Read Batak Dairi 2 Kronika 17 Bible Online

2 Kronika 17 - Batak Dairi bible

2 Kronika 17

¹Mbangkit raja mo si Josafat sumingkat bapana, janah ipetegguh kerajaenna i lako mengalo Israel.

²Ibaing mo soridadu merbekkas i karina kuta gotting i Juda dekket i ruar kuta Juda bak i kuta sienggo itaban bapana i nagerri Efraim.

³Ipasu-pasu JAHOWA ngo si Josafat kumarna ièkutken ngo pengelako bapana; oda uè ia menembah Baal,

⁴tapi mersembah taba Dèbata ngo. Tunduk ngo ia mi perèntah-perèntah Dèbata, janah oda ngo bagè raja-raja Israel pengelakona.

⁵Ipetegguh JAHOWA ngo ia gabè raja Juda. Karina ginemgem memerèken hadiah ngo tabasa, gabè bèak mo ia janah ipesangap.

⁶Mertuhu-tuhu ngo ia menguèi perèntah JAHOWA janah irumpakken ngo karina bekkas mersembah bègu bagi ma bak mèjan gana-ganaen Asyera i Juda.

⁷I tahun petelluken pemerèntahenna i, ipasulak mo sindates-ndates pangkatna lako mengajarken pati-patien JAHOWA i karina kuta silot i Juda, imo si Benhail, si Obaja, si Zakharia, si Netaneel dekket si Mika.

⁸Idengani sibah kalak Lewi ngo kalak i dekket dua imam. Kalak Lewi i imo si Semaya, si Netanya, si Zebaja, si Asael, si Semiramot, si Jonatan, si Adonia, si Tobia dekket si Tob-Adonia. Imam sidua kalak i imo si Elisama dekket si Joram.

⁹Laus mo kalak i merembah bukku Pati-patien JAHOWA mi karina kuta Juda lako mengajari jelma nterrem sinisidi.

¹⁰Buradan ngo karina raja i sikuliling Juda ibaing JAHOWA lako mengalo Raja Josafat.

¹¹Ijalo ngo bai kalak Palistin nai mbuè pirak dekket hadiah sidèbankenna dèng, dekket bai kalak Arab nai ijalo ngo 7.700 biri-biri dekket 7.700 kambing.

¹²Bagi mo, makin ndekkah, makin merkuasa mo si Josafat. Ibahan ngo bèntèng i suberri Juda dekket kuta bekkas bekkel.

¹³Mertènjun ngo ipennep bekkel i gennep kuta i. I Jerusalem ibaing ngo merian lubalang-lubalang mahantu,

¹⁴gennep nuhnuhen mengèkutken horongna. Si Adna imo Pakalima i nuhnuhen horong-horong Juda. Ia mo èkuten 300.000 kalak soridadu.

¹⁵Peduaken imo si Johanan, ia mo èkuten 280.000 kalak soridadu.

¹⁶Petelluken imo si Amasia anak si Zikhri; ia mo èkuten 200.000 kalak soridadu. (Si Amasia imo sada kalak soridadu simenohken dirina taba JAHOWA.)

¹⁷Pakalima nuhnuhen i horong marga Benyamin nai imo si Elyada, sada kalak pejuang mahantu. Ia mo ekuten 200.000 kalak soridadu lengkap merpanah dekket onding-onding.

¹⁸Peduaken ibas nuhnuhen i imo si Josabat, iuluken ngo 180.000 kalak soridadu lengkap ngo mersinjata kalak i.

¹⁹Kalak i mo merjaga i Jerusalem. Denganna ibaing raja i dèng ma ngo nuhnuhen sidèban i bèntèng silot i nagerri Juda.