Read Batak Dairi 2 Kronika 14 Bible Online

2 Kronika 14 - Batak Dairi bible

2 Kronika 14

¹Enggo kessa matè Raja Abia janah ikubur mi perkuburen raja-raja i Kuta si Daud, anakna si Asa mo mbangkit raja singkatna. Tikan pemerèntahen si Asa, mènak ngo nagerri Juda sipuluh tahun dekkahna.

²Pesampangken atè JAHOWA Dèbatana ngo si Asa kumarna adil ngo ibahanken janah merandal.

³Icapakken ngo langgaten-langgaten bangsa sidèban dekket bekkas mersembah taba sembahen. Mèjan-mèjan sembahen pè igeppui, janah irumpakken tihang gana-gana Sembahen Asyera.

⁴Idokken ngo kalak Juda asa nggelluh mengèkutken lemmo atè JAHOWA, Dèbata empung kalak idi janah menguèi karina peddah sinihatorkenNa.

⁵Karina bekkas mersembah taba sembahen dekket bekkas menutung dahupa, icapakken i gennep kuta silot i Juda. Nai mènak mo kerajaen i ipas pemerèntahenna,

⁶gabè ndorok mo ibahan bèntèng-bèntèng i kuta Juda. Tah piga tahun dekkahna oda lot geraha, kumarna iberèken JAHOWA ngo kedamèen bana.

⁷Idokken si Asa mo taba jelma nterrem Juda, “Selloh mo sipegotting kutanta merkitè memaing pagar batu sikulilingna bak pantar penatapen dekket pèntu pengkeruhen mergerruk-gerruk. Enggo mo sikuasai nagerri èn, kumarna enggo siuèi lemmo atè JAHOWA Dèbatanta. Ia ngo menjamotken kita dekket menjagaken kemènaken i suberri nagerrinta.” Nai itebenai kalak i mo membangun janah pul mo ulaen i ibagasen selloh.

⁸Soridadu Raja Asa lot ngo 300.000 kalak Juda mersinjataken tambeng-tambeng dekket kujur dekket 280.000 kalak Benjamin mersinjataken tambeng-tambeng, dekket panah. Karina kalak i soridadu berani bana terlatih.

⁹Tikan sikali lot mo sada kalak Sudan mergerar si Zerah mengkubu Juda merdengan soridadu 1.000.000 dekket 300 kurèta perang. Soh ngo kalak i mi Maresa.

¹⁰Nai berkat mo si Asa mengalo si Zerah i, janah mersiatur barisenna mo kalak idi i Napa Zefata ndessing mi Maresa.

¹¹Nai mersodip mo si Asa mendahi JAHOWA Dèbatana, “Ialè JAHOWA, pellin kono ngo kessa sindorok mengurupi kalak sindotè meradepken kalak simergegoh. Urupi mo kami bagèndari, alè JAHOWA Dèbata nami. Tunandè baMu ngo kami janah mengasangken gerarMu ngo kami berkat mergeraha mengalo soridadu silahlah kalohon èn. Alè JAHOWA kono ngo Dèbata nami. Ulang belli diriMu italuken sada kalak jelma.”

¹²Nai ijuhap si Asa dekket soridadu Juda mo tenterra Sudan i. Italuken JAHOWA mo soridadu Sudan i, gabè barat-burut mo kalak i mperrus.

¹³Iperlet si Asa bak soridaduna i mo kalak i soh mi Gerar. Nterrem kalohon ngo matè kalak Sudan i, gabè maknè mergegoh kumarna italuken JAHOWA bak soridadu Juda, janah itaban kalak i ma mo mbuè kalohon barang-barang kalak i. Enggo kessa i irumpakken soridadu Juda mo kuta i nagerri sikuliling Gerar, kumarna i buradan mo pengisina i ibaing JAHOWA. Itaban tenterra Juda mo karina kuta i, mbuè kalohon mo harta dapet kalak idi.

¹⁵Ijuhap kalak i ma mo perundung-undungen permakan janah menaban mbuè kalohon biri-biri dekket unta. Enggo kessa i balik mo kalak i mi Jerusalem.