Read Batak Dairi 2 Kronika 1 Bible Online

2 Kronika 1 - Batak Dairi bible

2 Kronika 1

¹Si Salomo anak Raja Daud enggo mbangkit raja janah ntegguh ngo ia mengerajai ibas kerajaen Israel. JAHOWA Dèbatana ngo memasu-masusa janah memaingsa merkuasa kalohon.

²Karina kepala soridadu si 1.000 dekket si 100, bak simerpangkat i pemerèntahen dekket karina èkuten horong Israel iperèntahken Raja Salomo

³asa rebbak laus dekketsa mi bekkas mersembah i Gibeon. Asa mi si pè kalak i laus, kumarna i si ngo lot Undung-undung JAHOWA sinibahan si Musa naposo JAHOWA, tikan i gurun pasir dèng kalak i. (

⁴Tapi ukum Pèti Perpadanen JAHOWA i Jerusalem ngo enggo ibas undung-undung sinipajek Raja Daud bekkas Pèti i tikanna ilompat i Kiryat-Jearim nai.)

⁵Langgaten tembaga sinitempa si Bezaleel anak si Uri kempu si Hur pè, i Gibeon i lebbè Undung-undung JAHOWA ngo. Raja Salomo dekket karinana ginemgem, i sidi ngo menembah JAHOWA.

⁶I hadeppen Undung-undung i, ipèlèken ngo ibabo langgaten tembaga i 1.000 pinakan mahan pèlèen situtungen bai JAHOWA.

⁷Bernginkenna i, ipacidah Dèbata ngo dirina taba si Salomo ninganna idokken, “O Salomo, pengmdo mo barang kadè dok atèmu, asa Kuberèken i bamu!”

⁸Ialoi si Salomo mo, “Ialè Dèbata, Enggo ntangkas ipacidah kono ngkelleng atèmu midah bapangku si Daud, janah Enggo ma ipebangkit kono aku gabè raja meningkatsa.

⁹Bagèndari pè alè JAHOWA Dèbata, pesaut mo padanMu taba bapangku i. Enggo ipebangkit kono aku gabè mengerajai bangsa mbellen èn janah siso terbilangen buèna.

¹⁰Kumarna i, berrèken mo bangku kebijaken dekket perbinettohen lako menguluken kalak i. Kum mada, bakunè mo pemaingku lako memerèntah bangsa sinterrem kalohon èn?”

¹¹Ialoi Dèbata mo si Salomo, “Selloh ngo pengidoenmi. Oda ngo kinibèak barang harta asa termurmur barang asa matè karina musuhmu barang pè umur nggeddang ipido kono, tapi kebijaken dekket perbinettohen lako memerèntah bangsangKu siKupesakat bamu i ngo.

¹²Kumarna i Kuberèken mo bamu kepantasen dekket perbinettohen i. Tambahna i Kubaing mo ko lebbih nduma, lebbih bèak dekket lebbih termurmur daripada raja siapaina sambing pè i tikki sienggo laus barang pè i tikki silako roh.”

¹³Nai itadingken si Salomo mo bekkas mersembah i Gibèon silot i Undung-undung JAHOWA i, nai balik mo ia mi Jerusalem. I sidi nai ngo ia memerèntah Israel.

¹⁴Icukupi mo soridaduna 1.400 kurèta perang dekket 12.000 kuda perang. Dèba i Jerusalem ngo ibaing janah dèba nai ibaing i barang piga kuta sidèbanna i.

¹⁵Ukum i tikala pemerèntahen si Salomo, barang biasa ngo emmas bak pirak i Jerusalem, bagè dosken batu sambing ngo iètong; kayu arès Libanon pè mèduk kalohon ngo tosè bagè kayu ara biasa.

¹⁶Merkitèken pertiga-tiga simengurupi raja, itokori ngo kuda i Mesir bak i Kewe nai,

¹⁷janah kurèta perang pè itokor ngo i Mesir nai, nai idèa nola ma mo taba raja-raja Het dekket raja-raja Siria merharga 150 kèpèng pirak gennep sada kuda, nai 600 kèpèng pirak ngo sada kurèta perang.