Read Batak Dairi 1 Kronika 5 Bible Online

1 Kronika 5 - Batak Dairi bible

1 Kronika 5

¹Si Ruben imo anak si Jakob situaen. Tapi kumarna merlangkah julu meddem si Ruben taba sada kalak siterbuang bapana, gabè iompat mo hak situaen bana nai, janah iberrèken bai si Josep. Tukasi pè bagidi, ukum simergegohna ipas pemparen si Jakob, oda ngo marga Josep, tapi marga Juda ngo. Nai dèng ma ukum perlebbè kalohon gabè raja karina bangsa Israel ipas marga Juda i nai ngo.

³Si Ruben anak situaen si Jakob, empat anakna, imo si Henokh, si Palu, si Hezron, dekket si Karmi.

⁴En mo pemparen si Joel; si Semaya, si Gog, si Simei, si Mika, si Reaya, si Baal dekket si Beera. Si Beera mo èkuten marga Ruben, tikala ia itangkup si Tiglat-Pileser raja Assur, janah iembah mi buangen.

⁷Ibas tarombo tersurat ma ngo pengulu horong èn ibas marga Ruben, imo si Jeiel, si Zakharia,

⁸dekket si Bela anak si Azas kempu si Sema i horong si Joel nai. Marga Ruben merian i Aroër dekket i nagerri mulai i Aroër nai mi utara soh mi Nèbo dekket Baal-Meon.

⁹Mbuè kalohon ngo pinakan kalak i i aur Gilead. Kumarna i gabè iiani kalak i mo aur kan kebincaren nai soh mi padang gurun si amak soh mi Laè Efrat.

¹⁰I tikki Raja Saul, ijuhap janah italuken marga Ruben ngo kalak Hagri kan kebincaren Gilead, nai iiani mo nagerri i.

¹¹Kan utara aur marga Ruben merian ngo marga Gad i tanoh Basan soh mi Salkha kan kebincaren.

¹²Ibas marga Gad i nai si Joel mo empung kalak sitermurmurna, janah si Safam mo empung nomor duana. Si Jaenai bak si Safat empung kaum-kaum sidèbanna.

¹³Kalak sidèban ipas marga Gad termasuk mo sipitu kaum èn: Mikhael, Mesulam, Syeba, Jorai, Jakan, Ziya, dekket Eber.

¹⁴Pemparen si Abihail anak si Uri ngo kalak i. Tarombo kalak i i terruh nai mi babo bagèèn mo: Si Abihail, si Huri, si Jaroah, si Gilead, si Mikhael, si Jesisai, si Jahdo, si Bus.

¹⁵Pengulu kaum-kaum imo si Ahi, anak si Abdiel kempu si Guni.

¹⁶Merian i nagerri Basan ngo kalak i dekket i Gilead, bak i kuta sini nagerri i dekket i karina jampalen i Saron.

¹⁷Tarombo èn ibahan tikan si Jotam raja Juda, janah si Jerobeam raja Israel.

¹⁸Soridadu marga Ruben, Gad dekket marga Manasye kan kebincaren laè Jordan lot ngo 44.760 kalak soridadu sienggo ilatih janah merpengalamen, mertambeng-tambeng, merpeddang dekket merpanah.

¹⁹Mergeraha ngo kalak i mengalo marga Jetur, Nafis dekket Nodab imo marga-marga bangsa Hagri.

²⁰Percaya ngo soridadu i taba Dèbata janah ipido ngo pengurupi baNa nai. Iuèi Dèbata ngo pengidoen kalak idi, iberèken ngo kemenangen bai kalak i mengalo kalak Hagri i bak simengurupisa pè.

²¹Kumerna merkitè taki Dèbata ngo masa geraha i, gabè nterrem ngo ibunuh kalak i musuh i. Itaban kalak i ngo 100.000 kalak janah irampasi kalak i 50.000 unta, 250.000 biri-biri dekket 2.000 kalodè. Nai gabè merian i aur i mo kalak i soh mi tikki tertaban bangsa Israel janah ibuang.

²³Dèba marga Manasye merian i Basan ngo soh mi utara mi Baal-Hermon, Senir dekket Delleng Hermon. Makin ndekkah makin nterrem ngo kalak i.

²⁴En mo gerar pengulu-pengulu horong kalak i: Si Hefer, si Jisei, si Eliel, si Azriel, si Jeremia, si Hodawya dekket si Jahdiel. Karinana kalak i lubalang mahantu ngo.

²⁵Oda ngo setia kalak Israel taba Dèbata sinisembah empung kalak i. Itadingken kalak i ngo Ia gabè mersembah nola taba sembahen bangsa-bangsa sinipuari Dèbata i nagerri Kanaan i nai.

²⁶Kumarna i idungkul Dèbata mo ukur si Pul raja Assur, nai berkat mo ia menjuhap nagerri i. Si Pul èn mo simergerar si Tiglat-Pileser. Nai itaban mo marga Ruben, Gad dekket marga Manasye sikan kebincaren Laè Jordan janah ibuang mi Halah, Habor, Hara dekket mi sada bekkas ndessing mi Laè Gozan. I si mo kalak i menettap soh ari sidari èn.