Read Batak Dairi 1 Kronika 23 Bible Online

1 Kronika 23 - Batak Dairi bible

1 Kronika 23

¹Enggo kessa tua-tua kalohon si Daud, ipebangkit mo si Salomo gabè raja Israel.

²Ipepulung raja Daud mo karina pengulu-pengulu Israel, imam-imam dekket kalak Lewi,

³nai ibilang mo karina daholi marga Lewi simerumur tellupuluh tahun mi babo. Lot ngo 38.000 kalak karina.

⁴Nai 24.000 kalak bai kalak i nai idokken mengkebasi bahaen i Bages JAHOWA, 6.000 kalak me- ngurus surat-surat dekket perkara.

⁵4.000 mo pertaram janah 4.000 kalak nai lako memoji JAHOWA merdengan oning-oning sienggo ipèmaken kin.

⁶Ibagi si Daud mo kalak Lewi i gabè tellu bagian mengèkutken horong kalak i, imo ho- rong si Gerson, si Kehat dekket horong si Merari.

⁷Lot ngo anak si Gerson, imo si Ladan dekket si Simei.

⁸Anak si Ladan lot ngo tellu kalak, imo si Jehiel, si Zetam dekket si Joel.

⁹Kalak i ngo èkuten horong pemparen si Ladan. (Si Selomit, si Haziel dekket si Haran imo anak si Simei.)

¹⁰Siempat anak si Simei mengèkutken pertubuhna imo: Si Jahat, si Ziza, si Jeus dekket si Beria. Ukum pinempar si Jeus dekket si Beria oda ngo mbuè, jadi gabè sada horong mo kalak i iètong.

¹²Empat ngo anak si Kehat imo: Si Amram, si Jizhar, si Hebron, dekket si Uziel.

¹³Si Amram imo bapa si Aron dekket si Musa (ukum si Aron dekket pinemparna enggo ngo ipetettah gabè mengurus perkekkas mersembah soh sidekkah-dekkahna, menutung dahupa bai JAHOWA, mengkebasi JAHOWA dekket memasu-masu sinterrem merkitè gerar JAHOWA.

¹⁴Dukak-dukak si Musa naposo Dèbata i, ipemasuk mi horong marga Lewi.)

¹⁵Dua ngo anak si Musa, imo si Gersom dekket si Eliezer.

¹⁶Ekuten dukak-dukak si Gersom, imo si Zebuel.

¹⁷Ukum si Eliezer pellin sada ngo anakna, si Rehabya gerarna. Tapi si Rehabya nterrem ngo anakna.

¹⁸Si Jishar anak si Kehat sipeduaken lot ngo anakna mergerar si Selomit; ia mo pengulu horong.

¹⁹Si Hebron anak si Kehat sipetelluken, empat ngo anakna; si Jeria mo situaen, nai asa si Amarya, si Jahaziel dekket si Jekameam.

²⁰Anak si Kehat sipeempatken imo si Uziel, dua ngo anakna, imo si Mika situaen, nai si Jisia.

²¹Si Merari dua anakna mergerar si Mahli dekket si Musi. Si Mahli dua ma ngo anakna, imo si Eleazar dekket si Kis,

²²tapi matè ngo si Eleazar, oda sanga lot anakna; pellin berruna ngo kessa lot, janah sijahè taba turangna sibeltek bapa anak si Kis.

²³Si Musi anak si Merari sipekedua, lot ngo tellu anakna, imo si Mahli, si Eder dekket si Jeremot.

²⁴Idi mo pemparen si Lewi sitersurat mengèkutken gerar pengulu kaum dekket horongna gennep. Merumur kessa kalak i 25 tahun mi babo, mèter lot mo ulaenna i Bages JAHOWA.

²⁵Idokken si Daud mo, “Enggo mo iberèken JAHOWA Dèbata Israel kedamèen bai ummatNa janah Ia sendiri pè merian i Jerusalem ngo soh mi amman sumendah.

²⁶Kumarna i oda nèngè mo pella dak iosong kalak Lewi Undung-undung JAHOWA dekket karinana perkekkas sinipakè lako mersembah.”

²⁷Merdangaen mi perèntah si Daud perpodi karina kalak Lewi sienggo merumur 20 tahun, kennah isuratken lako merkebbas.

²⁸Kennah iurupi kalak i ngo imam-imam pemparen si Aron tikan acara mersembah i Bages JAHOWA, pehèdu-hèduken tengah dekket bilik silot i Bages JAHOWA i, ninganna menjaga asa ulang samur barang kadè sienggo ipesakat bai JAHOWA.

²⁹Kennah tanggung jabapen kalak i dèng ma ngo, roti sinipèlèken bai Dèbata, nditak sipèlèenken bai JAHOWA, kuè simenipis siso meragi, pèlèen situtungen, dekket nditak sinisaor dekket minak zaitun. Kennah dèng ma ngo itimbang janah isukat karina pèlèen siniembah mi Bages JAHOWA.

³⁰Laènkenna i dèng ma kennah merendè ngo kalak i lako memoji JAHOWA gennep cegen bak gennep mboen,

³¹dekket gennep lot pèlèen situtungen bai JAHOWA tikan ari Sabat, tikan pèsta Peltak Bulan, dekket tupung pèsta-pèsta sidèbankenna i dèng. Buè kalak Lewi kennah mengendengken gennep lot ulaen, enggo ma ngo ibahan hatoren. Soh sidekkah-dekkahna ngo kalak Lewi kennah mengulaken ulaen i.

³²Tanggung jabab kalak i dèng ma ngo perèsoken Undung-undung JAHOWA bak Bages JAHOWA dekket mengurupi kaka-anggi kalak i, imo imam pemparen si Aron menguluken perpulungen i bekkas i.