Read Batak Dairi 2 Kronika 11 Bible Online

2 Kronika 11 - Batak Dairi bible

2 Kronika 11

¹Soh kessa mo Raja Rehabeam i Jerusalem, ipepulung mo 180.000 soridadu simahantuna i marga Juda dekket Benjamin nai lako menjuhap kalak Israel asa hot kuasana taba marga-marga sikan utara Israel.

²Tapi mèter ipasulak JAHOWA mo Nabi Semaya,

³pesohken tennah èn taba si Rehabeam dekket taba karina jelma i marga Juda nai dekket Benjamin,

⁴“Ulang juhap kènè kaka-anggi ndènè kalak Israel i. Mulak mo kènè. Karina simasa i, hendakKu ngo i.” Nai iuèi kalak i karinana mo sinidokken JAHOWA i janah sondat mo kalak i berkat menjuhap si Jerobeam.

⁵Merian i Jerusalem ngo si Rehabeam. Ipasulak mo kalak lako mahan bèntèng i kuta silot i Juda dekket Benjamin, imo kuta Betlehem, Etam, Tekoa,

⁶Bet-Zur, Sokho, Adulam,

⁸Gat, Mares, Zif,

⁹Adoraim, Lakhis, Azeka,

¹⁰Zora, Ayalon dekket Hebron.

¹¹Ipegotting ngo kuta i janah ibaing sada kalak èkuten soridadu i gennep kuta i. Karina kuta i ihantari ngo bekkel pangaen, minak zaitun dekket anggur

¹²bagi ma dekket tambeng-tambeng dekket kujur. Merkitè bagidi tong mo ikuasai nagerri Juda dekket Benjamin.

¹³Ukum imam-imam dekket kalak Lewi i suberri aur Israel, laus ngo asa rebbak dekket si Rehabeam.

¹⁴Ipentadingken kalak Lewi i ngo jampalen dekket tanohna janah mermbungkasen mo kalak i mi Juda dekket Jerusalem, ai oda ipadiat si Jerobeam dekket raja-raja simenggancihisa kalak i mengula sikira imam JAHOWA.

¹⁵Si Jerobeam ngo pebangkitken imamna sendiri lako mengkebasi i bekkas mersembah taba sembahen dekket jelma bak gana-gana lembu sinibahanna sendiri.

¹⁶Suberri jelma ibas karina marga Israel simertuhu-tuhu naing menembah JAHOWA, Dèbata kalak Israel, mbungkas mi Jerusalem mengèkutken kalak Lewi i asa ndorok kalak i memèlèken pèlèen bai JAHOWA Dèbata sinisembah empung kalak i.

¹⁷Merkitè bagidi, gabè ntegguhen mo raja Juda. Sidekkah tellu tahun itumpak kalak i ngo pemerèntahen si Rehabeam anak si Salomo i, janah nggelluh tosè bagè tikala pemerèntahen Raja Daud dekket Raja Salomo.

¹⁸Kabin mo si Rehabeam dekket si Mahalat; bapa si Mahalat imo si Jerimot anak si Daud, inangna imo si Abihail berru si Eliab kempu si Isai.

¹⁹Lot ngo tellu anak kalak i, imo si Jeus, si Semarya dekket si Zaham.

²⁰Nai ikabini si Rehabeam nola mo si Maakha berru si Absalom. Empat ngo anak i sidi nai, imo si Abia, si Atai, si Ziza dekket si Selomit.

²¹18 si Rehabeam dekket 60 kalak siterbuangna, 28 kalak anakna dekket 60 kalak berruna. Ipas karina sinibagesna dekket karina siterbuangna i, si Maakha ngo mo kekelengen atèna.

²²Kemulihkenna i mo asa ngkellengen atèna midah si Abia anak si Maakha daripada karina anakna sidèbankenna i, nai gabè si Abia ngo ipilih singkatna gabè raja.

²³Bijak ngo pemaing si Rehabeam taba dukak-dukakna i merkitè iberèken ulaen kalak i janah ibaing mi gennep kuta gotting i suberri nagerri Juda dekket Benjamin. Iberèken ngo bai kalak i pangaen merotcè-otcè, janah ipèmaken bai kalak i nterrem mahan sinibagesna.