Read Batak Dairi 2 Kronika 12 Bible Online

2 Kronika 12 - Batak Dairi bible

2 Kronika 12

¹Enggo kessa ntegguh perkundul si Rehabeam mengerajai, gabè itadingken ukurna bak kalak Israel mo pati-patien JAHOWA,

²janah oda nèngè setia baNa. Kumarna i ihukum JAHOWA mo kalak i. I tahun pelimaken pemerèntahen si Rehabeam, ijuhap si Sisak raja Mesir mo Jerusalem

³merdengan 1.200 kurèta perang, 60.000 tenterra merkuda dekket soridadu oda terbilang buèna, dekket mo i tenterra Libia, Suki, dekket Sudan.

⁴Itaban mo kuta gotting i Juda nai soh mo kalak i mi Jerusalem.

⁵Tikala i ngo pulung i Jerusalem si Rehabeam dekket pengulu-pengulu Juda, kumarna mbiar midah si Sisak. Nai roh mo Nabi Semaya mendahi kalak i mendokken, “Bagèen ngo nina JAHOWA, ‘Kumarna itadingken kènè Aku, Aku pè kutadingken mo kènè asa ikuasai si Sisak kènè.’ ”

⁶Nai iakui kalak i mo, enggo merdosa kalak i. Idokken kalak i mo, “Adil ngo pemaing JAHOWA.”

⁷Idah JAHOWA kessa mo enggo ipecerrep kalak i ukurna, idokken nola mo mbang si Semaya, “Kumarna iakui kalak i dosana oda mo Kubinasaken kalak i. Kusudu mo paluahken kalaki; oda pella merumpak Jerusalem.

⁸Tapi ikuasai si Sisak mo kalak i, asa ibettoh kalak i laènna menguèi taba Aku bak menguèi perkuasa dunia.”

⁹Nai ijuhap Raja Sisak mo Jerusalem janah itaban mo barang-barang maharga silot i Bages JAHOWA dekket istana raja, bagi ma bak tambeng-tambeng emmas sinibahanken Raja Salomo.

¹⁰Nai ibahan si Rehabeam nola mo gancihna tambeng-tambeng tembaga, janah ipesakat mo i asa ijamoti lubalang pertaram pèntu pengkeruhen mi istana.

¹¹Gennep laus raja i mi Bages JAHOWA, iembah pertaram i mo tambeng-tambeng i, enggo kessa pul, iolihken ma mo mi bilik pertaramen.

¹²Kumarna ipecerrep raja i ukurna i hadeppen JAHOWA dekket kumarna lot dèng simerandal i Juda gabè oda nèngè ilagai JAHOWA si Rehabeam janah oda ibinasaken ia.

¹³I Jerusalem ngo memerèntah si Rehabeam janah muat-muat mbelgahna ngo kuasana. Merumur 41 tahun mo ia tikan mbangkit raja, janah 17 tahun dekkahna ia memerèntah i Jerusalem, kuta sinipilih JAHOWA i suberri aur Israel mahan bekkas mersembah tabasa. Inang si Rehabeam imo si Naama i nagerri Amon nai.

¹⁴Jahat ngo ulah-ulah si Rehabeam kumarna oda iusahaken mengulaken lemmo atè JAHOWA.

¹⁵Sukuten tersèngèt si Rehabeam i bennana nai soh mi puncana bagi dekket tarombona enggo isurat ibas Tori-torien Nabi Semaya dekket ibas bukku Tori-torien Nabi Ido. Dak masa ngo geraha i tengah-tengah si Rehabeam dekket si Jerobeam.

¹⁶Matè mo si Rehabeam janah ikuburken mi perkuburen raja-raja i Kuta si Daud. Anakna si Abia mo mbangkit raja singkatna.