Read Batak Dairi 1 Kronika 16 Bible Online

1 Kronika 16 - Batak Dairi bible

1 Kronika 16

¹Ibaing mo Pèti Perpadanen i mi undung-undung sienggo ipèmaken si Daud mahan bekkas Pèti i. Nai ipèlèken kalak i mo bai Dèbata pèlèen situtungen dekket pèlèen perdamèen.

²Enggo kessa pul ipèlèken si Daud pèlèen i, ipasu-pasu mo jelma nterrem i ibagasen gerar JAHOWA,

³nai ipempellaken mo pangaen taba kalak i karinana. Gennep kalak sinisidi, daholi barang daberru terolih ngo tersimbalging gulè sinipanggang, roti dekket kuè.

⁴Ipebangkit si Daud mo piga-piga kalak Lewi lako menguluken acara mersembah taba JAHOWA, Dèbata Israel i hadeppen Pèti Perpadanen i, merkitè endè dekket pemoji-mojien.

⁵Si Asaf mo ipilih gabè huntunna janah si Zakharia mo alingenna. Perkucapi imo si Jeiel, si Semiramot, si Jehiel, si Matica, si Eliab, si Benaya, si Obed-Edom dekket si Jeiel. Si Asaf mo ibaing memalu gung,

⁶janah dua kalak imam idokken mo pukpuk mersarunè i hadeppen Pèti Perpadanen i, imo si Benaya dekket si Jahaziel.

⁷Idi mo perlebbè kalohon idokken si Daud taba si Asaf dekket denganna mengendèken pemoji-mojien taba JAHOWA.

⁸Dokken mo lias atè taba JAHOWA bagahken mo kebelgahenNa, sukutken mo sinibaingNa i tengah-tengah bangsa.

⁹Endèken mo pemojien bai JAHOWA beritaken karina kelengangen sinibaingna.

¹⁰Sadasa ngo kessa JAHOWA oangken mo kumarna milikNa ngo kita karina simersembah tabasa kennah ngo mersampang atè.

¹¹Pido mo gegoh baNa nai sembah mo Ia dak tong.

¹²Alè pemparen si Jakob naposo Dèbata, alè pemparen Israel, bangsa sinipilihNa! Èngèt karina kelengangen sinibaingNa, ulang lupaken sinidokkenNa.

¹⁴JAHOWA ngo Dèbatanta sinidokken lako mi suberri dunia.

¹⁵Dak ièngèt ngo karina padanNa, soh mi amman sumendah ngo padanNa.

¹⁶Merpadan ngo ia dekket si Abraham nai nola ma dekket si Isak,

¹⁷ipetegguh nola dekket si Jakob gabè hot mo padan i bai bangsa Israel.

¹⁸Nina ngo: “Tanoh Kanaan Kuberèken bamu gabè milik harta pusakkamu.”

¹⁹Arnia, sikira pendampin ngo bangsa JAHOWA i si cituk ngo kalak i tikala i.

²⁰Kadap ngo kalak i i bangsa nai mi bangsa lompat i sada nagerri nai mi nagerri sisada.

²¹Tapi oda ipaduè JAHOWA kalak i itindas dèba; lako bai kalak i, ipesèngèt ngo raja-raja,

²²“Ulang susahi jelma pilihenKu ulang jahati nabi-nabingKu.”

²³Endèken mo JAHOWA, alè suberri dunia gennep ari bagahken berita meria-ia Ia ngo sienggo paluahken kita.

²⁴Sukutken mo kehejinNa taba karina bangsa bak sinibaingNa mahantu i taba ummat manusia.

²⁵Ai mbelgah kalohon ngo JAHOWA janah terpoji kennah kebiaren ngo Ia lebih daripada karina sembahen.

²⁶Ukum sembahen bangsa sidèban i pellin gana-gana ngo tapi ukum JAHOWA, ia ngo situmempa karina silot.

²⁷Idomi kehejien dekket kemuliaen ngo ia, dom kuasa dekket oang-oang ngo bagesNa.

²⁸Poji mo JAHOWA, kènè alè jelma sini tanohen! Poji mo kesangapen bak kegegohenNa.

²⁹Poji mo gerarNa simermulia i, janah embah mo pèlèen mi bagesNa i. Sembah mo JAHOWA ninganNa merpakèen kebadiaen!

³⁰Menggirgir mo kènè i hadeppenNa, alè suberri dunia! Ngkong ngo tanoh, oda terdeger.

³¹Alè langit dekket tanoh, meroang-oang mo! Sukutken taba karina bangsa, ukum JAHOWA i, Raja ngo.

³²Gumeruhguh mo ko alè laut bak karina pengisina! Meroang-oang mo ko alè pekken dekket suan-suanen!

³³Kayu sinitembak mersurak meriaia kumarna enggo roh JAHOWA memerèntah i tanoh en.

³⁴Dokken lias atè bai JAHOWA kerna mendè basana; soh amman sumendah ngo ngkelleng atèNa.

³⁵Dokken mo, “Alè Dèbata sipaluahken kami, paluah mo kami ipas kuasa karina bangsa nai janah pepulung mo kami mengolihi asa ndorok lias atè kudokken kami bamu janah memoji gerarMu simbadia i.”

³⁶Poji mo JAHOWA Dèbata Israel, bagèndari dekket soh mi amman sumendah! Enggo kessa i, karina kalak Israel mendokken, “Amèn,” nai ipoji kalak i mo JAHOWA.

³⁷Nai idokken Raja Daud mo taba si Asaf dekket kalak Lewi sidèbanna i, asa dak tong mengurus siperlu mi persembahen i bekkas Pèti Perpadanen JAHOWA i isimpan. Gennep ari kennah mengula kalak i i sidi,

³⁸iurupi si Obed-Edom anak si Jedutun, dekket 68 kalak nai horongna. Si Obed-Edom dekket si Hosa, sijaga pèntu pengkeruhen ngo.

³⁹Tapi ukum si Zadok dekket imam-imam sidèbankenna i, idokken ngo asa tong mengu- rus persembahen i bekkas mersembah i Gibeon.

⁴⁰Gennep ceggen bak gennep mboen kennah ipèlèken ngo pèlèen situtungen i babo langgaten rembang bagè pati-patien sienggo iberèken JAHOWA bai kalak Israel.

⁴¹Imam Zadok dekket imam-imam i iurupi si Heman dekket si Jedutun bak sidèbanna dèng sinipilih lako mengendèken pemoji-mojien bai JAHOWA kumarna hot ngo ngkelleng atèNa.

⁴²Si Heman bak si Jedutun i, idokken ma ngo mengurus sarunè, gung dekket oning-oningen sidèbanna i, sinipakè mendengani endè-endè pemojiin. Horong si Jedutun idokken lako mertaram i pèntu pengkeruhen.

⁴³Nai molih mo karina jelma i mi bagesna gennep. Si Daud pè, molih ma mo mendahi dukak-dukakna.