Read Batak Dairi 1 Kronika 29 Bible Online

1 Kronika 29 - Batak Dairi bible

1 Kronika 29

¹Nai idokken Raja Daud mo taba karina kalak simertumpu nisidi, “Ipas karina anakku i nai, si Salomo ngo ipilih Dèbata. Tapi bajar dèng ngo ia, janah kurang pengalamen, keppèken mbelgah ngo ulaen èn. Janah dèng ma sinaing bahanen i oda ngo istana jelma, tapi Bages JAHOWA ngo.

²Karina siperlu mahan bages i dekket perkekkasna, enggo kupèmaken merkitè tuk gegohku. Enggo kupèmaken emmas, pirak, tembaga, bessi, batu-batu maharga dekket batu-batu permata, batu-batu mermatcam bagè rupana mahan bunga nitiktik bak batu marmar mbuè kalohon.

³Kumarna ngkelleng atèngku midah Bages Dèbatangku, enggo ma ngo kusohken hartangku emmas bak pirak,

⁴emmas simerandalna lebbih 100 ton, janah pirak sinidakdak kira-kira 240 ton mahan lampis dingding Bages JAHOWA dekket mahan perkekkas sikennah ibahan kalak pandè iperpandèen. Kumarna i, bagèndari pè isè dèng uè memerèken pèlènna bai JAHOWA ibagasen sennang atèna nai?”

⁶Nai idokken pengulu-pengulu horong, pengulu marga, lubalang-lubalang dekket simenjamoti harta milik raja i mo kalak i pè sèkel ngo memerèken.

⁷Nai ipemberrèken kalak i mo hartana mahan Bages JAHOWA i: emmas 170 ton lebbih, pirak 340 ton lebih, tembaga naing-naing 620 ton, dekket bessi 3.400 ton lebih.

⁸Kalak silot batu permatana, iberèken mo taba si Jehiel, asa ipemasuk mi peremasen Bages JAHOWA. (Si Jehiel èn, sada kalak Lewi i horong si Gerson nai ngo.)

⁹Jelma nterrem i pè ibagasen sampang atè ngo memerèken bai JAHOWA janah lolo ngo kalak i kumarna enggo mèduk ipèlèken kalak i. Raja Daud pè lolo kalohon ngo.

¹⁰I hadeppen jelma nterrem i ipoji Raja Daud mo JAHOWA, nina mo, “Ialè JAHOWA Dèbata sinisembah si Jakob empung nami i, terpoji Ngo ko soh mi amman sumendah!

¹¹Mbelgah kalohon ngo ko janah merkuasa. Mermulia ngo ko janah meheji. Karinana silot i langit dekket i dunia èn, milikMu ngo. Kono ngo raja simeheji, perkuasa mi karinana.

¹²Karina kinibèak dekket kiniduma, bamu nai ngo asalna; karina nasa silot, ikuasai ko ngo merkitè kegegohen bak kemahantuenMu; guru dokmu ngo memaing isè sambing gabè kalak mbellen janah mergegoh.

¹³Bagèndari pè alè Dèbata nami, kudokken kami mo lias atè baMu, janah kupoji kami mo gerarMu simermulia i.

¹⁴Ukum aku dekket ginemgemku èn situhuna malot terberèken kami barang kadè baMu, kumarna basa-basaMu ngo i karinana, janah sikuberèken kami èn pè milikMu ngo i.

¹⁵Ibettoh kono ngo alè JAHOWA, tosè bagè empung nami, kami pè bagè kalak siroh janah sidèban ngo mendalani kenggeluhen èn. Tosè bagè lendung memellus ngo nggelluh nami, janah kenah matè.

¹⁶Ialè JAHOWA Dèbata nami, kupepulung kami barang maharga èn i sèn, lako memajek sada bages baMu, asa ndorok kupesangap kami gerarMu simbadia i. Tapi karinana i baMu nai ngo kujalo kami, janah kono ngo sidasa.

¹⁷Kubettoh ioji kono Ngo ukur gennep jelma, janah ngkelleng Ngo atèmu midah kalak perukur mbersih. Ibagasen ukur mpanting dekket sampang atè kupèlèken kami karina èn baMu. Enggo Kuindangken bakunè cara bangsaMu sipulung i sèn merembah pèlènna taba kono ibagasen sampang atè.

¹⁸Ialè JAHOWA Dèbata sinisembah si Abraham, si Isak dekket si Jakob empung nami i, dak jamotken mo, asa dak ikekelengi bangsaMu i kono tosè bagè simasa karang èn, janah dak urupi mo asa setia kalak i bamu soh mi amman sumendah.

¹⁹Berèken mo taba anakku si Salomo ukur sèkel tuhu-tuhu lako menguèi karina perèntahMu dekket lako memajek bages bekkas mersembah i sienggo kupèmaken kadè siperlu mi sidi.”

²⁰Enggo kessa pul mersodip i, idokken si Daud mo taba jelma nterrem simertumpu i sidi, “Poji mo JAHOWA Dèbatamu.” Nai karina mo kalak i memoji-moji JAHOWA Dèbata sinisembah empung kalak i. Nai sujud mo kalak i pesangapken JAHOWA dekket raja i.

²¹Sibarembenkenna isembellih kalak i mo pinakan, ipèlèken taba JAHOWA, nai ipellaken taba karina jelma nterrem. Laènkenna i lot ngo 1.000 lembu tonggal, 1.000 biri-biri tonggal, 1.000 anak biri-biri isembellih janah itutung bolet-bolet i babo langgaten. Ipèlèken kalak i dèng ma ngo anggur sienggo itentuken mi pèlèen-pèlèen i.

²²Mangan mènum ibagasen sampang atè ngo kalak i arinkenna i hadeppen JAHOWA. Nai itingtingken kalak i mo pedua kaliken si Salomo gabè raja. Merkitè gerar JAHOWA irasmiken kalak i mo ia gabè raja kalak i, janah si Zadok mo gabè imam.

²³Jadi sikira sumingkat si Daud bapana i, naik tahta mo si Salomo sienggo itentuken JAHOWA. Raja isegani karina bangsa Israel ngo ia kumarna menjadi ulanna.

²⁴Karina simerpangkat dekket soridadu soh mi dukak-dukak si Daud sidèbanna i pè me- ngakui kuasa si Salomo gabè raja.

²⁵JAHOWA ngo memaing karinana ginemgem kagum midah Raja Salomo janah memaingsa raja sitermurmurna daripada raja siapaina sambing pè sinung memerèntah Israel.

²⁶Si Daud anak si Isai memerèntah suberri Israel,

²⁷empatpuluh tahun dekkahna. I Hebron 7 tahun dekkahna ia memerèntah janah i Jerusalem 33 tahun.

²⁸Kaya ngo ia janah mersangap, nai matè mo ia enggo kessa tua-tua kalohon. Anakna si Salomo mo singkatna gabè raja.

²⁹Sukuten pernggelluh Raja Daud i mulana nai soh mi ujungna enggo isurat ibas bukku Nabi Samuel, Nabi Natan dekket Nabi Gad.

³⁰Ibas bukku i isukutken ngo tersèngèt pemerèntahenna, kuasana, dekket karina simasa mi dirina, bagi ma bai bangsa Israel dekket kerajaen-kerajaen i sikuliling Israel pè.