Read Batak Dairi 1 Kronika 4 Bible Online

1 Kronika 4 - Batak Dairi bible

1 Kronika 4

¹En mo dèba pemparen si Juda: Si Peres, si Hezron, si Karmi, si Hur dekket si Syobal.

²Si Syobal imo bapa si Reaya, si Reaya imo bapa si Jahat. Si Jahat dua ngo anakna, imo si Ahumai dekket si Lahad. Kalak i mo empung pengisi kuta Zora.

³Anak situaen si Kaleb bak sinibagesna simergerar si Efrat imo si Hur. Pemparen si Hur mo simenembuk kuta Betlehem. Si Etam, si Pnuel dekket si Ezer, imo anak si Hur. Si Etam, tellu anakna imo si Jizreel, si Isma, dekket si Idbas, janah sada berruna mergerar si Hazelelponi. Si Pnuel menembuk kuta Gedor janah si Ezer menembuk kuta Husa.

⁵Si Assur simenembuk kuta Tekoa, dua ngo sinibagesna, imo si Hela dekket si Naara.

⁶Arap si Naara lot ngo empat anakna, imo si Ahuzam, si Hefer, si Temeni dekket si Ahastari.

⁷Arap si Hela, lot ngo anak si Asyhur tellu kalak, imo si Zeret, si Jezohar dekket si Etnan.

⁸Si Anub dekket si Hazobeba imo anak si Kos, empung pemparen kaum Aharhel anak si Harum.

⁹Lot mo sada kalak daholi mergerar si Jabes; lebbih ngo penghormaten bana daripada taba kaka-anggina. Ibaing inangna pè gerarna si Jabes, kumarna mpiah kalohon iakap inangna lako menubuhkensa.

¹⁰Jadi mersodip mo si Jabes taba Dèbata sinisembah kalak Israel, nina mo: “Ialè Dèbata, pasu-pasu mo aku janah pebellang mo nemmu nagerringku èn. Dengani mo aku janah pedaoh mo mara asa ulang mpersah kuakap.” Nai iuèi Dèbata mo sodipna i.

¹¹Si Kelub dengan sibeltek si Suha, lot ngo anakna mergerar si Mehir. Anak si Mehir imo si Eston,

¹²janah si Eston tellu anakna, imo si Bet-Rafa, si Paseah dekket si Tehina simenembuk kuta Nahas. Pemparen kalak i merian i kuta Reka.

¹³Si Kenas dua anakna mergerar si Otniel dekket si Seraya. Si Otniel pè dua ma ngo anakna, imo si Hatat dekket si Meonotai. Anak si Meonotai imo si Ofra.

¹⁴Anak si Seraya imo si Joab simenembuk Kuta Pertukkangen. Karina simerian i lembeng idi kalak sipandè mertukkang ngo.

¹⁵Si Kaleb anak si Jefune, tellu ngo anakna, imo si Iru, si Ela dekket si Naam. Anak si Ela imo si Kenas.

¹⁶Si Jehaleleel lot ngo empat anakna, imo si Zif, si Zifa, si Tireya dekket si Asareel.

¹⁷Anak si Ezra lot ngo empat kalak, imo si Jeter, si Mered, si Efer dekket si Jalon. Kabin mo si Mered dekket si Bica berru raja Mesir. Lot mo sada berru kalak i mergerar si Miryam, janah dua anak mergerar si Samai dekket si Jisba. Si Jisba ngo menembuk kuta Estemoa. Ikabini si Mered ma ngo sada kalak berru Juda; tellu kalak mo anak kalak i, imo si Jered simenembuk kuta Gedor, si Heber menembuk kuta Sokho, janah si Jekutiel menembuk kuta Zanoah.

¹⁹Si Hodia mengkabini turang si Naham. Pemparen kalak èn mo simengusurken kalak Garmi dekket kalak Maakha. Kalak Garmi merian i kuta Kehila, janah kalak Maakha merian i kuta Estemoa.

²⁰Si Simon empat anakna, imo si Amnon, si Rina, si Benhanan dekket si Tilon. Si Jisei dua anakna, imo si Zohet dekket si Ben-Zohet.

²¹Sada kalak anak si Juda mergerar si Sela. Pemparenna imo: Si Er simenembuk kuta Lekha si Lada simenembuk kuta Maresa Kalak pertenun kaèn linen i kuta Bet-Asybea si Jokim Pengisi kuta Kozeba si Joas si Saraf muat berru daberru-daberru Moab, nai balik nola mi Betlehem. Gerar-gerar i karina ibuat ibas bukku gerar-gerar sienggo lama nai.

²³Kalak i karina tukkang gori-gori dekket dulang bai raja, janah merian i kuta Netaim dekket kuta Gedera.

²⁴Lot ngo lima anak si Simeon, imo si Nemuel, si Jamin, si Jarib, si Zerah dekket si Saul.

²⁵Pemparen si Saul imo: Si Salum si Mibsam si Misma si Hamuel si Zakur si Simei.

²⁷Si Simei duapuluh dua kalak ngo dukakna. Sipuluh ennem daholi, ennem daberru. Tapi ukum kaka-anggi si Simei oda piga dukakna. Pemparen si Simeon, oda bagè nterrem pemparen si Juda.

²⁸Soh mi tikki Raja Daud, pemparen si Simeon merian i kuta: Bersyeba, Molada, Hazar-Sual,

²⁹Bilha, Ezem, Tolad, Betuel, Horma, Ziklag,

³⁰Bet-Markabot, Hazar-Susim, Bet-Biri dekket Saaraim.

³²Lot dèng ma ngo kalak i merian i lima bekkas sidèban, imo i Etam, Ain, Rimon, Tokhen, Asan,

³³dekket i kuta sikuliling bekkas i soh mi kuta Baal kan baratdaya. Bagidi mo tersurat kum pemparen si Simeon tersèngèt tarombo dekket bekkas kalak i merian.

³⁴Enda nola imo gerar-gerar èkuten kaum i horong Simeon: Si Mesobab si Jamlekh si Josa anak si Amazia si Joel si Jehu anak si Josibya (si Josibya imo anak si Seraya, kempu si Asiel), si Elyoënai si Jaakoba si Jesohaya si Asaya si Adiel si Jesimiel si Benaya si Ziza anak si Sifei (tarombo si Sifei mi babo imo, si Alon, si Jedaya, si Simri, si Semaya). Kumarna dak mertambah-tambah ngo ripè kalak i,

³⁹gabè mersèrak ngo kalak i mi kesunduten soh mi gembar kuta Gedor silot i sada napa-napa. Kan kebincaren napa-napa i jupa kalak i ngo jampalen merandal janah mbellang janah selloh bekkas pinakan kalak i. Arnia, kalak Ham ngo merian i si janah ngelluh merdamè-damè.

⁴¹Tikan si Hizkia raja i Juda ijuhap pemparen si Simeon i mo kuta Gedor. Ireppuk kalak i mo undung-undung pengisi kuta i bak kalak Meunim pè, nai ipuari mo jelma pengisina i. Nai gabè menettap i si mo kalak i kumerna mbuè i si alah-alah man gagaten pinakanna.

⁴²Iuluken dukak-dukak si Jisei, imo si Pelaca, si Nearya, si Refaya dekket si Uziel, bak 500 kalak nai ibas marga Simeon nai lompat mi Edom i kebincaren.

⁴³Ibunuhi kalak i mo kalak Amalek sitadingna dèng, nai gabè merian i si mo kalak i mulai i sidi nai.