabè menjaga Pèti Perpadanen JAHOWA. Persarunè i lebbè Pèti i, ipilih ma mo si Sebanya, si Josafat, si Netaneel, si Amasai, si Zakharia, si Benaya dekket si Eliezer.

²⁵Nai berkat mo Raja Daud rebbak dekket pengulu-pengulu Israel dekket lubalang-lubalang mi bages si Obed-Edom lako mengaleng Pèti Perpadanen i ninganna merkerja mbellen.

²⁶Pitu lembu tonggal dekket pitu biri-biri ipèlèken taba Dèbata kumarna enggo iurupi kalak Lewi simengosong Pèti Peradanen i.

²⁷Tikanna i ipakkè si Daud mo jubah kaèn halus bagi ma bak peroning-oning dekket si Kenanya simenguluken kalak Lewi simengosong Pèti Perpadanen i. Ipakkè si Daud dèng ma ngo baju efod.

²⁸Karinana ummat Israel mengèkutken Pèti Perpadanen i soh mi Jerusalem dak meroang-oang ninganna mersora terompèt, sarunè, ganderrang bak kucapi.

²⁹Tikan iarak Pèti i masuk mi kuta, menatap mo si Mikhal berru si Saul i jendèlana nai janah idah mo Raja Daud tumatak-tatak janah mersampang atè. Nai moyang mo atè si Mikhal midah si Daud i.