Read Batak Dairi 1 Kronika 26 Bible Online

1 Kronika 26 - Batak Dairi bible

1 Kronika 26

¹Bagèen mo perbagina ulaen bai kalak Lewi mertaram i Bages JAHOWA. I horong si Korah nai ipebangkit ngo si Meselemya anak si Kore i pemparen si Ebyasaf nai.

²Pitu ngo anakna sitersurat mengèkutken pertubuh, imo si Zakharia, si Jediael, si Zebaja, si Jatniel,

³si Elam, si Johanan, si Elyoënai.

⁴Nai nola ma ipebangkit mo si Obed-Edom. Ipasu-pasuken Dèbata ngo bana 8 anak sitersurat gerarna mengèkutken pertubuh, imo si Semaya, si Jozabad, si Joah, si Sakhar, si Netaneel,

⁵si Amiel, si Isakhar dekket si Peuletai.

⁶Ennem ngo anak si Semaya, anak situaen si Obed-Edom imo: si Otni, si Refael, si Obed, si Elzabad, si Elihu dekket si Semakhya; karina ngo kalak i terpejolo i horong kalak i kerna gagah bana, mahantu-mahantu ngo kalak i, tuana mo si Elihu bak si Semakhya.

⁸Lako mengulaken ulaen penjagaen i, ibaing horong si Obed-Edom ngo 62 kalak daholi mahantu.

⁹Horong Meselemya memerèken 18 kalak jelma mahantu.

¹⁰I horong Merari nai ipebangkit ngo si Hosa. Empat ngo anakna, imo si Simri (oda ngo ia anak situaen, tapi ipebangkit bapana ngo ia gabè èkuten.)

¹¹Si Hilkia, si Tebalya dekket si Zakharia. Karina lot ngo 13 anggota simpangaen si Hosa gabè penjaga Bages JAHOWA.

¹²Si menjaga i Bages JAHOWA i, ibagi ngo mengèkutken kelompok-kelompok horongna gennep. Iberèken dèng ma ngo bai kalak i ulaen i Bages JAHOWA bagè kalak Lewi sidèbanna i.

¹³Gennep horong, barang horong mbellen pè i barang horong kètèk mertendung ngo tah i pèntu pengkeruhen paina kalak i mertaram.

¹⁴Si Selemya mo kan pèntu pengkeruhen kebincaren. Anakna si Zakharia sidak tong memerèken peddah selloh, kan pèntu pengkeruhen utara.

¹⁵Si Obed-Edom kan pèntu pengkeruhen selatan janah dukak-dukakna menjaga gudang perlengkapen.

¹⁶Si Supim bak si Hosa menjaga pèntu pengkeruhen kan kesunduten dekket pèntu pengkeruhen Syalekhet imo tupung kan dalan menangkeng. Iatur ngo mendè ulaen penjagaen i gabè dak lot ngo jaga i pèntu pengkeruhen.

¹⁷Gennep ari lot ngo ennem kalak perjaga kan kebincaren, kan utara 4 kalak janah kan selatan 4 kalak. Gudang perlengkapen pè ijaga 4 kalak ma ngo; dua kalak mo i gennep gudang.

¹⁸Kan èmpèr i kesunduten ibaing ngo empat kalak perjaga i dalan bak dua kalak ipas èmpèr i.

¹⁹Bagi mo persagina ulaen mertaram taba horong si Korah dekket horong Merari.

²⁰Kalak marga Lewi sidèbanna i iberrèken ngo bana tanggung jabab tersèngèt harta Bages JAHOWA dekket silot ipas gudang bekkas memennep harta siniberèken bai Dèbata.

²¹Si Ladan, imo sada kalak anak si Gerson. Lot ngo tah piga-piga kelompok horong ibaing ia termasuk kelompok si Jehiel anakna i.

²²Dukak-dukak si Jehiel, imo si Zetam dekket si Joel, mertanggung jabab tersèngèt gudang-gudang bak peremasen Bages JAHOWA.

²³Pemparen si Amram, si Jizhar, si Hebron bak si Uziel pè terolih ulaen ngo.

²⁴Si Sebuel i horong si Gersom nai anak si Musa mo memperdimata harta Bages JAHOWA.

²⁵Lot ngo perpamilinna dekket si Selomit merkitèken si Eliezer anggi si Gersom. Tarombo si Eliezer soh taba si Selomit imo: Si Eliezer, si Rehabya, si Jesaya, si Joram, si Zikhri, si Selomit,

²⁶Si Selomit dekket dukak-dukak anggina mertanggung jabab tersèngèt karina siniberèkan Raja Daud mahan pèlèenna, bagi bak siniberèken èkuten sisimpangaen, èkuten karina horong dekket lubalang-lubalang.

²⁷Siniberèkenna i imo dèba ipas harta taban-taban sinitaban kalak i tupung geraha janah ipèlèken kalak i asa ipakkè mi keperluen i Bages JAHOWA.

²⁸Asa si Selomit bak kadè-kadèna mo mertanggung jabab tersèngèt karina sienggo isohken lako pakèen i Bages JAHOWA, bang pèlèen-pèlèen arap Nabi Samuel nai, sienggo isohken Raja Saul, bak si Abner anak si Ner, dekket sinisohken si Joab anak si Zeruya.

²⁹Pemparen si Jizhar, imo si Kenanya bak dukak-dukakna, bai kalak èn mo isohken ulaen surat menurat Kerajaen dekket ulaen merhukum i Israel.

³⁰Karina urusen agama bak pemerèntahen i Israel kan kesunduten Laè Jordan ipesakat taba si Hasabya dekket taba 1.700 kalak kaka-anggina: Karina i kalak pantasniasè i pemparen si Hebron nai ngo.

³¹Pengulu pemparen si Hebron imo si Jeria. I tahun peempatpuluhken pemerèntahen Raja Daud ibaing mo pemerèsoen mi pemparen si Hebron. Ipas pemerèsoen i nai, dapet mo lot bai kalak i nai soridadu mahantu, merian i Jazer i nagerri Gilead.

³²Karinana urusen agama dekket pemerèntahen i Israel kan kebincaren Laè Jordan — imo i nagerri marga Ruben, Gad dekket dèba marga Manasye — ipesakat taba 2.700 èkuten pejabu-jabu horong si Jeria, karinana i kalak pantasniasè ipilih Raja Daud.