Read Batak Dairi 2 Kronika 16 Bible Online

2 Kronika 16 - Batak Dairi bible

2 Kronika 16

¹I tahun petellupuluh ennemken pemerèntahen Raja Asa i Juda, ijuhap si Baesa raja Israel mo Juda, janah ipegotting mo kuta Rama asa tutup dalan karuar masuk mi Juda.

²Nai ibuat Raja Asa mo emmas bak pirak i Bages JAHOWA nai dekket i istana raja nai, i tengesken mo i mi Damaskus taba si Benhadad raja Siria merdengan tennah bagèen,

³“Sibaing mo padan peralè-alèen banta, bagè sienggo ibaing partuanta kin. I sèn kutengesken ngo emmas dekket pirak mahan sibasa-basa bai ndènè dekket pengidoen asa putusken kènè peralè-alèen ndènè dekket si Baesa raja Israel, asa itarik soridaduna i nagerringku nai.”

⁴Toko ngo atè si Benhadad tersèngèt rana i, nai ipasulak mo lubalangna rebbak dekket soridaduna lako menjuhap kuta i Israel. Italuken kalak i mo kuta Iyon, Dan, Abel-Bet-Maakha dekket karina kuta bekkas bekkel i Naptali.

⁵Idengkoh Raja Baesa kessa mo i, ipengadi mo pegottingken kuta Rama janah itadingken mo kuta i.

⁶Nai idokken Raja Asa mo parangenna i suberri Juda nai lako petaruh batu bak kayu sinipakkè si Baesa i Rama i kin nemmu lako pegottingken kuta i. Gabè ibaing si Asa nola mo i lako pegottingken kuta Geba dekket Mizpa.

⁷Tikanna i roh mo Nabi Hanami mendahi Raja Asa mendokken, “Kumarna tunandè taba raja Siria kono, oda taba JAHOWA Dèbatamu, gabè bennè mo kesempatenmu lako menaluken soridadu raja Israel.

⁸Otang kalak Sudan dekket Libia pè nterrem ngo soridaduna janah mbuè kurèta perang dekket tenterra merkuda? Tukasi pè bagi iberèken JAHOWA ngo kemenangen bamu mengalo kalak i, kumarna tunandè bana kono.

⁹Iperdimata JAHOWA ngo suberri dunia èn, lako merèken gegoh bai kalak simerketoken janah setia baNa. Asa kemotoen ngo pemaingmu i, kumara i mulai bagèndari nai dak masa mo bamu geraha.”

¹⁰Gabè melaga mo si Asa mendengkoh rana Nabi Hanani i, gabè ikurung mo nabi i. Tikanna i itèndes si Asa mo tah piga-piga kalak ginemgemna.

¹¹Karinana simasa tikan pemerèntahen si Asa i bennana nai soh mi puncana enggo isurat ibas bukku Tori-torien Raja-raja Juda dekket Israel.

¹²I tahun petellupuluh sibahken pemerèntahen si Asa, cioen mo nèhèna kacimbang. Tukasi pè bagi oda ngo ipido pengurupien bai JAHOWA nai, tapi gabè taba datu nola ngo.

¹³Dua tahun nai matè mo ia.

¹⁴Isirai ngo bangkèna janah ibaing rempah-rempah dekket sibaungkus, nai ikubur mo i perkuburen raja-raja i kuta si Daud. Janah lako pesangapkensa, ilakati jelma nterrem mo pinoron mergollah-gollah.