Read Batak Dairi 1 Kronika 27 Bible Online

1 Kronika 27 - Batak Dairi bible

1 Kronika 27

¹Urusen pemerèntahen kerajaen Israel iatur pengulu-pengulu horong, pengulu-pengulu kaum dekket lubalang-lubalang. Gennep bulan ngo ibas sada tahun lot sada kelompok mergèlèren iuluken sada kalak pengendeng. Gennep kelompok buèna 24.000 kalak. En mo gerar pengendeng nuhnuhen simertugas gennep bulan: Bulan perlebbè imo: Si Jasobam anak si Jabdiel (anggota kaum Peres marga Juda ngo ia.) Bulan peduaken imo: Si Dadai, pemparen si Ahohi. Wakilna imo si Miklot Bulan petelluken imo: Si Benaya anak Imam Joyada; ia ngo simenguluken Lubalang sitellupuluh (anakna si Amizabad ngo wakilna.) Bulan peempatken imo: Si Asael anggi si Joab (penggancihna imo anakna si Zebaja.) Bulan pelimaken imo: Si Samhut pemparen si Jizrah. Bulan peenemken, imo: Si Ira anak si Ikes i kuta Tekoa nai. Bulan pepituken imo: Si Heles pemparen si Efraim i kuta Peloni nai. Bulan peualuhken imo: Si Sibkhai i kuta Husa nai (anggota kaum Zerah marga Juda ngo ia.) Bulan pesibahke(...)

¹⁶En mo gerar-gerar pengulu marga bangsa Israel: Pengulu marga Ruben imo si Eliezer anak si Zikhri Pengulu marga Simeon imo si Sefaca anak si Maakha Pengulu marga Lewi imo si Hasabya anak si Kemuel Pengulu marga Aron imo si Zadok Pengulu marga Juda imo si Elihu sada kalak ipas kaka Raja Daud nai. Pengulu marga Isasar imo si Omri anak si Mikhael Pengulu marga Zebulon imo si Jismaya anak si Obaja Pengulu marga Naptali imo si Jerimot anak si Azriel Pengulu marga Efraim imo si Hosea anak si Azazya Pengulu marga Manasye sikan kesunduten Laè Jordan imo si Joel anak si Pedaya. Pengulu marga Manasye sikan kebincaren Laè Jordan, imo si Jido anak si Zakharia. Pengulu marga Benjamin imo si Jaasiel anak si Abner. Pengulu marga Dan imo si Azareel anak si Jeroham.

²³Oda ngo ibaing Raja Daud pemilangen bai kalak simerumur 20 tahun mi terruh kumarna enggo ipadanken JAHOWA naing baingenna kalak Israel bagè buè bintang i langit i.

²⁴Enggo kin ngo sanga imulai si Joab anak si Zeruya memaing pemilangen i, tapi oda sanga pul ibaing, kumarna ihukum JAHOWA kalak Israel, kemulihken pemilangen i. Kumarna i ngo asa oda isurat sadikè buè kalak i ibas bukku Raja Daud.

²⁵En mo gerar-gerar simenjamotken harta milik raja: Simenjamotken gudang i istana dekket i Jerusalem imo: Si Azmawet anak si Adiel Gudang-gudang i luar Jerusalem imo: Si Jonatan anak Uzia Simengula i juma imo: Si Ezri anak si Kelub Simengula ipekken anggur imo: Si Simei i kuta Rama nai Simenjamotken penimpanen anggur imo: Si Zabdi i kuta Syifmi nai Simenjamotken kayu zaitun dekket kayu ara, (i pispis delleng kan kesunduten imo): Si Baal-Hanan i kuta Gederi nai Simenjamotken bekas penimpanen minak zaitun imo: Si Joas Simermakan pinakan i Jampalen Saron imo: Si Sitrai i kuta Saron nai Simermakan pinakan i napa-napa imo: Si Safat anak si Adlai Simermakan unta imo: Si Obil pemparen si Ismael Simermakan kalodè imo: Si Jehdeya i kuta Meronot nai Simermakan biri-biri dekket kambing imo: Si Jaris, kalak Hagri.

³²Papun Raja Daud simergerar si Jonatan, sada kalak simpantasniasè janah pandè. Ia mo dekket si Jehiel anak si Hakhmoni ibaing mertanggung jabab tersèngèt persikkolaen dukak-dukak raja.

³³Si Ahitofel ngo penasèhat raja, janah si Husai kalak Arki mo penasèhat bak dengan karip raja.

³⁴Enggo kessa matè si Ahitofel, gabè igancih si Abyatar dekket si Joyada anak si Benaya mo ia. Pakalima tenterra kerajaen imo si Joab.