Read Batak Dairi 1 Kronika 21 Bible Online

1 Kronika 21 - Batak Dairi bible

1 Kronika 21

¹Ukum sibolis, sèkel ngo mencilakai kalak Israel; kumarna i, iajar-ajari mo si Daud asa ibilang ginemgemna.

²Nai idokken si Daud mo taba si Joab dekket taba lubalang-lubalangna, “Bilang kènè mo karina jelma i suberri Israel soh mi kuta-kuta bak sosorna, ai perlu kubettoh sadikè buèna kalak Israel.”

³Ialoi si Joab mo, “Masèh mo atè JAHOWA marpar mo ibaing kalak Israel soh seratus kali lempit buèna i sibagèndari nai. Alè simermulia, otang ntarar ngo tunduk kalak i taba Rajai? Kasa kennah bilangen kalak i? I podi ari gabè karina nola bangsa i menggongken kumernaken kesalahen i.”

⁴Tapi dak tong ngo ipertahanken raja i perèntahna i, jadi berkat mo si Joab mi suberri Israel soh mi kuta-kuta bak sosorna, enggo kessa i balik mo ia mi Jerusalem,

⁵ibagahken mo taba Raja Daud hasil pemilangen i. Buè daholi sindorok gabè soridadu 1.100.000 kalak i Israel dekket 470.000 i Juda.

⁶Tapi ukum marga Lewi dekket Benjamin oda dekket dèng. Oda ibilang si Joab kalak i kumarna oda toko atèna pedalanken perèntah raja i.

⁷Dèbata pè oda ngo toko iakap pemilangen i gabè ihukum mo kalak Israel.

⁸Nai mersodip mo si Daud taba Dèbata, nina mo, “Ialè Dèbata, enggo merdosa kalohon aku. Ampuni mo aku, kumarna kemotoen ngo ulah-ulahku idi.”

⁹Idokken JAHOWA mo taba Nabi Gad, telangkè JAHOWA bak si Daud,

¹⁰“Berkat mo ko janah ranaken bai si Daud, Kubaing mo tellu pilihenna. Barang apai ipilih, Kupesaut ngo i.”

¹¹Nai laus mo si Gad mendahi si Daud lako pesohken tennah JAHOWA i, nina mo, “Apaina ipilih Rajai:

¹²Sempa mo kelèhèen i nagerri èn tellu tahun dekkahna, barang ijalang-jalang musuh Rajai sidekkah tellu bulan, barang masa mo ibaing JAHOWA merumangken sakit sinibaing bègu laus janah malaèkatNa merembah kematèen barang idikè sambing. Bagahken mo bagèndari sibagahenkenku taba JAHOWA.”

¹³Ialoi si Daud mo, “Nong alè nang, cilaka mo aku. Tapi daripada jelma menghukum aku, lotien mo aku ihukum JAHOWA, ai mbelgah ngo masèh atèNa.”

¹⁴Nai roh mo puru sampak ibaing JAHOWA taba kalak Israel, gabè matè mo 70.000 kalak Israel.

¹⁵Nai ipasulak JAHOWA mo sada kalak malaèkat lako membinasaken Jerusalem. Tapi soh kessa mo malaèkat i mi gembar pengeriken pagè milik si Arauna kalak Jebus, iobah JAHOWA nola mo keputusenNa menghukum bangsa i. Idokken mo taba malaèkat i, “Enggo mo i! Petadi mo!”

¹⁶Idah si Daud mo malaèkat i mabang i kellang-kellang langit bak tanoh èn. Enggo mberkat peddang i tanganna lako mengerabbatken Jerusalem. Nai sujud mo si Daud mi tanoh dekket pengulu-pengulu ginemgem, sienggo memakè pakèen goni tanda peselsel.

¹⁷Mersodip mo si Daud, nina mo, “Ialè Dèbata, aku ngo salah. Aku ngo mendokken pemilangen i ibaing. Ukum bangsa èn, cituk poda salah. Ialè JAHOWA Dèbatangku, aku dekket kadè-kadèngku mo hukum, tapi palis mo kinimago èn bai bangsaMu nai.”

¹⁸Nai ipasulak malaèkat i mo si Gad asa idokken taba si Daud, kennah menangkeng ia roh mi pengeriken si Arauna janah memajek langgaten bai JAHOWA i si.

¹⁹Nai berkat mo si Daud tosè bagè sienggo iperèntahken JAHOWA tabasa merkitè si Gad.

²⁰Tupung mengerrik pagè ngo si Arauna dekket empat kalak anakna i pengeriken i. Mperrus ngo anak si Arauna siempat kalak i, idah kessa malaèkat i.

²¹Idah si Arauna kessa roh Raja Daud, isimbaki mo si Daud i janah mersembah i hadeppenna.

²²Nai idokken si Daud mo mbangsa, “Naing kupajek ngo dok atèngku langgaten bai JAHOWA i bekkas èn, asa ndong bègu laus i. Kumarna i dèa mo tanohmu èn bangku. Bagahken sadikè hargana asa kugarar.”

²³“Iaah, bagi mo buat sambing alè Raja nami,” nina si Arauna mengaloi, “janah ibahan Rajai mo barang kadè dok atè Rajai mendè. En mo lembu mahan pèlèen situtungen i, janah sebanna, ipakkè Rajai mo papan pengeriken èn. Buat kènè ma mo pagè èn mahan pèlèen. Kuberèken karina i bai Rajai, ulang pella garar kènè.”

²⁴Tapi ialoi raja i mo, “Ulang mo bagi. Naing kutokor ngo dekket harga patut. Oda uè aku memèlèken bai JAHOWA barang kadè milikmu, barang pè sidapet aku ukum pokok perrè.”

²⁵Nai igarar si Daud mo taba si Arauna 600 riar emmas tokor bekkas i.

²⁶Nai ipajek si Daud mo langgaten bai JAHOWA i si, janah ipèlèken mo pèlèen situtungen bak pèlèen perdamèen. Nai mersodip mo ia taba JAHOWA ialoi mo sodipna i merkitè roh api i langit nai menutung pèlèen sini babo langgaten i.

²⁷Nai idokken JAHOWA mo taba malaèkat i asa isembungken pedangna, nai ibaing malaèkat i mo bagè perèntah JAHOWA i.

²⁸Idah si Daud kessa mo ialoi JAHOWA sodipna merkitè pèlèen i, nai memèlèken pèlèen nola mo ia i langgaten i.

²⁹Tikanna i Undung-undung JAHOWA sinibahan si Musa i kelongoen dekket langgaten bekkas pèlèen situtungen tong dèng ngo merbekkas i bekkas pemelèen i Gibeon.

³⁰Tapi oda pang si Daud mi si lako mengeranai dekket Dèbata, kumarna buradan ia midah pedang malaèkat JAHOWA.