Read Batak Dairi 2 Kronika 18 Bible Online

2 Kronika 18 - Batak Dairi bible

2 Kronika 18

¹Enggo kessa makin bèak janah termurmur si Josafat raja Juda, mersiberruen mo ia dekket si Ahab raja Israel.

²Enggo kessa barang piga tahun nai nola, laus mo si Josafat mendahi si Ahab mi kuta Samaria. Lako pesangapken si Josafat dekket pendenganina, merpèsta ngo si Ahab, idokken mo isembellih biri-biri dekket lembu mbuè kalohon. Sinderrangna i ièlèk-èlèk mo si Josafat, asa dekket menjuhap kuta Ramot i Gilead.

³Ikuso mo, “Uè ngo kènè rebbak berkat kita menjuhap Ramot?” Ialoi si Josafat mo, “Mendè ngo i, rebbak mo sibaing soridadunta. Rebbakken mergeraha mo kita.

⁴Tapi selloh ngo asa sikusoken lebbè taba JAHOWA.”

⁵Nai ipepulung si Ahab mo lot 400 kalak nabi, nai ikusoken mo taba kalak i, “Ndorok ngo aku berkat menjuhap Ramot barang oda?” “Ndorok ngo!” nina kalak i mengaloi. “Isohken Dèbata ngo kuta i bai Rajai.”

⁶Tapi mengkuso dèng ngo si Josafat, “Oda ngo lot i sèn nabi sidèban sindorok mengkusoi JAHOWA lako banta?”

⁷Ialoi si Ahab mo, “Lot dèng ngo sada kalak nai, imo si Mika anak si Jimla. Tapi nggogo ngo atèngku midahsa, ai oda nung lot mendè iramalken i bangku; dak singgodo sambing ngo.” “Iah, ulang mo nemmu dokken kènè bagi!” nina si Josafat.

⁸Nai idilo si Ahab mo sada kalak pugabè istana, ipasulak mo ia asa ndor mengalengi si Mika.

⁹Tikanna i merpakèen kerajaen ngo si Ahab dekket si Josafat, kundul i karosi kerajaen i pengeriken gandum i lebbè pèntu pengkeruhen Samaria, ninganna nabi-nabi roh menghadep magahken ramalen kalak i.

¹⁰Sada kalak ipas nabi-nabi i nai mergerar si Zedekia anak si Kenaana, simemahan tanduk bessi, mendokken taba si Ahab, “Bagèen ngo idokken JAHOWA, ‘Merkitè tanduk bagèen, italuken Rajai ngo Siria janah menggeppui kalak i.’ ”

¹¹Karina nabi sidèbankenna i menuhu-nuhui ninganna mendokken, “Kubu mo Ramot, mennang ngo Rajai. Kemenangen ngo iberèken JAHOWA bai Rajai.”

¹²Sinderrang bagidi, idokken pasulakken mengalengi si Mika i mo taba si Mika, “Karina nabi sidèban i mengeramalken kemenangen raja i. Kènè pè nemmu mengeramalken simerandal ma mo, bagè kalak idi.”

¹³Tapi ialoi si Mika mo, “Merkitè gerar JAHOWA singgelluh i, pellin memagahken kadè sinidokken Dèbata taba aku ngo kessa aku.”

¹⁴Soh kessa mo si Mika mi lebbè Raja Ahab, mèter ikusoi raja i mo ia, “Ndorok ngo aku dekket Raja Josafat menjuhap Ramot barang oda?” “Juhab mo!” nina si Mika mengaloi. “Tentu merhasil ngo Rajai. Iberèken JAHOWA mo kemenangen bai Rajai.”

¹⁵Ialoi si Ahab mo, “Mula merkitè gerar JAHOWA ngo kono mengerana taba aku, situhuna mo bagahken. Piga kali kennah kupesèngèt kono tersèngèt i?”

¹⁶Ibales si Mika mo, “Kuidah ngo barat-burut soridadu Israel i delleng-delleng. Tosè bagè biri-biri ngo kalak i oda lot mermakan, janah nina JAHOWA ngo tersèngèt kalak i, ‘Oda lot simenguluken kalak èn. Belli mo merkinijuah kalak i balik.’ ”

¹⁷Nai idokken si Ahab mo mbang si Josafat, “Otang tuhu ngo sikudokken ndai? Oda nung simendè iramalken ia bangku. Pellin singgodo sambing ngo.”

¹⁸Nai idokken si Mika dèng ma, “Bagèndari pè dengkohken mo sinidokken JAHOWA. Kuidah ngo JAHOWA kundul i babo tahtaNa i sorga, janah cènder ngo karina malaèkat i gembarNa.

¹⁹Mengkuso mo JAHOWA, ‘Isè uè mengajar-ajari si Ahab asa uè ia berkat mergeraha janah asa matè i Gilead?’ Pelaèn-laèn ngo pengaloi malaèkat i.

²⁰Perpodi kèkè mo sada tendi. Ijolmiti mo JAHOWA, nina mo, ‘Aku mo mengajar-ngajarisa.’ ‘Bakunè carana?’ nina JAHOWA.

²¹Ialoi tendi i mo, ‘Laus mo aku memaing luap karinana nabi si Ahab i.’ Idokken JAHOWA mo, ‘Selloh, baing mo bagi merhasil ngo ko mengar-ngajarisa.’ ”

²²Nai idokken si Mika dèng ma, “Asa bagi mo masa. Enggo ibaing JAHOWA merluap nabi-nabi Rajai taba Rajai, kumarna enggo itentuken JAHOWA lako perohken kinimago taba Rajai.”

²³Nai mèter roh mo Nabi Zedekia mendahi si Mika, mèter iparap mo abèna ninganna idokken, “Tuhu kin mo itadingken Tendi JAHOWA aku, janah mengerana nola ia taba kono?”

²⁴Ialoi si Mika mo, “Idahenmu ngo i tikan masuk kono mi sada bilik lako ciboni.”

²⁵“Tangkup ia!” nina Raja Ahab, “janah embah kènè ia taba si Amon raja kuta, dekket taba raja muda si Joas.

²⁶Dokken asa ipemasuk kalak i ia mi kurungen, janah cituk ukum pangaen bak ènumen iberrè bana, pèma balik aku merkinijuah.”

²⁷Nina si Mika mo, “Mula njuah-njuah Rajai balik, oda mo tuhu mengerana JAHOWA merkitè aku. Karina simerpulung i sèn mo saksi.”

²⁸Enggo kessa i berkat mo si Ahab raja Israel dekket si Josafat raja Juda menjuhap kuta Ramot i Gilead.

²⁹Idokken si Ahab mo mbang si Josafat, “Ukum aku kupekellih mo rupangku ninganna dekket mergeraha, tapi ukum kènè tong mo memakè pakèen raja.” Bagi mo pekellih rupa raja Israel laus mergaraha.

³⁰Tikan bagidi enggo iperèntahken raja Siria taba pakalima perkurèta perangna asa pellin raja Israel ukum iletlet.

³¹Jadi idah kalak i kessa mo Raja Josafat, idokdok kalak i ngo ia raja Israel. Kumara i, ijuhap kalak i mo ia. Tapi pingko-pingko mo si Josafat, nai ipaluah JAHOWA Dèbata mo ia, gabè ipepèol mo peraloen i dempak sidèban.

³²Satdar kessa mo pakalima kurèta perang Siria, oda ngo keppè i raja Israel, gabè ipetadi kalak i mo menjuhapsa.

³³Nai lot mo sada kalak tenterra Siria, oda sengaja memanahken anak panahna janah oda lot barang kadè itèngkenni. Keppè ikennai anak panah i mo raja Ahab janah tembus mo baju perangna tupung serrang perdemunna. “Enggo kenna aku, nina si Ahab taba supir kurètana.” “Putar mo, asa embah aku karuar i perjuhapen en nai.”

³⁴Tapi kumarna sebbu dèng geraha i, gabè dak cènder ngo tong Raja Ahab ibas kurètana i ninganna irabih menghadep tenterra Siria. Sundut kessa mataniari, matè mo ia.