Read Batak Dairi 1 Kronika 24 Bible Online

1 Kronika 24 - Batak Dairi bible

1 Kronika 24

¹Si Aron empat ngo anakna imo: Si Nadab, si Abihu, si Eleazar dekket si Itamar. Lebbèen ngo matè si Nadab deket si Abihu asa bapana, oda sanga dèng lot dukakna. Kumarnaken i, gabè imam mo si Eleazar dekket si Itamar anggi kalak idi. Isagi si Daud ngo pemparen si Aron mengèkutken ulaen kalak i merhorong-horong. Tikan ulaen membagi horong i, iurupi si Zadok pemparen si Eleazar dekket si Ahimelekh pemparen si Itamar ngo si Daud.

⁴Pemparen si Itamar ibagi gabè ualuh horong, tapi pemparen si Eleazar gabè sipuluh ennem horong, kumarna buèen daholi pemparen si Eleazar sienggo mendiri.

⁵Kumarna i pemparen si Eleazar bak pemparen si Itamar nai meradu lot ngo pengendeng i Bages JAHOWA dekket pengulu-pengulu agama, nai merkitè tendung ngo ibaing lako mersagi ulaen i.

⁶Mergèlèren ngo pemparen si Eleazar dekket pemparen si Itamar menendungi, nai isurat penurat simergerar si Semaya anak si Natanael kalak Lewi mo gerar-gerar kalak i. Karina i ibahanken ihadeppen raja rebbak dekket pugabè, Imam Zadok, Ahimelekh anak si Abyatar dekket pengulu horong imam bak pengulu-pengulu horong Lewi.

⁷Bagèen mo pertording gèlèren pe- ngendeng sidapet ipas tendung i nai bai siduapuluh empat horong i: 1. Si Joyarib — 13. Si Hupa 2. Si Jedaya — 14. Si Jesebeab 3. Si Harim — 15. Si Bilga 4. Si Seorim — 16. Si Imer 5. Si Malkia — 17. Si Hezir 6. Si Miyamin — 18. Si Hapizes 7. Si Hakos — 19. Si Petahya 8. Si Abia — 20. Si Jehezkiel 9. Si Jesua — 21. Si Jakhin 10. Si Sekhanya — 22. Si Gamul 11. Si Elyasib — 23. Si Delaya 12. Si Jakim — 24. Si Maazya

¹⁹Isurat ngo gerar kalak i mengèkutken gèlèrenna, lako memengketti Bages JAHOWA dekket mengulaken ulaen i perpulungen sienggo itetapken si Aron empung kalak i, tosè mi perèntah JAHOWA Dèbata Israel.

²⁰Laènkenna i lot dèng ngo simasuk pemparen si Lewi pengulu-pengulu horong imo: Si Jehdeya pemparen si Amram i usur pemparen si Subael nai; si Jisia, pemparen si Rehabya si Jahat, pemparen si Jizhar i usur pemparen si Selomot nai; si Jeria, si Amarya, si Jahaziel dekket si Jekameam dukak-dukak si Hebron mengèkutken pertubuhna. si Samir pemparen si Uziel i usur pemparen si Mika nai; si Zakharia, pemparen si Uziel i usur pemparen si Jisia nai anggi si Mika si Mahli, si Musi dekket si Jaasia pemparen si Merari.

²⁷Si Jaasia, tellu ngo anakna imo: Si Syoham, si Zakur, dekket si Hibri.

²⁸Ukum si Makhli dua ngo anakna mergerar si Eleazar dekket si Kis. Si Eleazar oda lot anakna, tapi si Kis lot ngo sada anakna mergerar si Jerohmeel.

³⁰Anak si Musi tellu kalak imo: Si Mahli, si Eder dekket si Jerimot. Idi mo merhorong-horong i marga Lewi

³¹Tupung gèlèren kalak i kessa, mertendung mo kalak i, janah gennep pengulu horong dekket sada kalak anggina roh mo lako mertendung bagè sinibaing kaka-anggi kalak i, imo imam-imam pemparen si Aron. Isaksiken Raja Daud ngo mertendung i rebbak dekket si Zadok, si Ahimelekh bak pengulu-pengulu horong bai imam-imam nai dekket i horong si Lewi nai.