Read Batak Dairi 1 Kronika 18 Bible Online

1 Kronika 18 - Batak Dairi bible

1 Kronika 18

¹Enggo kessai ijuhap janah italuken Raja Daud mo kalak Palistin janah itaban mo kuta Gad dekket sosor sikulilingna.

²Kalak Moab pè italuken si Daud ma ngo janah menggarar belasting bana.

³Nai nola ma italuken si Daud ma mo si Hadadezer, raja Zoba njolmit mi aur Hamat i nagerri Siria. Sinderrangna i tupung i perdalanen ngo si Hadadezer lako menaban nagerri i gembar takal Laè Efrat.

⁴Itaban si Daud mo 1.000 kurèta perang, dekket menaban 7.000 kalak tenterra merkuda janah 20.000 kalak tenterra merdalan nèhè. Ijembaken ia ngo karina kuda i; laènken pellin cukup mi 100 kurèta perang nai ngo kessa itadingken.

⁵Ipasulak kalak Siria mo i Damaskus nai soridadu lako mengurupi Raja Hadadezer, tapi italuken si Daud ngo kalak i janah ibunuh mo 22.000 kalak.

⁶Nai ipajek si Daud mo undung-undung pertaramen soridadu i nagerri kalak i gabè patu janah menggarar belasting mo kalak i tabasa. Dak mennang ngo si Daud ibaing JAHOWA barang i dikè sambing ia mergeraha.

⁷Tambeng-tambeng emmas sinipakè balapergunggung si Hadadezer, irampasi si Daud ngo janah iembah mi Jerusalem.

⁸Laènkenna i ibuati si Daud dèng ma ngo mbuè kalohon tembaga i Tibat bak i Kun, imo kuta sinirajaen si Hadadezer tikanna i. (I podi ari i teppa si Salomo mo tembaga i gabè mahan kancah, bak tihang-tihang dekket perkekkas mersembah i Bages JAHOWA.)

⁹Idengkoh Raja Tou i Hamat nai mo berita enggo italuken si Daud karina balapergunggung si Hadadezer.

¹⁰Nai ipasulak mo anakna si Joram lako pesakatken salam dekket kata njuah-njuah bai Raja Daud kumerna kemenangen i, kumerna dak nggati ngo si Hadadezer mergeraha mengalo si Tou. Merembah luah emmas mbuè kalohon ngo si Joram mendahi si Daud, bagi ma pirak dekket tembaga.

¹¹Ipèlèken Raja Daud ngo karina luah i bai JAHOWA asa ipergunaken tikan kerja memèlè. Bagi ma ngo ibaing dekket harta emmas dekket pirak sienggo itaban bai si Hadadezer nai dekket bai bangsa-bangsa sinitalukenna i nai, imo bangsa Edom, Moab, Amon, Palistin dekket Amalek.

¹²Si Abisai (inangna mergerar si Zeruya) menaluken janah memunuh 18.000 kalak Edom i Napa Masin,

¹³nai ipajek mo perundung-undungen soridadu i suberri Edom. Nai tunduk mo kalak Edom taba Raja Daud. Dak mennang ngo Raja Daud ibaing JAHOWA barang i dikè sambing ia mergeraha.

¹⁴Bagi mo si Daud memerèntah suberri Israel janah menjaga asa adil janah mendè ibaing taba ginemgem.

¹⁵En mo perpangkat ndates ipebangkit si Daud: Pakalima soridadu imo: Si Joab kaka si Abisai. Penurat i istana imo: Si Josafat anak si Ahilud. Imam-imam imo: Si Zadok anak si Ahitub dekket si Abimelekh anak si Abyatar. Sèkretaris negara imo: Si Sausa. Ekuten pengabal raja imo: Si Benaya anak si Joyada. Dukak-dukak si Daud pè menjèmak jabaten penting ngo ibas pemerèntahen.