Read Batak Dairi 2 Kronika 13 Bible Online

2 Kronika 13 - Batak Dairi bible

2 Kronika 13

¹I tahun pesipuluh ualuhken pemerèntahen Raja Jerobeam mengerajai Israel, mbangkit raja mo si Abia gabè raja Juda,

²janah tellu tahun mo dekkahna memerèntah i Jerusalem. Inangna mergerar si Mikhaya berru si Uriel i kuta Gibea nai. Nai masa mo geraha bai si Abia dekket si Jerobeam.

³Ipedèmpu si Abia mo 400.000 soridadu, janah si Jerobeam ipedèmpu ma mo 800.000 kalak soridaduna.

⁴Pehadep mo sidua rombongen soridadu i i delleng Efraim. Laus mo si Abia mi babo Delleng Zemaraim, nai idiloken mo taba si Jerobeam dekket kalak Israel i, “Dengkohken kènè!

⁵Ibettoh kènè ngo, enggo merpadan JAHOWA Dèbata kalak Israel dekket si Daud mendokken, ia dekket pinemparna memerèntah Israel soh mi amman sumendah. Oda ngo terobah padan i.

⁶Keppè tukasi pè bagidi memberontak ngo si Jerobeam anak si Nebat taba si Salomo rajana i.

⁷Ipepulung ngo kalak siso meradat lako memaksaken lemmo atè kalak i taba si Rehabeam anak si Salomo, tikala pososu dèng janah oda merpengalamen dèng ia lako mengalo.

⁸Bagèndari pè dok atè ndènè ndorok ialo kènè kuasa siniberèken JAHOWA taba pemparen si Daud kumarna nterrem soridadu ndènè dekket kumarnaken gana-gana lembu emmas ndènè sinibaing si Jerobeam gabè sembahen ndènè.

⁹Otang enggo ipelaus kènè imam-imam JAHOWA pemparen si Aron dekket kalak Lewi karinana? Penggancihna barang isè sèkel gabè imam, asal mo iembah sada lembu barang pitu biri-biri, ipebangkit kènè mo ia gabè imam, tapi oda ngo lako bai Dèbata, kumara bagi ngo tuhu cara bangsa-bangsa sidèban i lako pebangkitken imam kalak i. Tapi ukum kami oda ngo bagi kubakin kami.

¹⁰Kami hot ngo menguèi taba JAHOWA Dèbata nami, janah oda kutadingken kami ia. Imam-imam nami pè tong ngo pemparen si Aron janah kalak Lewi pè tong ngo mengurupi kalak i.

¹¹Gennep ceggen dekket gennep mboen ngo kalak i menutung dahupa dekket memèlèken pèlèen situtungen bai JAHOWA, bak memahan roti hantaren. Gennep berngin dak ilakati kalak i ngo pelita ipas nèhè pelita emmas. Dak kuuèi kami ngo perèntah-perèntah JAHOWA, tapi ukum kènè enggo mo itadingken kènè Ia.

¹²Dèbata ngo simenguluken kami janah imam-imamNa pè i sèn ngo. Enggo mo kebbas kalak i lako menempul sarunè sikira tanda bai nami lako menjuhap kènè. Kènè alè kalak Israel, ulang alo kènè JAHOWA, Dèbata empung ndènè i. Bakunè pè oda ndorok mennang kènè.”

¹³Ningan bagidi ipasulak si Jerobeam mo dèba soridaduna lako menghempit soridadu Juda i podi nai, janah dèba mengalo i lebbè nai.

¹⁴Idah bala tenterra Juda kessa mo enggo ikeppung keppè kalak i, mersurak mo kalak i mengido urup taba JAHOWA. Isempul imam-imam ma mo sarunè,

¹⁵nai idiungken tenterra Juda mo surak geraha ninganna berkat lako juhap iuluken si Abia. Ningan mersurak i kalak i, italuken Dèbata mo si Jerobeam bak soridadu Israel,

¹⁶gabè mperrus mo kalak i. Mennang mo ibaing JAHOWA kalak Juda mengalo kalak i.

¹⁷Ketaluen mbellen ngo ibaing si Abia dekket soridaduna bai kalak Israel; matè mo 500.000 kalak soridadu kalak i simahantuna.

¹⁸Mennang kalak Juda, kemulihken JAHOWA, Dèbata empung kalak i ngo iasangken.

¹⁹Tikan iletlet si Abia soridadu si Jerobeam, itaban mo dèba kuta dekket sosor-sosor sikulilingna, imo Betel, Jesana dekket Efron.

²⁰Sidekkah pemerèntahen si Abia, oda terolihken si Jerobeam kuasana. Ujungna ibunuh JAHOWA mo ia.

²¹Tapi ukum si Abia makin merkuasa ngo. Lot ngo 14 kalak sinibagesna, 22 kalak anakna janah 16 kalak berruna.

²²Sukuten sidèbanna i tersèngèt si Abia dekket tersèngèt karina sinibaingna, enggo isurat ibas bukku Tori-torien Nabi Ido.