Read Batak Dairi 2 Kronika 15 Bible Online

2 Kronika 15 - Batak Dairi bible

2 Kronika 15

¹Idomi tendi Dèbata mo Nabi Azarya anak si Oded,

²nai berkat mo ia mendahi Raja Asa, nina mo, “Alè Raja Asa, dekket karina kalak Juda bak Benjamin. Dengkohken kènè mo! Ndessing ngo JAHOWA bai ndènè mula ndessing kènè baNa. Mula ipido kènè peddah bana nai, iberèken ngo. Tapi mula oda isuihken kènè ia, kènè pè oda ma ngo isarihken.

³Enggo mo ndekkah kalohon kalak Israel oda uè menguèi taba Dèbata sibennar i, oda nè pati-patin sikennah iuèi, janah oda lot nèngè imam-imam mengajari kalak i.

⁴Tapi mula tersessak kalak i, ipido kalak i mo pengurupien bai JAHOWA Dèbata Israel. Ipengido kalak i mo ajarNa, janah iberèken ngo.

⁵Sidangna i oda terbaing jelma nèngè kiladang ibagasen kemènaken, ai i gennep nagerri ngo lot kegontaren.

⁶Bangsa sisada mendèa bangsa sidèban, janah kuta sisada mendèa kuta sisada nai, kumarna Dèbata ngo maing masa kegontaren i bai kalak i.

⁷Tapi kennah sobar ngo kènè janah berrani. Merhasil ngo usaha ndènè.”

⁸Idengkoh si Asa kessa mo rana si Azarya anak si Oded i, mèter kèkè mo ukurna. Ipesisi mo karina gana-ganaen i nagerri Juda bak Benjamin nai dekket i karina kuta sienggo itaban i delleng Efraim, nai ipelias mo langgaten JAHOWA, silot i kasèan Bages JAHOWA.

⁹Nterrem ngo kalak Efraim, Manasye dekket Simeon gabè roh rebbak si Asa janah merian i kerajaenna, kumarna idah kalak i iurupi JAHOWA ngo ia. Idokken si Asa mo kalak i asa rebbak dekket kalak Juda bak Benjamin,

¹⁰pulung mi Jerusalem. Nai tumpu mo kalak i tupung bulan tellu i tahun pesipuluh limaken pemerèntahen si Asa.

¹¹Sidarinkenna i ipèlèken kalak i mo bai JAHOWA 700 lembu dekket 7.000 biri-biri, imo sinitaban kalak i i pergerahaen nai.

¹²Ijandiken kalak i ngo bai JAHOWA, magahken kennah mertuhu-tuhu ibas pusuh peratènna nggelluh mengèkutken lemmo atè JAHOWA, Dèbata empung kalak i.

¹³Barang isè sambing pè, barang situa-tua bang naposo, daholi bang daberru, siso nggelluh mengèkutken lemmo atè JAHOWA, kennah ihukum matè ngo.

¹⁴Nai nggang kalohon mo sora kalak i mersumpah bai JAHOWA mendokken icèkèp kalak i ngo peddahna i. Nai meroang-oang mo kalak i ninganna menempul sarunè.

¹⁵Karinana ginemgem Juda mersampang atè kumarna enggo ibaing kalak i persumpahen ibas pusuh peratènna nai. Sennang mo iakap kalak i menembah JAHOWA, janah JAHOWA pè tuju ngo atèna menjalo kalak i. Ibaing JAHOWA ngo kemènaken i nagerri kalak i.

¹⁶Nai ipengadi Raja Asa mo empungna si Maakha, ipas ulanna nai sikira permasuari kemulihken ibahan mèjan gana-gana luhlah bai Asyera imo sembahen asa merrak-merrik. Irumpakken janah igeppui si Asa mo gana-gana i nai ilekkup mo i Napa Kidron.

¹⁷Tukasi pè oda dèng karina bekkas mersembah taba bègu sininagerri i igeppui si Asa, tapi dak tettap setia ngo ia bai JAHOWA sidekkah nggelluhna.

¹⁸Karinana emmas bak pirak bang harta taban-tabanen sidèban milik bapana dekket milikna sendiri pè ibaing ngo mi Bages JAHOWA gabè milik JAHOWA.

¹⁹Soh mi tahun petellupuluh limaken pemerèntahen si Asa, oda nèngè pennah masa geraha i nagerri i.