Read Batak Dairi 1 Kronika 28 Bible Online

1 Kronika 28 - Batak Dairi bible

1 Kronika 28

¹Iperèntahken Raja Daud mo asa merpulung karina pengulu-pengulu kalak Israel i Jerusalem. Nai mertumpu mo karina pengulu-pengulu marga, perpangkat simengurus pemerèntahen, pengulu kaum, simenjamoti harta dekket pinakan, raja bak dukak-dukakna pè — karina simerpangkat i istana, lubalang bak simpantasniasè karinana roh tumpu i Jerusalem.

²Nai cènder mo si Daud i hadeppen kalak i, mendokken kata, “Kènè karina kaka-anggingku kita sisada bangsa, dengkohken kènè mo. Enggo ndekkah kuniatken naing memajek sada bages merandal bekkas Pèti Perpadanen, imo perbekkasen nèhè JAHOWA Dèbatanta. Enggo ngo kupèmaken kadè siperlu lako memajek sada bages bekkas mersembah tabasa.

³Tapi igerra JAHOWA ngo aku mahanken i, kumarna sada kalak soridadu sienggo mengorèken mbuè daroh aku.

⁴JAHOWA Dèbata sinisembah kalak Israel ngo enggo memilih aku bak pinemparku lako memerèntah Israel soh amman sumendah. Lako naing memaing sada pemimpin ipilih ngo marga Juda, janah i marga idi nai ipilih ngo simpangaen bapangku. Janah ibas karina sisimpangaen bapangku i nai, ipergeddo ngo aku janah pebangkitken aku gabè raja mengerajai suberri Israel.

⁵Nterrem ngo anak iberrèken bangku, janah i karina anakku i nai ipilih ngo si Salomo lako memerèntah Israel kerajaen JAHOWA.

⁶Bagèen ngo idokken JAHOWA taba aku, ‘Anakmu si Salomo ngo pecènderken bages bangku. Enggo Kupilih ia gabè anakKu, janah Aku mo gabè bapana.

⁷Mula mertuhu-tuhu ngo tong ia menguèi karina pati-patinku dekket perèntahKu, bagè sinibaingna bagèndari, kupetettah mo kerajaenna i soh mi amman sumendah.’ ”

⁸Nai idokken si Daud dèng ma, “Asa, bagèndari pè alè ginemgemku, kupido taba kènè karinana i hadeppen Dèbatanta dekket i hadeppen simertumpu èn karinana Israel bangsa JAHOWA èn, asa tuhu-tuhu mo uèi kènè perèntah JAHOWA Dèbatanta i. Merkitè bagidi, ndorok mo hot milik ndènè nagerri simerandal èn janah iberèken taba pinempar ndènè soh mi amman sumendah.”

⁹Nai taba si Salomo pè idokken si Daud mo bagèen, “Kono alè pa, Dèbata siniuèen bapamu i mo uèi gabè Dèbatamu. Kennah merpenguèi ngo kono bana ipas ukurmu mpanting nai dekket ncerrep merpenguèi. Ai ibettoh ngo karina bilik-bilik pikiren dekket sura-suranta. Mula itulusi kono Ia, jupa kono ngo Ia, tapi mula itadingken kono ngo Ia, gabè itulak mo ko soh mi amman sumendah.

¹⁰Èngèt mo selloh, enggo ipilih JAHOWA ko lako memajek bages merkedekoen. Kumarna i, ulaken mo bagèndari nai mertuhu-tuhu.”

¹¹Enggo kessa i, iberèken si Daud mo bai si Salomo rencana mahan Bages JAHOWA i, bagi dekket gudangna, karina bilikna dekket Bilik Simbadia kalohon bekkas kesasaen dosa,

¹²Iberèken si Daud ma ngo karinana rencana sienggo ipikirken kin mahan èmpèr dekket bilik i sikulilingna, bagi dekket gudang perkekkas Bages JAHOWA i, bak gudang bekkas memennep pemerèken bai JAHOWA.

¹³Ipesakat ma ngo rencana perbaginna tersèngèt imam-imam dekket kalak Lewi, bang ulaen sinaing ulanken kalak i, imo ulaen kalak idi i Bages JAHOWA bak menjaga karina perkekkas mersembah.

¹⁴Ibagahken ma ngo bakunè cara meneppa emmas dekket pirak mahan perkekkas,

¹⁵mahan pelita bak nèhè pelita,

¹⁶mahan mèja ipas pirak nai, dekket mahan mèja emmas bekkas roti hantaren bai Dèbata.

¹⁷Ibagahken ma ngo bakunè buèna emmas matah mahan garpu, mangkuk dekket gori-gori, bagi ma bakunè buèna emmas bak pirak lako mahan pahar,

¹⁸bagi ma tersèngèt buèna emmas matah mahan langgaten penutungen dahupa bak mahan kurèta bekkas gana-ganaen kerub bak kabengna ngkèrbang i babo Pèti Perpadanen JAHOWA.

¹⁹Nai nina Raja Daud mo, “Karinana i enggo tersurat ibas rencana, tosè bagè sienggo idokken JAHOWA taba aku sinaing bahanen.”

²⁰Nai idokken Raja Daud dèng ma ngo taba anakna si Salomo, “Kennah tok ngo kono janah berrani. Tebenai mo mahan bahaen i janah ulang mo ko mbiar midah barang kadè pè i. Idengani JAHOWA Dèbata sikusembah i ngo ko. Dak idengani ngo ko soh mi pul ulaen i.

²¹Perbagina ulaen i Bages JAHOWA enggo itentuken bai imam-imam dekket kalak Lewi. Kalak sipandè mengula mengèkutken matcamna gennep, iurupi ngo kono ibagasen sampang atè, janah karina pengulu-pengulu bak karina jelma nterrem pè iuèi ngo perèntahmu.”