Read Batak Dairi 2 Kronika 10 Bible Online

2 Kronika 10 - Batak Dairi bible

2 Kronika 10

¹Laus mo si Rehabeam mi Sikhem kumarna enggo pulung i sidi kalak Israel si kan utara naing pebangkitkensa gabè raja.

²Tikanna idi i Mesir dèng ngo si Jerobeam anak si Nebat kumarna mperrus ia bai si Salomo nai. Idengkoh kessa mo tersèngèt si Rehabeam, balik mo ia mi Israel.

³Idilo kalak Israel sikan utara ngo si Jerobeam, nai rebbakken laus mo kalak i dekketsa menghadep si Rehabeam. Idokken kalak i mo,

⁴“Ukum si Salomo bapa Rajai mbotong ngo boban nami ibaing. Mula ipenahang Rajai boban nami janah mengorui kinipersah nami, tunduk ngo kami bai Rajai.”

⁵Ialoi si Rehabeam mo, “Kennah merpikir ngo aku lebbè. Roh nola mo kènè enggo kessa tellu ari.” Nai molih mo kalak i.

⁶Nai ipido si Rehabeam mo peddah bai situa-tua nai sienggo nung gabè pemeddahi taba si Salomo bapa si Rehabeam, “Bakunè ngo ningku mengaloi kalak i?” nina si Rehabeam mengkusoi. “Kadè ngo peddah ndènè?”

⁷Ialoi kalak i mo, “Mula uè Rajai memaing merandal taba ginemgem janah pegasangken ukur kalak i, aloi mo kalak i dekket kata merandal, asa setia kalak i taba Rajai sidekkah-dekkahna.”

⁸Tapi oda ngo idengkohken si Rehabeam peddah situa-tua i. Nai gabè laus mo ia mendahi kalak siterposoen dèngan terbangna janah mengurupisa bagèndari.

⁹Ikusoken mo taba kalak i, “Bakunè peddah ndènè taba aku lako mengaloi ginemgem simengidoken bangku asa kupenahang boban kalak i?”

¹⁰Ialoi kalak i mo, “Bagèen mo nemmu pendokken Rajai bai kalak i, ‘Bakunè pè ndotèna aku, mergegohen dèng ngo aku asa bapangku.

¹¹Bapangku mengampèken boban mbotong taba kènè, ukum aku mengampèken lebih mbotong dèng ngo boban ndènè. Kettang ngo ibaing mengeligas kènè, tapi ukum aku dori tada-tada ngo kubaing memalui kènè.’ ”

¹²Enggo kessa tellu ari roh mo si Jerobeam bak karina kalak i menghadep Raja Rehabeam, bagè sienggo iperèntahken kin.

¹³Meralo mi peddah situa-tua, mèter tunggang mo permongkamna taba siroh mendahisa i.

¹⁴Bagè pendokken kalak i siterposoen i nina mo, “Boban mberrat ngo iampèken bapangku taba kènè, tapi ukum aku lebbih mberrat dèng ngo kuampèken. Kettang ngo ibaing mengeligas kènè, tapi ukum aku, dori tada-tada ngo kubaing memalui kènè.”

¹⁵Oda isarihken pengidoen jelma nterrem i. Tapi hendak JAHOWA Dèbata ngo i. Kennah saut ngo sinidokken JAHOWA tersèngèt si Jerobeam anak si Nebat merkitè Nabi Ahia i Silo.

¹⁶Idah kalak Israel kessa mo oda uè raja i mendengkohken pengidoen kalak i, mèter mersurak mo kalak i, “Man kadènta mo si Daud dekket pinemparna; oda nung kadè ibahanken kalak i banta. Alè Israel, ita kènè mo balik. Belli mo si Rehabeam i mengatur dirina.” Nai balik mo kalak Israel,

¹⁷gabè pellin raja kalak Juda mo kessa si Rehabeam.

¹⁸Tukasi pè bagi ipasulak si Rehabeam dèng ma ngo si Adoniram, imo sada kalak mandur perodi, lako pemènakken jelma nterrem i. Tapi ibentiri kalak i ngo ia gabè matè. Ukum si Rehabeam maluah ngo janah isudu mo mi kurètana, nai mperrus mo ia mi Jerusalem.

¹⁹Mulai i sidi nai mo dak memberontak kalak Israel si kan utara taba raja-raja pemparen si Daud.